An k’a jira mɔgɔw la ko an bɛ u fɛ —An ka kɛ mɔgɔw ye minnu bɛ kɔlɔsili kɛ
1 K’a dɔn mɔgɔw mago bɛ fɛn minnu na kɛrɛnkɛrɛnnenya la, ani ka se k’u dɛmɛ, Jehowa Ala ani Krista Yesu bɛ se o la kosɛbɛ. (2 Til. 16:9; Mar. 6:34) An ni mɔgɔ minnu bɛ bɛn an ka cidenyabaara la, ni an bɛ olu mago ni u haminankow dɔn, an bɛna se ka kibaru duman fɔ ka bɛn o kow ma.
2 An ka fɛn bɛɛ kɔlɔsi hali fɛn fitininw: Yesu tun bɛ se filɛli la, walima a tun bɛ mɔgɔw kɔlɔsi. (Mar. 12:41-43; Luka 19:1-6) Ni an fana donna so dɔ kɔnɔ, an k’a filɛ ni fɛnw bɛ yen minnu bɛ so cɛɲɛ, ni olu bɛ se k’a jira an na o sokɔnɔmɔgɔw ka diinɛ ye min ye. An k’a filɛ sɛbɛnni minnu bɛ mobiliw kan, walima tulonkɛfɛn minnu bɛ du kɔnɔ, o bɛna a to an bɛ cogow sɔrɔ ka kibaru duman fɔ u ye ka ɲɛ. A bɛ ten fana ni an donna duba dɔ kɔnɔ, an foli kɛtɔ k’a lajɛ mɔgɔw bɛ ka fɛn minnu kɛ. O cogo la, an bɛ se k’a dɔn, an ka kan ka min fɔ u ye min bɛna diya u kelen-kelen bɛɛ ye.
3 Mɔgɔ kɛcogo ani a ɲɛda bɛ cogoya min na fana, o bɛ se k’a tigi dusukaunnata jira. (Nt. 15:13) I b’a sɔrɔ a diyanyemɔgɔ dɔ ka saya y’a kɛ a mago bɛ dususaalo la. Walima i b’a sɔrɔ bɔnɛko dɔ binna a kan, min b’a to a mago bɛ dususaalo la. Ni an bɛ Bibulu tɛmɛsira dɔw ta ka kalan a ye minnu bɛ bɛn a ka ko ma, o bɛ se ka diya a ye kosɛbɛ. (Nt. 16:24) Yala mɔgɔ dɔ girinbagatɔ bɔra so kɔnɔ wa? Walima den kasibagatɔ dɔ de bɛ a bolo wa? O ko suguw la, a ka fisa an ka fɛrɛ tigɛ walisa an ka se ka na waati wɛrɛ la. Ni an b’a jira a tigi la ko an bɛ a faamu, ani ni an b’a jira ko an bɛ ‘hinɛ’ o b’a to o tigi k’an lamɛn, ni an seginna ka na siɲɛ wɛrɛ.—1 Pi. 3:8.
4 I ka ɲɛfɔliw kɛ ka bɛn mɔgɔw mago ma: Ciden Paul y’a kɔlɔsi ko Atɛnɛ dugu kɔnɔ, sarakabɔlan dɔ bɛ yen min tun dabɔra “Batofɛn dɔnbali” kama. O ko ye Paul dɛmɛ a ka kibaru duman ɲɛfɔcogo la, bawo a ko: “Aw bɛ min bato k’a sɔrɔ aw ma a dɔn, ne bɛ o de kofɔ aw ye.” Ikomi Paul ye ɲɛfɔli kɛ ni gasi sigi ye, o ye o yɔrɔ mɔgɔ dɔw bila k’a u tulomajɔ Masaya kibaru duman la, ani ka kɛ dannabagaw ye fana.—Kɛw. 17:23, 34.
5 O cogo kelen na, ni an fana ye mɔgɔw ye minnu bɛ kɔlɔsili kɛ, o bɛna an dɛmɛ ka mɔgɔw magow dɔn, ka ɲɛfɔli kɛ ka bɛn o magow ma. I ka ɲininkaliw kɛ minnu bɛna dusu don i barokɛɲɔgɔn kɔnɔ k’a bila a ka kuma. Miiri Bibulu tɛmɛsiraw la minnu bɛna a dɛmɛ a ka kɛ kibaru duman fɛ ka t’a fɛ. (Nt. 20:5) Ni an bɛ kɔlɔsili kɛ, ani ni an b’a jira mɔgɔw la ko an bɛ u fɛ, o bɛna an dɛmɛ ka kibaru duman fɔ u ye ka ɲɛ.