Baara minnu bonya dara an kan, an bɛ nafaba don olu la kosɛbɛ
1 Kabini hadamadenw bɛ dugukolo kan, Jehowa ye baara sugu caman di a ka baarakɛlaw ma. A ye baara di u ma ka kɛ, k’a sɔrɔ a ma u si hakɛ ni u jɔyɔrɔ lajɛ, walima k’a lajɛ ni a ka baarakɛla tun ye cɛ ye, walima ni muso don, walima u ka baara ye min ye. (Luka 1:41, 42; Kɛw. 7:46; Fil. 1:29) Jehowa ye baara jumɛnw bonya da an kan bi?
2 An ka bonya dɔw: An ye bonya sɔrɔ ka kɛ Jehowa ka mɔgɔw kalannen ye. (Mat. 13:11, 15) Ni an bɛ Jehowa tanu an ka ɲɛfɔliw fɛ jɛkulu ka lajɛw kɛtuma na, o fana ye bonya wɛrɛ ye an bɛ nafa don min na kosɛbɛ. (Zab. 35:18) Ni an ye siraw sɔrɔ ka ɲɛfɔliw kɛ, an bɛ o kɛ ni nisɔndiya ye. O cogo kelen na, baara o baara bɛ di an ma ka kɛ jɛkulu kɔnɔ, ni an bɛ o filɛ bonya ye min dara an kan, an bɛna o baara kɛ ni an seko bɛɛ ye. Bonya min b’an bolo ka Masaya so saniya ani ka baara kɛ walisa ka o minɛ koɲuman, yala an b’an sen don tuma bɛɛ o baaraw la wa?
3 Mɔgɔ miliyɔn caman bɛ u yɛrɛ ɲininka ni Ala bɛ olu ka deliliw lamɛn. Nka, bonya kɛrɛnkɛrɛnnen b’an bolo ko Ala min ka bon ni dunuya kɔnɔ mɔgɔbaw bɛɛ ye, o b’an ka deliliw lamɛn. (Nt. 15:29) Jehowa yɛrɛ de b’a ka baarakɛlaw ka deliliw lamɛn. (1 Pi. 3:12) Siɲɛ hakɛ min na an bɛ se ka gɛrɛ a la k’a deli, a ma dan bila o la. O bonya min dara an kan nin ye ka se ka Ala deli “tuma bɛɛ,” an bɛ nafaba don o la kosɛbɛ.”—Efɛ. 6:18.
4 Ala “baarakɛɲɔgɔnw”: Bonya min dara an kan min ye bonya bɛɛ la fɔlɔ ye, o ye ka Ala ka Masaya kibaru duman fɔ, an kɛlen Ala “baarakɛɲɔgɔnw” ye o baara la. (1 Kɔr. 3:9) Baara don min bɛ an wasa, k’an barika bonya. (Yuh. 4:34) Jehowa mago t’a la ka hadamadenw ta ka o baara kɛ, nka a ye o baara di an ma bawo Jehowa b’an kanu. (Luka 19:39, 40) Jehowa ye o baara di an ma tuma min na, a ma o di mɔgɔ sugu bɛɛ ma ten, k’a sɔrɔ a ma fɔlɔ ka jateminɛ kɛ. Mɔgɔ minnu bɛ cidenyabaara kɛ, seko dɔw ka kan ka kɛ olu la alako ta fan fɛ, wa, o sekow ka kan ka to u la. (Esa. 52:11) Yala an y’a jira ko an bɛ nafaba don o bonya la min dara an kan, an kɛlen ka cidenyabaara bila jɔyɔrɔba la an ka dɔgɔkun kow bolodalen na wa?
5 Bonya minnu bɛ bɔ Jehowa yɔrɔ, olu bɛ an ka diɲɛlatigɛ kɛ fɛn ye kuntilenna ɲɛnama bɛ min na. (Nt. 10:22) An kana o bonyaw filɛ fɛn gansanw ye abada. Baara minnu dira an ma ka kɛ, ni an bɛ nafaba don olu la tiɲɛ na, o b’a to an ko bɛ diya an sankolola Fa ye, ale min ye “fɛn ɲuman . . . ani nilifɛn dafalenw” bɛɛ dibaga ye.—Yak. 1:17.