An ka an seko bɛɛ kɛ forobaara la—An k’an ka ɲɛfɔliw kɛ ka bɛn mɔgɔw magow ma

MUN NA O NAFA KA BON: Maa munnenw ani saga wɛrɛw bɛ mɔgɔ suguw bɛɛ wele u ka na “ɲɛnamaya ji min gansan.” (Jirali 22:17) Jehova ye fɛɛrɛ minnu tigɛ walasa ka hadamaden kaminɛbagaw kunmabɔ jurumu ni saya la, nin ji in ye o fɛnw bɛɛ de taamashyɛn ye. Walasa ka se ka mɔgɔw dɛmɛ minnu ka laadalakow ni u ka dannayakow tɛ kelen ye, fo an ka “Kibaru Duman banbali” fɔ olu bɛɛ kelen kelen ye cogo la, min b’a to Kibaru Duman bɛ diya u ye.—Jirali 14:6.

AN BƐ SE KA O KƐ COGO MIN NA:

• Barokun ni tɛmɛsira sugandi min bɛna don mɔgɔw dusukun na aw ka waajulikɛyɔrɔ la. I bɛ se ka baara kɛ ni baro kɛcogo misali dɔ ye walima k’a sugandi ka baara kɛ ni fɛn dɔ ye min delila ka nɔ bɔ i bolo. Barokunw ani tɛmɛsira jumɛnw de ko ka di mɔgɔw ye kosɛbɛ? Yala fɛn dɔ kɛra sisan, mɔgɔ caman bɛ ka miiri ani ka kuma min ko la wa? Mun de bɛna diya cɛw walima musow ye?

• Foliw ani laadalako minnu bɛ aw ka yɔrɔ la, olu dɔw sen don i ka baro la.—2 Kɔrɛntekaw 6:3, 4

• Gafew ani wideyow bɛ an ka baarakɛminɛnw na, minnu bɛ yɔrɔ koorilen na mɔgɔw kalanni kama. A ɲini ka olu dɔn ka ɲɛ walasa i ka se ka u dɔ jira mɔgɔ la, min y’a jira ko kibaru duman ka di a ye

• I ni mɔgɔ minnu bɛ se ka bɛn aw ka waajulikɛyɔrɔ la, gafew ani wideyow ta olu ka kanw na

• I ka barokun yɛlɛma ka a bɛn i barokɛɲɔgɔn magow ma. (1 Kɔrɛntekaw 9:19-23) Misali la, i bɛna mun de fɔ ni i y’a mɛn ko i barokɛɲɔgɔn ka mɔgɔ dɔ sara kɔsa in na?

WIDEYO LAJƐ, O KƆ AW KA NIN ƝININKALI NINNU JAABI:

• Weleweledala tun y’a daminɛ ka baro jumɛn de kɛ ni a barokɛɲɔgɔn ye?

• Mun de tun bɛ ka kɛ barokɛɲɔgɔn ka ɲɛnamaya kɔnɔ?

• Weleweledala tun bɛ se ka tɛmɛsira jumɛnw de sugandi minnu tun bɛ bɛn nin ko in ma ani mun na?

• I ye i labɛn ka taa fɛn min fɔ waajuli la, i bɛ se ka o yɛlɛma cogo di walasa i ka barokun ka diya mɔgɔw ye aw ka waajulikɛyɔrɔ la?