Nafolo nafamaw bɛ an bolo ka tila anw ni mɔgɔw cɛ
1 Ala ka kuma falen don nafolow la alako ta fan fɛ, nafolo minnu ka di an ye kosɛbɛ. (Zab. 12:6; 119:11, 14) Don dɔ, Yesu ye ko caman fɔ ntalenw na walisa ka ɲɛfɔli kɛ Masaya ɲɛ caman kan. O kɔfɛ, a y’a ka kalandenw ɲininka ko: “Aw ye o kow bɛɛ faamu wa?” U kɛlen k’a fɔ a ye k’u ye o fɛn bɛɛ kɔrɔ faamu, Yesu ko u ma: “O cogo la sariya karamɔgɔ fɛn o fɛn kalannen bɛ sankolo masaya ko la, o bɔlen bɛ sotigi dɔ fɛ min bɛ fɛn kuraw ni fɛn kɔrɔw sɔrɔ ka bɔ a ka nafolo mara yɔrɔ la.”-Mat. 13:1-52.
2 Siɲɛ fɔlɔ min na an ye Bibulukalan daminɛ, an ye Bibulu ka tiɲɛkuma minnu dɔn, olu tun bɛ se ka kɛ an bolo i ko nafolo kɔrɔw. An ka yɛrɛ kalan sababu fɛ, an taara a fɛ ka dɔ fara an ka dɔnniya kan Ala ka kuma ka ko dunbaw ko la. An ye Bibulu ka tiɲɛkuma wɛrɛw dɔn minnu kɛra an bolo nafolo kuraw ye, an kɛlen kura don ka minnu sɔrɔ. (1 Kɔr. 2:7) “Jɔnkɛ dannamɔgɔ hakiliman” sababu fɛ fana, an nana ko kuraw dɔn.-Mat. 24:45.
3 O alako ta fan fɛ nafolo kuraw ni nafolo kɔrɔw nafa ka bon an bolo kosɛbɛ. O b’an bila an ka ɲini ka kalan ani ka dɔnniya sɔrɔ mɔgɔkalan kɛcogo ɲuman na i ko Ala ka kuma karamɔgɔw, ka kuma kosɛbɛ tiɲɛkuma nafamaw kan mɔgɔw ye, an ye tiɲɛkuma nafama minnu dɔnniya sɔrɔ.
4 An bɛ min kalan Yesu ka misali fɛ: Yesu y’a jira a bɛ min miiri o nafolow ko la, a kɛlen k’a cɛsiri kosɛbɛ ka o nafolow ɲɛfɔ mɔgɔw ye. Hali n’a tun sɛgɛnnen don tuma min na, nafolo minnu tun bɛ Yesu ka “nafolo mara yɔrɔw la”, a m’a dabila ka olu lase mɔgɔw ma.-Yuh. 4:6-14.
5 Kanuya min tun bɛ Yesu la ka ɲɛsin mɔgɔw ma minnu tun ye faantanw ye alako ta fan fɛ, o y’a bila a ka Ala ka tiɲɛkuma nafolow lase u ma, tiɲɛkuma minnu bɛ ɲɛnamaya di mɔgɔ ma. (Zab. 72:13) Mɔgɔ minnu tun b’a fɛ ka dɔnniya sɔrɔ Ala n’a sagonata ko la, olu hinɛ donna a la, wa, o y’a bila a ka “u kalan fɛn caman na.”-Mar. 6:34.
6 An ka Yesu ladege: Nafolo minnu b’an bolo, ni olu nafa ka bon an bolo kosɛbɛ, an bɛna kɛ i ko Yesu. An bɛna kɔrɔtɔ k’olu jira mɔgɔw la Bibulu yɛrɛ kɔnɔ. (Nta. 2:1-5) Hali n’an bɛ se ka sɛgɛn waati dɔw la, o bɛɛ n’a ta, Ala ka tiɲɛkuma minnu bɛ bɔ Bibulu kɔnɔ, an bɛna kuma olu kan ni nisɔndiya ye min bɛ bɔ an dusukun na. (Mar. 6:34) Ikomi o nafolow nafa ka bon an bolo kosɛbɛ, o bɛna an bila an ka an seko damajira bɛɛ kɛ cidenyabaara la, k’a ɲini k’an ta kɛ cogo dafalen na tuma bɛɛ.