Paul “ye barika da Ala ye ka a ja gɛlɛya”

Tuma min na jɛkulu min tun bɛ Romɛ y’a mɛn ko Paul bɛ ka na, balimakɛ kulu dɔ ye kilomɛtɛrɛ 64 taama kɛ ka taa a kunbɛn. U ye kanuya jira Paul la nata tɛ min na, o ye nɔ bila a la cogo jumɛn na? “Paul ye u ye tuma min na, a ye barika da Ala ye ka a ja gɛlɛya.” (Kɛwalew 28:15) Hali ni Paul tun dɔnnen bɛ iko mɔgɔ min bɛ dusu don jɛkuluw kɔnɔ a tun bɛ taa bɔ minnu ye, nin waati in na, ka a to kasodenya la, dusu donna ale kelenpe de kɔnɔ.—2 Kɔrɛntekaw 13:10.

Bi fana, kafo lakɔlɔsibagaw bɛ taa jɛkulu ni jɛkulu la walasa ka dusu don balimakɛw ni balimamusow kɔnɔ. I n’a fɔ Ala ka mɔgɔ tɔw bɛɛ, tuma dɔw la kafo lakɔlɔsibagaw bɛ sɛgɛn, ka jɔrɔ ani u fari bɛ faga. Ni kafo lakɔlɔsibaga ni a muso nana bɔ aw ka jɛkulu ye siɲɛ wɛrɛ, aw bɛ se ka mun de kɛ ka u dɛmɛ walasa u ka u ja gɛlɛya, o min bɛ kɛ sababu ye aw “ka ɲɔgɔn jija”?—Romɛkaw 1:11, 12.

• 

  To ka taa forobaara lajɛw la. Dusu bɛ don kafo lakɔlɔsibaga kɔnɔ ni weleweledalaw bɛ sarakaw kɛ walasa ka nafa bɔ kosɛbɛ jɛkulu ka dɔgɔkun kɛrɛnkɛrɛnnen baaraw la. (1 Tesalonikekaw 1:2, 3; 2:20) Kafo lakɔlɔsibaga bɛna bɔ aw ka jɛkulu ye kalo min na, a ɲini ka kɛ tutigɛbaga farankan ye o kalo la. Yala i bɛ se k’a ɲini ka waajuli kɛ ni kafo lakɔlɔsibaga ani a muso ye wa, walima ka taa i ka Bibulukalanden dɔ ka kalan kɛ ni u dɔ la kelen ye wa? A ka di u ye ka waajuli kɛ ni weleweledala caman ye, weleweledala kuraw walima minnu hakili la ko u tɛ se waajuli kɛli la kosɛbɛ, olu sen bɛ o la.

• 

  Kɛ mɔgɔw ladonbaga ye. Yala i bɛ se ka jiginyɔrɔ walima dumuni di u ma wa? I bɛ a jira o sen fɛ kafo lakɔlɔsibaga ani a muso la, ko i bɛ u kanu. U tɛ fɛnbaw si ɲini i fɛ.—Luka 10:38-42.

• 

  A bɛ ɲɛminɛli ni laadilikan minnu di, olu lamɛn ani ka u waleya. Kafo lakɔlɔsibaga bɛ an dɛmɛ ni kanuya ye walasa an k’a dɔn cogo min na an bɛ se ka ɲɛtaa kɛ Jehova ka baara la. Tuma dɔw la, a ka kan ka laadilikan gɛlɛnw di. (1 Kɔrɛntekaw 5:1-5) Ni an ye kanminɛli kɛ ani ka kolo, o bɛ a nisɔndiya.—Heburuw 13:17.

• 

  Waleɲumandɔn jira. Kafo lakɔlɔsibaga ni a muso ka cɛsiriw ye i nafa cogo min na, o fɔ u ye. E yɛrɛ bɛ se ka o fɔ u ye da ni da, walima ka o kɛ lɛtɛrɛ walima karti sababu fɛ.—Kolosekaw 3:15.