Kanuya—Fɛn min b’a to an ka cidenyabaara bɛ nɔ bɔ
1 “A’ ye na ne ma . . . ne na lafiya di aw ma.” (Mat. 11:28) Mɔgɔw kanuya min bɛ Yesu la kabini tuma jan, nin kuma ɲumanw bɛ o de jira. Kanuya tɛ nin diɲɛ kɔnɔ. O kosɔn mɔgɔw sɛgɛnnen bɛ kosɛbɛ. Ikomi an ye Kretiɛnw ye, ko an cira ka waajuli kɛ, o de y’a to an b’a fɛ ka Yesu ladege, ka jira o mɔgɔw la ko an bɛ u kanu. Ni an bɛ ka kibaru duman fɔ mɔgɔw ye, an bɛ se ka o kanuya jira cogo jumɛn na?
2 An ka kuma fɛ: Mɔgɔw kanuya min bɛ Yesu la, o y’a bila a ka kibaru duman fɔ u ye tuma bɛɛ. (Yuh. 4:7-14) Kanuya bɛna an dɛmɛ an kana siga-siga ka senfɛ seereya kɛ. San wɔɔrɔ dennin dɔ ye seereya ɲuman kɛ muso dɔ ye min tun sigilen bɛ makɔnɔni na a kɛrɛfɛ, dɔgɔtɔrɔso la. Mun ye dennin bila ka seereya kɛ? A ko: “Muso tun bɔlen bɛ mɔgɔ fɛ min mago b’a la ka dɔnniya sɔrɔ Jehowa ko la.”
3 An bɛ se k’a jira mɔgɔw la ko an b’u fɛ, ni an bɛ yɛlɛ u fɛ ni kɔnɔnajɛya ye, ni kanuya ye, ani ni an bɛ kuma u fɛ iko an teriw. An b’a jira fana ko an b’u fɛ tigitigi, ni an b’an tulomajɔ k’u ka kumaw lamɛn koɲuman ani ni an bɛ sɔn a ma ko kun bɛ u haminanko la. (Nt. 15:23) Ni an ko an bɛ Yesu ladege, an ka kan k’an sinsin Masaya cikan yɔrɔ kan, min bɛ dusu don u kɔnɔ, ani min bɛ Jehowa ka hinɛ jira ka ɲɛsin mɔgɔw ma.—Mat. 24:14; Luka 4:18.
4 An ka walew fɛ: Yesu tun b’a teliya ka mɔgɔw dɛmɛ farikolo ta fan fɛ ani magoɲɛfɛnw ta fan fɛ. (Mat. 15:32) Ka an to cidenyabaara la, an fana bɛ se ka ko ɲumanw kɛ mɔgɔw ye kanuya sira la. An balimamuso dɔ y’a ye ko ci nafama tun bɛ k’a fɔ muso dɔ ye telefɔni fɛ, nka muso tun tɛ sera k’o faamu. An balimamuso ye muso dɛmɛ ka muso welebaga ka kuma bayɛlɛma a ye. O kanuya wale ye sira dayɛlɛ u ka kuma Bibulu kan. O baro ye muso dɛmɛ a ka sɔn ka Bibulu kalan kɛ. Nin fana ye ko wɛrɛ ye min kɛra. An balimakɛ dɔ tun taara segin-ka-bɔnye kɛ. A y’a barokɛɲɔgɔn sɔnjalen sɔrɔ, bawo cɛ tun dɛsɛlen bɛ ka sigilan maganman girinmanba dɔ bɔ a nɔ na, ka na ni o ye donda la. An balimakɛ kɛlen kɔ ka cɛ dɛmɛ, o kɔfɛ dɔrɔn, a ye cɛ dɛmɛ ka sigilan min bɔ a nɔ na, ale yɛrɛ tun sigilen bɛ o kan sisan, ka Bibulu kalan daminɛ a barokɛɲɔgɔn fɛ, min y’a waleɲumandɔn kosɛbɛ.
5 Ni an bɛ cidenyabaara kɛ, an b’a jira ko an bɛ Jehowa kanu, ani ko an bɛ an mɔgɔɲɔgɔn kanu. (Mat. 22:36-40) Ni an bɛ o kanuya sugu jira an ka kuma fɛ ani an ka walew fɛ, o bɛ mɔgɔ kɔnɔnajɛlenw dɛmɛ u k’a dɔn ko an ta de ye tiɲɛ ye.