“Ne ma se a ma”

¹ K’a fɔ ko “ne ma se a ma,” o ye kumaw ye tuma caman na, minnu bɛ mɔgɔw kɛcogo jira ka ɲɛsin kibaru duman ma, yɔrɔ dɔw la. Mun bɛna se k’an dɛmɛ walisa an dusu kana faga ni an bɛ mɔgɔw sɔrɔ an ka waajulikɛyɔrɔ la minnu b’a fɔ k’u ma se kibaru duman ma? An bɛ se k’u dɛmɛ cogo jumɛn na walisa kibaru duman ka diya u ye?

² I ka nisɔndiya to i la: Kun minnu na mɔgɔw ma se kibaru duman ma, ni an bɛ an hakili to o la, o bɛna an dɛmɛ an ka nisɔndiya ka to an na. A fɔra mɔgɔ minnu ye ko Ala ma hadamaden da, ko hadamaden nana a yɛrɛma, yɛlɛma-yɛlɛmali de fɛ, ani mɔgɔ minnu ma lamɔ Kretiɛn diinɛ na, olu bɛɛ lajɛlen ma jateminɛ kɛ Bibulu nafa kan. I b’a sɔrɔ dɔw jigitigɛra, bawo u y’a kɔlɔsi ko diinɛ kɔnɔna na, mɔgɔw bɛ min fɔ, ani u bɛ min kɛ, o tɛ kelen ye. Mɔgɔ dɔ wɛrɛw ka sɔnja ni u ka jigintanya de y’a to u ma se kibaru duman ma. (Efe. 2:12) Mɔgɔ dɔw fana tɛ miiri walima u tɛ jateminɛ kɛ foyi kan bawo u doninen bɛ diɲɛlatigɛ jɔrɔnankow fɛ.—Mat. 24:37-39.

³ Hali ni dɔw ma sɔn kibaru duman ma, o bɛɛ n’a ta, an bɛ se ka nisɔndiya sɔrɔ cidenyabaara la, n’an b’a dɔn ko an ka cɛsiriw bɛ nɔɔrɔ da Jehowa kan. (1 Pi. 4:11) Ka fara o kan, ka kuma tiɲɛ kan mɔgɔ wɛrɛw fɛ, hali minnu ma nafa don kibaru duman na fɔlɔ, o bɛ an yɛrɛ ka limaniya kologɛlɛya. An k’an jija ka an ka waajulikɛyɔrɔ mɔgɔw filɛ, i n’a fɔ Jehowa bɛ u filɛ cogo min na. Ninevɛ dugu kɔnɔmɔgɔ minnu tun “tɛ u kinin ni u numan dɔn” ka bɔ ɲɔgɔn na, olu hinɛ donna Jehowa la. (Jon. 4:11) An ka waajulikɛyɔrɔ mɔgɔw mago bɛ kibaru duman na. O la sa, an kana kibaru duman fɔli dabila, nka an ka kan ka cogow ɲini minnu b’a to Bibulu cikan bɛ diya u ye.

⁴ Baro kɛ sigida mɔgɔw haminankow kan: I ka kuma daminɛ na, laala, i bɛ se ka kuma sigida mɔgɔw haminanko dɔ kan, ka tila k’i barokɛɲɔgɔn ɲininka a k’a hakililaw di o ko kan. A kumatɔla, i tulomajɔ kosɛbɛ. O kɔfɛ, Bibulu dususaalo kuma dɔ jira min bɛ a haminanko kan. Don dɔ la, kasaara dɔ kɛlen kɔfɛ u ka sigida la, seere dɔ taara da kelen-kelen bɛɛ la. A y’a jira a sigiɲɔgɔnw na ni kɔnɔnajɛya ye, ko kasaara min kɛra o ma diya a ye fewu. A ko: “O yɔrɔnin bɛɛ la, mɔgɔw nɛnw sinna ka foni ten. Ne ye baro ɲuman caman kɛ mɔgɔw fɛ o don na, bawo ne y’a jira ko u ka ko ka bon ne bolo.”

⁵ Kunko minnu bɛ hadamadenw da la, olu kelen-kelen bɛɛ bɛna ɲɛnabɔ Ala ka Masaya fɛ. A ɲini k’a dɔn fɛn min ye i barokɛɲɔgɔn kunko bɛɛ la belebele ye. Jigiya kuma min bɛ Bibulu kɔnɔ, a bɛ se ka sɔn i k’o ɲɛfɔ a ye. Ni a ma sɔn, laala “don wɛrɛ” a na sɔn ka lamɛnni kɛ.—Kɛw. 17:32.