An ka cidenyabaara—Baara min b’a jira ko an bɛ hinɛ
1 Yesu y’a kɔlɔsi ko mɔgɔ minnu tun bɛ ka a ka kuma lamɛn, olu sɛgɛnnen tun bɛ. U jigi tigɛlen tun bɛ fana. U tun bɛ iko gɛnbaga tɛ saga minnu na. (Mat. 9:36) Yesu y’u kalan Jehowa ka siraw la, k’u dusu saalo, k’u dɛmɛ alako ta fan fɛ. A y’o bɛɛ kɛ ni kanuya ani tin ye. Yesu tun bɛ kow kɛ cogo min na, ni an b’an hakilijakabɔ o kan, o bɛna an dɛmɛ ka miiri iko ale tun bɛ miiri cogo min na. Mɔgɔw hinɛ bɛ don an na fana, iko mɔgɔw hinɛ tun bɛ a la cogo min na. O la sa, ni mɔgɔw hinɛ b’an na, o bɛna ye ka jɛya an ka cidenyabaara kɔnɔna na.
2 Mɔgɔ minnu tun jigitigɛlen bɛ bawo dɛmɛ sɔrɔcogo si tun tɛ u bolo, ni o mɔgɔ suguw tun gɛrɛla Yesu la, Yesu kɛcogo tun ye min ye ka ɲɛsin o mɔgɔw ma, e ka waati ta ka miiri o la. (Luka 5:12, 13; 8:43-48) Mɔgɔ minnu tun mago bɛ dɛmɛ kɛrɛnkɛrɛnnen na, Yesu tun bɛ olu fana ka cogoya jate. (Mar.7:31-35) A tun bɛ mɔgɔw dusukunnataw dɔn. A tun b’a jira ko a bɛ hami u ko la. Yesu tun tɛ mɔgɔw minɛ u yecogo fɛ. (Luka 7:36-40) Iko mɔgɔw hinɛ bɛ an ka Ala la cogo min na, Yesu y’a jira k’o hinɛ kelen de bɛ ale fana na.
3 Mɔgɔw “hinɛ donna a la”: Yesu m’a ka cidenyabaara kɛ wajibiko dɔrɔn de ye. Mɔgɔw “hinɛ donna a la.” (Mar. 6:34) O cogo kelen na bi fana, an tɛ ka cikan dɔrɔn lase mɔgɔw ma, nka an bɛ k’a ɲini ka mɔgɔw de kisi. Mɔgɔw de nafa ka bon. An k’a ɲini k’a faamu mun na kokɛcogo sugu dɔ bɛ mɔgɔw la. Mun na mɔgɔw jɔrɔlen bɛ? Walima mun na u kɔnɔnafililen bɛ? Yala u ka diinɛ ɲɛmɔgɔw de y’u kɛ bolokɔfɛ mɔgɔw ye, k’u lafili fana wa? Ni an b’a jira ko an bɛ mɔgɔw kanu tiɲɛ na, o bɛ se ka u bila u ka kibaru duman lamɛn.—2 Kɔr. 6:4, 6.
4 N’an bɛ hinɛ mɔgɔw la, o bɛ u dusukun minɛ. An ka misali dɔ ta. Muso dɔ denmusonin banna k’a si to kalo saba la. Jehowa Seere fila nana a ka da kɔnkɔn tuma min na, muso y’u ladon so kɔnɔ. Kun minnu na Ala y’a to tɔɔrɔ ka kɛ, Jehowa Seerew bɛ ɲɛfɔli min di o ko kan, muso tun b’a fɛ ka o kumaw de sɔsɔ. Nka, muso y’a fɔ kɔfɛ ko: “U ye ne lamɛn. Ne hinɛ donna u la. U taatuma selen, ne ni tun lafiyara kosɛbɛ, fo ne sɔnna u ka segin ka na siɲɛ wɛrɛ.” I bɛ mɔgɔ minnu ye i ka cidenyabaara kɔnɔna na, yala i b’i jija k’a jira k’u hinɛ b’i la wa?
5 Ni mɔgɔw hinɛ bɛ to ka don an na, o bɛna an bila ka mɔgɔw dusu saalo tiɲɛ na. O kɛli bɛ nɔɔrɔ da “makari Fa ni dusu saaloli bɛɛ tigi” Jehowa kan.—2 Kɔr. 1:3.