Aw ka “den caman kɛ” ka taa a fɛ”
1 Yesu ye kumaw fɔ misaliw la, minnu kɔnɔna na, a y’a yɛrɛ suma rezɛnsun sɛbɛ la, k’a Fa suma Sɛnɛkɛla ma, ani ka a ka kalanden munnenw suma rezɛnsun bolow ma minnu bɛ den kɛ. Yesu tun bɛ ka o Sɛnɛkɛla ka baara ɲɛfɔ tuma min na, a y’a jira k’a jɛya nafa min b’a la jiribolo nɔrɔlen ka to kosɛbɛ rezɛnsun la. (Yuh. 15:1-4) An bɛ kalan min bɔ o la, o ye ko teriyasira bɛ mɔgɔ o mɔgɔ ni Jehowa cɛ, o tigi ka kan ka kɛ i ko “rezɛnsun sɛbɛ” bolo min bɛ den kɛ, n’o rezɛnsun sɛbɛ ye Yesu Krista ye. An ka kan ka hakili senu den caman kɛ ani Masaya mɔ caman kɛ ka taa a fɛ.—Gal. 5:22, 23; Mat. 24:14; 28:19, 20.
2 Hakili senu den: An ye ɲɛtaa min kɛ alako ta fan fɛ, o bɛ jira kosɛbɛ hakili senu den hakɛ fɛ minnu bɛ ye an na. Yala i bɛ i jija ka Ala ka hakili senu den sɛnɛ i la, Ala ka Kuma kalanni fɛ ani taasili fɛ Ala ka Kuma na wa? (Fil. 1:9-11) I kana siran ka Ala deli walisa ka hakili senu sɔrɔ, o min bɛ se k’i bila ka jogoɲumanw jira minnu bɛ nɔɔrɔ da Jehowa kan, ani minnu b’i dɛmɛ ka ɲɛtaa kɛ ka taa a fɛ alako ta fan fɛ.—Luka 11:13; Yuh. 13:35.
3 Ni an bɛ hakili senu den sɛnɛ an yɛrɛ la, o bɛna an dɛmɛ fana ka kɛ mɔgɔw ye minnu cɛsirilenw don kosɛbɛ waajuli baara la. Misali la, kanuya ni limaniya b’an bila ka waati boloda walisa ka to ka waajuli kɛ, ka o kɛ an delinako ye, k’a sɔrɔ fɛn caman b’an bolo ka kɛ. Jogoɲuman dɔw, i n’a fɔ muɲuli, bɛn, hinɛ, yɛrɛminɛ, n’o ye ka se i yɛrɛ la i ka walew la, i ka kumaw la walima i ka miiriw la, o jogoɲumanw b’an dɛmɛ an kɛcogo ka bɛn an kɛlɛbagaw fan fɛ. Nisɔndiya b’a to an bɛ wasa sɔrɔ waajuli la, hali ni mɔgɔw ye kibaru duman mɛn, k’a sɔrɔ o ma fosi kɛ u la.
4 Masaya mɔ: An b’a fɛ fana ka Masaya mɔ kɛ. Nin sen bɛ o la: Ka ‘tanuli saraka bɔ Ala ye . . . ka a tɔgɔ tanu an da la tuma bɛɛ.’ (Heb. 13:15) An bɛ o kɛ kibaru duman waajuli fɛ ni cɛsiri, ani ni kantigiya ye. Walisa ka Masaya mɔ caman kɛ, yala aw bɛ ka cɛsiriw kɛ walisa ka aw ka waajuli kɛcogo ɲɛ kosɛbɛ?
5 Yesu y’a fɔ ko a ka kalanden kantigiw bɛna den kɛ minnu hakɛ tɛ kelen ye. (Mat. 13:23) O la sa, an man kan ka an yɛrɛ suma ni mɔgɔ wɛrɛw ye, nka an ka kan ka an seko damajira bɛɛ kɛ Jehowa ye. (Gal. 6:4) Ni an bɛ baara kɛ ni Ala ka Kuma ye walisa ka a lajɛ ni tilennenya ye an bɛ cogoya min na, o bɛna an dɛmɛ ka nɔɔrɔ da Jehowa kan ka taa a fɛ, “den caman” kɛli fɛ.—Yuh. 15:8.