Kalanden dɛmɛ ka Jehowa waleɲumandɔn a ka mankutuw la minnu ɲɔgɔn tɛ
1 An bɛ min kɛ an ka cidenyabaara kɔnɔ, o ka ca ni Bibulu tiɲɛkumaw kalan kɛli ye mɔgɔw kun. An bɛ mɔgɔw dɛmɛ walisa mankutu minnu bɛ Jehowa la olu ka diya u ye kosɛbɛ bawo o mankutuw ye mankutu ɲumanbaw de ye. Ni tiɲɛ fɔra mɔgɔ kɔnɔnajɛlen ye Jehowa ko la, o bɛ don u la kosɛbɛ k’u bila ka yɛlɛmaw don u ka ɲɛnamaya kɛcogo la walisa u “taama cogo ni Matigi [Jehowa] cogo ka bɛn, ani . . . ka a diyaɲeko kɛ tuma bɛɛ.”—Kol. 1:9,10; 3:9,10.
2 Gafe kura min bɛ kɛ ka mɔgɔw kalan Bibulu la: Gafe Qu’enseigne la Bible ? bɛ Jehowa mankutuw jira mɔgɔw la, a bɛ o kɛ kabini tila fɔlɔ la. Tila fɔlɔ bɛ ɲininkali ninnu jaabi di: Yala Ala b’a janto an na tiɲɛ na wa? Ala bɛ cogo di?, ani Yala mɔgɔ bɛ se ka gɛrɛ Ala la wa? Tila fɔlɔ b’i sinsin a kan ko Jehowa ye Ala senuma ye (d. 10), a ka tilennenya ni a ka hinɛ (d. 11), a ka kanuya (d. 13), a ka sebagaya (d. 16), ani a ka makari, a ka ɲumanya, yafa ka di a ye, a bɛ muɲu, ani kantigi don (d. 19). Dakun 20nan b’a bakuru fɔ ko i bɛ fɛn caman kalan Jehowa ko la ka taa a fɛ cogo min na, a bɛ kɛ ɲɛnama ye i ɲɛkɔrɔ ka taa fɛ o cogo la, ani i b’a faamu ka taa a fɛ ko kun b’a la e k’a kanu ani ka i magɛrɛ a la.
3 Cogo di an bɛ se ka baara kɛ ni gafe Qu’enseigne la Bible ? ye walisa ka kalanden dɛmɛ a ka gɛrɛ Jehowa la? Dakun min sinsinnen bɛ Ala mankutu dɔ kan, ni an y’o kɛ kaban, an bɛ se ka kalanden ɲininka, “Jehowa yɛrɛbakun bɛ cogo di nin yɔrɔ ka fɔ la?” walima “Nin b’a jira cogo di ko Ala bɛ a mago don e yɛrɛbakun na?” Ni tuma dɔw la an bɛ o ɲininkali suguw kɛ kalan senfɛ, an bɛ kalandenw kalan hakilijakabɔ la u ka fɛn kalanta kan ani an b’u dɛmɛ walisa mankutu ɲumanba minnu bɛ Jehowa la olu ka diya u ye ka taa a fɛ.
4 Tiiri ye yɔrɔ min lamini Tila laban na baara kɛ ni o ye: Yɔrɔ min tɔgɔ ye ko “Ce que la Bible enseigne”, ni a bɛ tila labanyɔrɔ na, a ɲini kalanden fɛ a ka ɲɛfɔli kɛ o kɔnɔna yɔrɔ kelen-kelen kan a yɛrɛ ka ɲɛfɔcogo la. Bibulu tɛmɛsira kofɔlenw jira a la. Walisa i k’a dɔn min bɛ kalanden dusukun na, tuma dɔw la i bɛ se k’a ɲininka “Bibulu bɛ min fɔ nin yɔrɔ kan, e hakilila ye mun ye o ko la?” Ni an bɛ o kɛ, an tɛ dan sinsinni dɔrɔn ma gafe tila yɔrɔ kolomaw kan, nka fana an b’a faamu cogo jɛlen na, kalanden dalen bɛ min na tigitigi. O bɛ kalanden dɛmɛ a ka jɛɲɔgɔnya don a ni Jehowa cɛ.