An bɛ se ka fɛn dɔ di Jehowa ma wa?

¹ Yala i b’a dɔn ko hadamadenw bɛ se ka fɛn dɔ di Ala ma wa? Abɛl ye a ka bagan ɲɛnamabaw kɛ saraka ye Jehowa ye, ani Nuhun ni Job ye o saraka ɲɔgɔnw fana bɔ. (Jen. 4:4; 8:20; Job 1:5) Tiɲɛ don k’o sarakaw ma dɔ fara an Dabaga ka bolofɛnw kan cogo si la, bawo fɛn bɛɛ b’ale bolo kaban. Nka, o sarakaw y’a jira ko Ala kanuyaba bɛ o kantigi dusukunw na. An ka waati la fana, an bɛ se ka an ka waati, an fanga, an ka wari ni an bolofɛnw di Jehowa ma, ka o kɛ “tanuli saraka” ye.—Heb. 13:15.

² An ka waati: Ka waati ‘kunmabɔ’ fɛnw kan minnu nafa man bon kosɛbɛ walisa ka cidenyabaara kɛ cogo dafalen na, o ye fɛn ye min ni tanuli ka kan kosɛbɛ. (Efɛ. 5:15, 16) Laala an bɛ se ka an ka waati bolodacogo yɛlɛma walisa ka kɛ tutigɛbaga farankan ye kalo kelen walima kalo fila san kɔnɔ. A bɛ se ka kɛ k’an bɛ deli ka waati min kɛ cidenyabaara la, an bɛ se ka dɔ fara o waati kan. Ka to kɛnɛma ka waajuli kɛ miniti 30 wɛrɛ kɔnɔ dɔgɔkun o dɔgɔkun, o bɛ dɔ fara an ka waati kɛta kan min dɔgɔyalen ba ye lɛrɛ fila ɲɔgɔn ye kalo o kalo.

³ An fanga: Ka fanga sɔrɔ walisa k’o kɛ cidenyabaara la, o b’a wajibiya an ka an yɛrɛ tanga ɲɛnajɛw ni baara ma minnu b’an sɛgɛn fo an tɛ se ka an fanga ɲɛnamaba di Jehowa ma. Jɔrɔnanko minnu fana bɛ se ka an dusukun “kuru,” ka an barika ban min tun bɛ se ka don Ala ka baara la, an ka kan ka o jɔrɔnanko bila kɛrɛfɛ. (Nt. 12:25, Alliance biblique universelle) Hali n’a y’a sɔrɔ kun ɲɛnama b’an bolo ka hami ko dɔ la, a ka fisa kosɛbɛ ka an ‘hamina kow bɛɛ da Matigi [Jehowa] kan’.—Zab. 55:23; Fil. 4:6, 7.

⁴ An ka wari ni an bolofɛnw: An bɛ se fana ka an ka wari ni an bolofɛnw kɛ ka waajuli baara kɔkɔrɔdon. Paul ye dusu don a Kretiɛnɲɔgɔnw kɔnɔ u ka to ka “wari dɔ bila a dan na” tuma bɛɛ walisa ka fɛn dɔ sɔrɔ ka di mɔgɔw ma minnu mago bɛ dɛmɛ na. (1 Kɔr. 16:1, 2) O cogo kelen na, an fana bɛ se ka wari dɔ bila kɛrɛfɛ walisa ka o di an ka jɛkulu magow kama ani diɲɛ bɛɛ kɔnɔ baara kama. An bɛ min di ni an dusukun bɛɛ ye, hali ni o ka dɔgɔ, o de ka di Jehowa ye kosɛbɛ.—Luka 21:1-4.

⁵ Jehowa ye caman di an ma. (Yak. 1:17) Ni an b’an ka waati, an fanga, an ka wari ni an bolofɛn wɛrɛw di walisa ka baara kɛ Jehowa ye, an b’an ka waleɲumandɔn jira o cogo la. N’an bɛ o kɛ, o ka di Jehowa ye, “k’a masɔrɔ min bɛ nili kɛ ni diyaɲɛ ye, o tigi de ko ka di Ala ye.”—2 Kɔr. 9:7.