An ka ɲɔgɔn jija dannaya la
1. Lakɔlɔsibaga taamakɛlaw bɛ to ka na bɔ jɛkuluw ye minkɛ, o bɛ cogo kɛrɛnkɛrɛnnen jumɛnw di an ma?
1 Ciden Paul ye nin sɛbɛn Romɛ jɛkulu ma ko: “Ne b’a fɛ kosɛbɛ ka aw ye, walisa ne ka Ni Senu ka nilifɛn dɔ lase aw ma, walisa aw ka sabati, o kɔrɔ, an ka ɲɔgɔn jija dannaya la, aw ka dannaya ni ne ta.” (Rom. 1:11, 12) An ka waati la, lakɔlɔsibaga taamakɛlaw bɛ to ka na bɔ jɛkuluw ye minkɛ, o fana ye kow ye minnu bɛ cogow di an ma an ka ɲɔgɔn jija dannaya la.
2. Munna lakɔlɔsibaga taamakɛla nali bɛ kɔn k’a fɔ?
2 Jɛkulu: Tuma caman na lakɔlɔsibaga taamakɛla nali bɛ fɔ jɛkulu ye kalo saba ɲɔgɔn ka kɔn a na don ɲɛ. O b’a to an bɛ waati sɔrɔ ka kɔn ka an ka kow labɛn walisa ka se ka nafa sɔrɔ kosɛbɛ a nali la. (Efe. 5:15, 16) Ni a y’a sɔrɔ i bɛ baara de la, i bɛna se ka waati ɲini walisa ka foro baara kɔkɔrɔdon o dɔgɔkun kɔnɔna na. Dɔw bɛ fɛɛrɛw tigɛ walisa ka kɛ tutigɛbaga farankan ye kalo min na lakɔlɔsibaga bɛ na bɔ jɛkulu ye. N’i tun y’a boloda ka taa taama na o waati la, yala i bɛ se ka o taama waati yɛlɛma walisa ka kɛ ye o dɔgɔkun na wa?
3. Lakɔlɔsibaga taamakɛla bɛ i ka jɛkulu kɔnɔ tuma min na, walisa o ka se ka dusu don i kɔnɔ i bɛ se ka mun kɛ?
3 Lakɔlɔsibaga taamakɛla bɛ na bɔ jɛkulu ye kun belebele min na, o ye ka dusu don mɔgɔ kelen-kelen bɛɛ kɔnɔ ani ka u kalan foro cidenyabaara la. Yala i bɛ se k’i tɔgɔ di walisa e ni ale, walima e ni a muso ka baara kɛ ɲɔgɔn fɛ, ni a y’a sɔrɔ a furulen don wa? A ka di lakɔlɔsibaga taamakɛla ye ale ni weleweledala caman ka baara kɛ ɲɔgɔn fɛ. Weleweledala minnu tɛ cidenyabaara ɲɛdɔn kosɛbɛ walima minnu b’a fɛ ka dɔ fara u seko kan cidenyabaara la, olu bɛɛ sen b’a la. An bɛɛ bɛ se ka fɛn dɔ dege a ka kibaru duman ɲɛfɔcogo fɛ ani a bɛ hakilila minnu di ni kanuya ye, k’olu waleya. (1 Kɔr. 4:16, 17) N’i y’a wele a ka na dumuni kɛ i fɛ, o bɛna sira wɛrɛ dayɛlɛ walisa aw ka dusu don ɲɔgɔn kɔnɔ. (Heb. 13:2) Ikomi a b’a ka jɛmu labɛn ka kɛɲɛ ni jɛkulu magow ye, i k’i tulomajɔ o la.
4. An bɛ se ka dusu don an ka lakɔlɔsibaga taamakɛla kɔnɔ cogo di?
4 Lakɔlɔsibaga taamakɛla: Ciden Paul tun bɛ tigitigi i ko an balima minnu bɛ jɛkulu kɔnɔ. A ye kɔrɔbɔliw ni jɔrɔnankow dɔn. A mago tun b’a la balimaw ka dusu don a kɔnɔ, wa, a y’a ka waleɲumandɔn jira o ko la. (2 Kɔr. 11:26-28) Jɛkulu min bɛ Romɛ, o y’a mɛn tuma min na ko Paul kasodenlama nana yen, dɔw ye kilomɛtɛrɛ taama minnu ka ca ni 46 ye walisa k’a kunbɛn Apius dɔgɔjɔyɔrɔ la. “Paul ye u ye tuma min na, a ye barika da Ala ye ka a ja gɛlɛya.” (Kɛw 28:15) O cogo kelen na, e fana bɛ se ka dusu don i ka lakɔlɔsibaga taamakɛla kɔnɔ. “Bonyali fila” jira a la i ka kɔkɔrɔdonni fɛ ni nisɔndiya ye, ni a nana bɔ i ka jɛkulu ye. (1 Tim. 5:17). A bɛ cɛsiri minnu kɛ aw kosɔn, o fɔ a ye, k’a jira fana k’i b’a waleɲumandɔn tiɲɛ na o ko la. Ale ni a muso bɛna nisɔndiya kosɛbɛ ka i ka dannaya, i ka kanuya, ni i ka muɲu ye.—2 Tes. 1:3, 4.
5. Munna an bɛɛ mago b’a la bi, dusu ka don an kɔnɔ?
5 Nin “waati gɛlɛnw” na, jɔni b’an cɛma min mago t’a la dusu ka don a kɔnɔ? (2 Tim. 3:1) A latigɛ sisan k’i sen don cogo dafalen na jɛkulu ka dɔgɔkun kɛrɛnkɛrɛnnen baaraw la ni lakɔlɔsibaga taamakɛla ye. Lakɔlɔsibaga taamakɛlaw ka fara jɛkulu weleweledalaw kan, an bɛɛ bɛ se ka an sen don walisa an bɛɛ ka ɲɔgɔn jija dannaya la ni nisɔndiya ye. O cogo la, an bɛna se fana “ka ɲɔgɔn jija ka dɔ fara ɲɔgɔn barika kan.”—1 Tes. 5:11.