Ka seereya kɛ an somɔgɔw ye—An bɛ o kɛ cogo di?
1 A bɛna kɛ nisɔndiya bɛɛ la belebele ye an bolo dɛ, k’a ye ko an bɛ mɔgɔ minnu kanu, anw ni olu bɛɛ jɛlen Jehowa ka bato la, an donna ɲɔgɔn fɛ diɲɛ kura kɔnɔ! O nisɔndiyako bɛ se ka kɛ tiɲɛ na, ni an bɛ seereya kɛ an somɔgɔw ye. Nka, walisa an ka seereya kɛ u ye cogo la min bɛ u nafa, fo an ka kɛ mɔgɔ faamuyalenw ye. Kafo lakɔlɔsibaga dɔ ye nin jateminɛ kɛ: “Mɔgɔ minnu bɛ nɔ bɔ kosɛbɛ o sira la, o ye mɔgɔw ye minnu bɛ seereya dɔgɔdɔgɔnin kɛ u somɔgɔw ye, ka a nege don u la walisa a ka diya u ye ka kunnafoni wɛrɛw sɔrɔ tiɲɛ ko la.” An dun bɛ se k’o kɛ cogo di?
2 Aw ka a nege don u la ka kunnafoni wɛrɛw sɔrɔ: Aw bɛ se cogo min na ka aw somɔgɔw bila u ka u mago don kibaru duman na, aw ka miiri kosɛbɛ o la. (Nt. 15:28) Aw somɔgɔw bɛ u mago don fɛn jumɛnw de la? U haminankow ye fɛn jumɛnw de ye? Kunko jumɛnw bɛ u da la? U bɛ u mago kɛrɛnkɛrɛnnen don barokun sugu min na, ni o ɲɛfɔlen bɛ sɛbɛn dɔ kɔnɔ, aw bɛ se ka o barokun jira u la. Walima Bibulu tɛmɛsira min bɛ kuma o kan, ni o tɛmɛsira bɛ se ka diya u ye, aw bɛ se ka o fɔ u ye. Ni aw somɔgɔw sigilen tɛ aw dafɛla la, aw bɛ se ka lɛtɛrɛ walima telefoni ci u ma, ka kuma o kow kan. An ka tiɲɛ kuma dan i n’a fɔ sumansi, k’a sɔrɔ an ma kunnafoniw di u ma ka a dama tɛmɛ. O kɔ fɛ, aw ka aw jigi da Jehowa kan walisa a ka o sumansiw falen.—1 Kɔr. 3:6.
3 Yesu tun ye jinɛ caman gɛn ka bɔ cɛ min na, a y’a fɔ o cɛ ye ko: ‘I ka taa so. Jehowa makarila i la ka koba minnu kɛ i ye, i ka olu bɛɛ lakali i somɔgɔw ye.’ (Mar. 5:19) Aw ka miiri o cɛ kɛnɛyaliko ye fɛn min kɛ a somɔgɔw la! Hali ni o kabako sugu ma i sɔrɔ, a ka ca a la aw bɛ baara minnu kɛ, walima aw denw bɛ baara minnu kɛ, aw somɔgɔw bɛ u mago don o kow la. Aw ye kalansen min kɛ Ala-ka-marako cidenyabaara kalanso la, walima aw taara kafo ka jamalajɛ min na, walima aw taara Betɛli lajɛli min kɛ, walima ko ɲɛnama min dɔ ye aw sɔrɔ, o kow bɛɛ bɛ se ka sira dayɛlɛ aw ye walisa aw ka fɛn wɛrɛw fo u ye Jehowa ni a ka jɛkuluba ko la.
4 Aw ka kɛ mɔgɔ faamuyalenw ye: Ni aw bɛ ka seereya kɛ aw somɔgɔw ye, aw ka aw yɛrɛ minɛ walisa aw kana fɛn caman fɔ u ye yɔrɔnin kelen. An balimakɛ dɔ hakili jiginna waati la, waati min na a tun ye Bibulu kalan daminɛ. A sɔnna a ma ko: “Ne tun bɛ fɛn o fɛn kalan Bibulu kɔnɔ, ne tun bɛ don ɲɛfɔlibaw la, k’olu kelen-kelen bɛɛ fɔ ne ba ye, lɛrɛ caman kɔnɔ, dan tun tɛ minnu na tun. Tuma caman na, o nana ni sɔsɔlibaw ye, kɛrɛnkɛrɛnnenya la, ne ni n fa cɛ.” Hali ni aw somɔgɔ dɔ y’a jira ko cikan min bɛ Bibulu kɔnɔ, o ka di a ye, aw ka jaabi di a ma, cogo la min b’a to, a bɛ diya a ye tuma bɛɛ ka dɔ dɔn ka fara a ka dɔnniya kan. (Nt. 25:7) Aw ka a bonya, ka ɲumanya sirataama a fan fɛ, ka muɲu a kɔrɔ tuma bɛɛ, i n’a fɔ aw b’a kɛ cogo min na cidenyabaara la, ni aw bɛ ka kuma mɔgɔw fɛ, aw tɛ minnu dɔn. —Kol. 4:6.
5 Waati kɛrɛnkɛrɛnnen dɔ la, Yesu somɔgɔw tun miirila ko a hakili wulila. (Mar. 3:21) Nka, u dɔw kɛra dannabagaw ye kɔ fɛ. (Kɛw. 1:14) Siɲɛ fɔlɔ min na, aw b’a ɲini ka tiɲɛ kuma fɔ aw somɔgɔw ye, ni u ma sɔn, aw kana a to o ka aw lajɔ. Aw somɔgɔw ka ko bɛ se ka yɛlɛma, olu yɛrɛ fana bɛ se ka yɛlɛma. Aw ka taga a fɛ ka sira ɲini walisa ka kuma u fɛ fɛn dɔ kan min bɛ se ka a nege don u la ka kunnafoni wɛrɛ sɔrɔ. Aw bɛ se ka nisɔndiya sɔrɔ k’u dɛmɛ u ka a daminɛ ka taama sira kan, sira min bɛ taa mɔgɔw bila ɲɛnamaya la.—Mat. 7:13, 14.
[Study Questions]
1. Ni an bɛ ka seereya kɛ an somɔgɔw ye, mun na a ka kan an ka kɛ mɔgɔ faamuyalenw ye?
2. Ka an mago don an somɔgɔw la ni kɔnɔnajɛya ye, o bɛ se cogo di ka a nege don u la ka kunnafoni wɛrɛw sɔrɔ tiɲɛ ko la?
3. An somɔgɔw bɛ u mago min don anw na, o bɛ sira dayɛlɛ an ye cogo di ka seereya kɛ u ye?
4. Ni an bɛ ka seereya kɛ an somɔgɔw ye, an ka kan ka an yɛrɛ minɛ walisa an kana bin jan jumɛnw kɔnɔ?
5. Ni an bɛ ka seereya kɛ an somɔgɔw ye, ni u ma sɔn, an ka kan ka mun kɛ?