A’ ye deliko ɲumanw ta, ka dugawu caman sɔrɔ o la
1 Siɲ fɔlɔ min na aw kɛra kretiɛn ye, laala aw y’aw cɛsiri kosɛbɛ ka aw yɛrɛ dege ko dɔw keli la alako ta fan fɛ walisa u ka kɛ deliko ɲuman ye aw la. Ka Bibulu kalan don o don, ka na kretiɛn lajɛw la, waajulibaara ani delili, olu sen bɛ deliko la. O cɛsiriw kosɔn, Jehowa dubara aw ye, aw taara ɲɛ alako ta fan fɛ. A bɛ se ka kɛ ko aw ka batɛmutatuma ni bi cɛ, san caman tɛmɛna. E tun bɛ deli ka ko duman min kɛ alako ta fan fɛ e kɛlen kretiɛn ye, yala e bɛ ka o de kɛ tuma bɛɛ bi wa?
2 A’ y’aw deliko sɛgɛsɛgɛ ka ɲɛ: Yala ka Ala ka Kuma yɔrɔ dɔ kalan don o don, o ye aw deliko ye wa? Aw bɛ dugawu caman sɔrɔ o kɛli la dɛ! (Jos. 1:8; Zab. 1:2, 3) Lawale la, Israɛl jamana masakɛ tun ka kan ka Tɔn Sariya sɛbɛn a yɛrɛ ye a tɔgɔla sɛbɛn kan, k’o “kalan a si tilew bɛɛ la.” A tun bɛ nafa jumɛnw sɔrɔ o la? O b’a kɛ masakɛ majiginnen ye, ani a bɛ Alaɲɛsiran dege, o la sa a tɛna ban Ala ka ci fɔlenw na. (Dut. 17:18-20) O cogo kelen fana na bi, ni an bɛ Bibulu kalan don o don, o bɛna an dɛmɛ an ka to jalakibaliya ani jɛlenya kɔnɔ nin diɲɛ jugu, tolilen in kɔnɔ. A b’an dafa fana waajuli kama.—Fil. 2:15; 2 Tim. 3:17.
3 Ka taa Alabatoso la, o tun ye Yesu deliko ye. Yen barow tun bɛ kɛ Sɛbɛnniw kɔnɔkuma kan. (Luka 4:16) Siga t’a la k’o ye barika don Yesu la ka gɛlɛyaw kun minnu tun bɛna a sɔrɔ. Alako kalan min bɛ di an ma jɛkulu ka lajɛw waati la ani an bɛ ɲɔgɔn jijali min kɛ dannaya la, olu fana bɛ fanga di an ma. (Rom. 1:12) An ni balimaw bɛ ɲɔgɔn dalajɛ min kɛ, o b’an dɛmɛ ka bi diɲɛ don labanw gɛlɛyaw kun. (Heb.10:24, 25) Ka na lajɛw bɛɛ la, yala hali bi o ye aw deliko ye wa?
4 Kumakan fiyɛlen b’a fɔ an ye ko cidenw ye kibaru duman fɔ “don o don, ka u to Alabatosoba kɔnɔ ani mɔgɔw ka duw kɔnɔ.” (Kɛw. 5:42) Hali n’an tɛ se ka waajuli kɛ don o don waajuli la, yala dɔgɔkun o dɔgɔkun, an bɛ se k’an sen don cidenyabaara la wa? Siga t’a la, n’an b’o kɛ, dɔ bɛna fara an seko kan Ala ka Kuma walawali la, ani laala k’an to Bibulu tiɲɛ fɔli la mɔgɔw ye, an bɛna ko dumanw sɔrɔ waajulikɛyɔrɔ la minnu bɛ dusu don an kɔnɔ.
5 Kira Daniɛl ye baara kɛ Jehowa ye “tuma bɛɛ” a ka diɲɛnatigɛ bɛɛ kɔnɔ. A ye dugawu caman sɔrɔ o kɛli la. Ka Jehowa deli tuma bɛɛ, o tun y’a deliko dɔ fana ye. (Dan. 6:10, 16, 20) O cogo kelen na, n’an b’an ɲɛsin Jehowa ma tuma bɛɛ, k’a deli ni kɔnɔnajɛya ye, a bɛna duba an ye ka hakili senu di an ma. (Luka 11:9-13) Ka tɛmɛ o bɛɛ kan, Jehowa bɛ gɛrɛ an na, ani a b’a to an ka jɛɲɔgɔnya ɲuman don an ni a cɛ. (Zab. 25:14; Yak. 4:8) Aw ma dɔn o ye dugawuba ye! O la sa, an bɛɛ k’an timinandiya walisa ka deliko ɲumanw to an na Alako ta fan fɛ, ani an ka dugawubaw sɔrɔ ka bɔ Jehowa yɔrɔ.
[Study Questions]
1. Deliko minnu b’an na Alako ta fan fɛ, mun na a nafa ka bon an ka jateminɛ kɛ olu kan?
2. Ni an bɛ Bibulu kalan don o don, o b’an nafa cogo jumɛn na?
3. Ni an bɛ taa tuma bɛɛ lajɛw la, an bɛ nafa jumɛnw sɔrɔ o la?
4. Ni an bɛ bɔ forobaara la dɔgɔkun o dɔgɔkun, o b’an nafa cogo jumɛn na?
5. Mun na ka Jehowa deli tuma bɛɛ o nafa ka bon kosɛbɛ?