Yala i labɛnnen don dugukolo ka kasaara kow kama wa?

1. Mun na hakilitigiyako don an k’an labɛn kasaaraw kama?

¹ San o san, dugukolo yɛrɛyɛrɛw bɛ kɛ, kɔgɔji bɛ na mɔgɔw kan, sanjibaw ni fiɲɛbaw bɛ na ɲɔgɔn fɛ, sanji bɛ na ka dama tɛmɛ. O fɛnw bɛ bɔnɛ lase mɔgɔ miliyɔn caman ma diɲɛ kɔnɔ, wa, an balimakɛw ni an balimamusow sen bɛ o mɔgɔw la. Ikomi o kasaara suguw bɛ kɛ k’a sɔrɔ mɔgɔw ma sigi n’a ye, ani ko o kasaara suguw bɛ se ka an kelen-kelen bɛɛ sɔrɔ, ni an labɛnnen don o kow kama, o ye hakilitigiyako ye.—Nt. 21:5.

2. Mun na an ka kan ka an ka ladɛrɛsi ni an ka telefɔni nimɔrɔ kura di maakɔrɔw ma?

² Sanni kasaara ka kɛ: Tuma dɔw la, faamaw bɛ se k’a fɔ an ye ko kasaara dɔ natɔ don. A nafa ka bon o waati la an k’an tulomajɔ kosɛbɛ o kumaw la, ka tugu olu kɔ. (Nt. 22:3) O ko suguw la, maakɔrɔw bɛna a ɲini ka jɛkulu kɔnɔmɔgɔw bɛɛ lasɔrɔ, ka dɛmɛ lase u ma walisa u ka se k’u labɛn iko a ka kan cogo min na. Kasaara kɔfɛ, maakɔrɔw bɛna u jija fana ka mɔgɔw bɛɛ lasɔrɔ minnu bɛ na jɛkulu ka kow la, walisa k’a lajɛ ni baasi si ma u sɔrɔ. U mago bɛ se ka kɛ dɛmɛ sugu min na, u b’o fana jateminɛ. Ni maakɔrɔw t’a dɔn mɔgɔw bɛ se ka lasɔrɔ cogo min na, waati nafama bɛ se ka tiɲɛ. O la sa, a ka ɲi weleweledalaw ka u ka ladɛrɛsi ni u ka telefɔni nimɔrɔ kuraw di jɛkulu sɛbɛnnikɛla ni u ka gafe kalan lakɔlɔsibaga ma.

3. An bɛ yɔrɔ min na, ni kasaara ka teli ka kɛ o yɔrɔ la, an bɛ se ka sɔn cogo jumɛn na maakɔrɔ ka fɛɛrɛ tigɛlenw na?

³ Ni jɛkulu bɛ yɔrɔ la, kasaara ka teli ka kɛ yɔrɔ min na, maakɔrɔw bɛ se k’a ɲini weleweledalaw fɛ u ka u somɔgɔw walima u teriw ka telefɔni nimɔrɔ di, u somɔgɔw walima u teriw minnu sigilen tɛ u dafɛ, ni olu ye mɔgɔw ye minnu ka kan ka lasɔrɔ ni kasaara kɛra. O kɛli bɛna a to maakɔrɔw b’a dɔn mɔgɔw bilara yɔrɔ lakanalen min na. Maakɔrɔw bɛ se fana ka fɛɛrɛw tigɛ jɛkulu ye walisa a k’a dɔn fɛn minnu ka kan ka kɛ ni kasaara kɛra, i n’a fɔ ka ɲɛfɔlisɛbɛn di weleweledala kelen-kelen bɛɛ ma, u ka o to u bolo kɔrɔ. O ɲɛfɔlisɛbɛn b’a jira weleweledala kelen-kelen bɛɛ ka kan ka min kɛ. Mɔgɔw bɛ taa cogo min na ka bɔ kasaara yɔrɔ la, ani fɛɛrɛ minnu ka kan ka tigɛ walisa ka mɔgɔw dɛmɛ minnu mago bɛ dɛmɛ kɛrɛnkɛrɛnnen na, o ko bɛɛ sen bɛ o fɛɛrɛ tigɛlenw na. A nafa ka bon kosɛbɛ an ka sɔn ka tugu o fɛɛrɛw kɔ minnu tigɛra ni kanuya ye.—Heb. 13:17.

4. Ni kasaara kɛra an ka yɔrɔ la, an bɛ se ka mun kɛ?

⁴ Kasaara kɔfɛ: I ka kan ka mun kɛ ni kasaara dɔ kɛra i ka yɔrɔ la? I ka sɛgɛsɛgɛ n’i ka denbaya mago ɲɛna farikolo ta fan fɛ. N’i bɛ se, mɔgɔ minnu ye bɔnɛ sɔrɔ, i ka olu dɛmɛ ka kɛnyɛ ni u mago ye. I jija ka i ka gafe lakɔlɔsibaga walima maakɔrɔ wɛrɛ lasɔrɔ joona-joona, ni o bɛ se ka kɛ. O ko ka kan ka kɛ hali ni fosi ma i sɔrɔ, ani n’i mago tɛ fosi la. N’i mago bɛ dɛmɛ na, i ka da a la ko i balimaw bɛna u cɛsiri cogo bɛɛ la k’i dɛmɛ. (1 Kɔr. 13:4, 7) A to i hakili la ko i bɛ gɛlɛya min na, Jehowa bɛ o kala ma. I jigi da ale kan, walisa a k’i dɛmɛ. (Zab. 37:39; 62:8) I ka kow kɔlɔsi walisa ka mɔgɔw dɛmɛ alako ta fan fɛ, ka dusu don u kɔnɔ fana. (1 Kɔr. 1:3, 4) N’i bɛ se ka i ka alako ta fan fɛ baaraw daminɛ kokura, o daminɛ joona-joona.—Mat. 6:33.

5. An minnu ye Kretiɛnw ye, kasaaraw kɛli bɛ mun kɛ an na?

⁵ Ni kasaara kɛli bɛ mɔgɔw jɔrɔ kosɛbɛ, o bɛɛ n’a ta, an bɛ se ka miiri sini ma, ka da a la ko kasaaraw tɛna kɛ. Yan ni dɔɔnin cɛ, kasaara bɛɛ bɛna kɛ ko tɛmɛnenw ye. (Jir. 21:4) Nka, sanni o don ka se, k’a sɔrɔ an bɛ k’an timinandiya ka kibaru duman fɔ mɔgɔw ye, an ka fɛɛrɛ bɛnnenw tigɛ walisa k’an labɛn bɔnɛw ni gɛlɛyaw kama.