Ala-ka-marako Cidenyabaara Kalanso Dalafɔ-seginnkanni

Ɲininkali ninnu jaabiw bɛna kɛ dalafɔ ye Ala-ka-Marako Cidenyabaara kalanso ka lajɛ la, o min bɛna kɛ Desanburukalo tile 27nan dɔgɔkun kɔnɔna na, san 2004. Kalan lakɔlɔsibaga bɛna seginnkanni ɲɛminɛ sanga 30 kɔnɔ. O seginnkanni bɛna sinsin kalanw kan minnu kɛra k’a ta Sɛtanburukalo tile 6 ka na a bila Ɔkutɔburukalo tile 24nan na, san 2004. [Kɔlɔsili: Ni ɲininkali dɔ kɔ fɛ, sinsin yɔrɔ ma fɔ, i wajibiyalen bɛ ka i yɛrɛ ka ɲininiw kɛ walisa ka jaabiw sɔrɔ.​—École du Ministère mafilɛ ɲ. 36-7.]

JƐMU KƐCOGO ƝUMANW

1. Walisa ka lamɛnbagaw bila u ka u mago don barokun dɔ la, o kɛcogo bɛɛ la fisama dɔ ye jumɛn ye? [be ɲ. 218 d. 3] A jira ko baro bɛ u kun kan, ko barokun ɲɛsinnen bɛ u kunkow, u magow ma, walima u ka ɲininkaliw ma. An ka kan k’a jira k’a jɛya ko an bɛna an sinsin barokun yɔrɔ kɛrɛnkɛrɛnnenw kan. Walisa an ka se k’o kɛ, fo an ka an labɛn koɲuman.

2. Fɛn duuru fɔ minnu bɛ kuma kuncɛ cogo ɲuman jira? [be ɲ. 220 d. 4–ɲ. 221 d. 4] Walisa kuma kuncɛ cogo ka ɲɛ (1) baro bɛ kuncɛ ni kuma min ye o ni barokun ka kan ka ɲɔgɔn minɛ, (2) o ka kan k’a jira lamɛnbagaw la u ka kan ka min kɛ, (3) o ka kan ka dusu don u kɔnɔ u k’o kɛ, (4) a ka kan ka fɔ cogo jɛlen na, siga si tɛ min faamuyali la, ani (5) a janya ka kan ka bɛn.

3. An bɛ se k’a dɔn cogo di ko an bɛ kuma minnu fɔ, ko olu ye tiɲɛ ye? [be ɲ. 224 tiiri kɛlen bɛ ka sɛbɛnni minnu lamini] An ka kan (1) ka an yɛrɛminɛ walisa an kana jaabi di ni dalilu tɛ an bolo an bɛ se k’an sinsin min kan k’a jira k’o kumaw ye tiɲɛ ye, (2) an ka kuma sinsin Bibulu ‘kuma kɛnɛ’ kan, (3) an ka ɲininiw kɛ, (4) jateden minnu dilenw bɛ ani ko minnu kɛra, an ka kan k’a sɛgɛsɛgɛ fɔlɔ walisa ka da a la k’o fɛnw ye tiɲɛ ye. O kɔ fɛ, an bɛ se ka fɛnw fɔ ka fara an ka kuma kan, k’a sɔrɔ an ma olu fɔ k’a dama tɛmɛ. (2 Tim. 1:13)

4. An bɛ an ka kuma ɲɛfɔ cogo min na lajɛw la, an bɛ se ka da a la cogo di ko o b’a jira ko jɛkulu jɔyɔrɔ min bɛ iko ‘tiɲɛ samasen ni an sinsinyɔrɔ,’ ko o ko ka bon an bolo kosɛbɛ? (1 Tim. 3:15) [be ɲ. 224 d. 1-4] Walisa ka tiɲɛ kɔkɔrɔdon, an ye Bibulu tɛmɛsira minnu sugandi walisa ka baara kɛ ni u ye, an ka kan ka olu kɔrɔ dɔn. Sɛbɛnniw kɛra hukumu min kɔnɔ, ani u sɛbɛnna kun min na, ni an bɛ o kow jateminɛ, an ‘nɔrɔlen bɛ to tiɲɛkumaw na.’ [LK (Ti. 1:9) An bɛ ɲɛfɔli kɛ tuma min na, ni an bɛ an ka kumaw sinsin ‘Kuma kɛnɛw’ kan, ni an bɛ baara kɛ fana ni sɛbɛnw ye minnu dilanna jɔnkɛ dannamɔgɔ hakilima fɛ, ka tila ka a jira o tɛmɛsiraw bɛ se ka waleya cogo min na, o tuma na an ka kumaw bɛ kɛ tiɲɛ ye.

5. Ni an bɛ kuma bi kow kan, ni an bɛ segin mɔgɔ dɔ ka kuma kan, ani ni an bɛ ko dɔ lakali, an bɛ se ka Ntalenw 14:15 sirataama cogo di? [be ɲ. 225 d. 1] O kunnafoniw bɔra yɔrɔ min na, walima u tara ka bɔ yɔrɔ min na, o ka kan ka kɛ yɔrɔ jɔnjɔn ye. Ni an bɛ k’a sɛgɛsɛgɛ ni o kunnafoniw ye tiɲɛ ye, an ka kan ka an yɛrɛ ɲininka nin na: Yala tiɲɛkuma don bi wa? O kuma bɔra yɔrɔ min na, yala o dɔnnen bɛ fɛn jɔnjɔn ye wa? Yala o kumaw bɛ se ka sɛmɛntiya fɛn jɔnjɔn wɛrɛw fɛ wa? Ni an sigalen bɛ a la ko kunnafoni dɔ tɛ tiɲɛ ye, an man kan ka baara kɛ ni o ye.

KALANSEN FƆLƆ

6. Waati min tɛmɛna Adama dali ni tufanaji nali cɛ, ni an b’a fɛ k’o waati jate k’a ta tufanaji ma ka jigin ka na Adama dali ma, an bɛ se k’o kɛ cogo di?] [si ɲ. 286 d. 12] O waati bɛ bɛn san 1 656 ma. O jiralen bɛ Jen. 5:3-29 ani 7:​6, 11 la. Mɔgɔ minnu tugura ɲɔgɔn kɔ k’a ta Adama ma ka na Nuhun na, olu fɔlen bɛ yen yɔrɔ la. Mɔgɔ fɔlɔ ye mɔgɔ filanan sɔrɔ san hakɛ min na, fo ka na a se mɔgɔ laban ma, o fɔlen bɛ.

7. Yesu ye a ka cidenyabaara daminɛ tuma min na, o bɛ se ka dɔn cogo di, ani dalilu jumɛn b’an bolo walisa an ka da a la ko a ka cidenyabaara bɛnna san saba ni tila ma tigitigi? [si ɲ. 291 d. 16] San 29 Krista tile la, o ye san ye sɔn kɛra min na tariku ka waati jate la. K’a fɔ ko o san ye Yesu ka cidenyabaara daminɛ ye, o sinsinnen bɛ Luka 3:1-3 kan ani tariku ka seereya jɛlen kan min bɛ Krista tile san 14 jira iko san min na Tibɛrɛ Sesar ye a ka masaya daminɛ. Ikomi Yuhana ka linjila bɛ kuma tɛmɛkanseli naani kan, o b’a jira ko Yesu ka cidenyabaara bɛnna san saba ni tila ma. (Yuh 2:13; 5:1; 6:4; 12:1; 13:1.)

8. (a) ‘Jerusalɛm ka sigi, ka jɔ kokura,’ o kuma fɔra tuma jumɛn? (b) Kabini o kuma fɔra, san joli tun ka kan ka tɛmɛ sanni Yesu ka bɔ iko Masiya? (Dan. 9:​24-​27) [si ɲ. 291 d. 18-​19] ‘Kuma fɔra ko Jerusalɛm ka sigi, ka jɔ kokura,’ o kɛra san 455 Kristatile ɲɛ. (Neh. 2: 1, 17) Dɔgɔkun 69 walima san 483 tun ka kan ka tɛmɛ sanni Yesu ka batise, ka mun ni hakili senu ye ka kɛ Masiya ye, san 29 Kristatile la, fonɛnɛ-makɔnɔ na.

9. Mun ni mun sen bɛ yafa-ɲini yɛrɛyɛrɛ la, n’o bɛ na ni anw ‘ni an balima cɛ bɛnni ye’? (Mat. 5:​23, 24) [w02 1/11 ɲ. 6 d. 1, 5] O ye ka sɔn a ma ko i ye kojugu kɛ, ka tila ka yafa ɲini. I ye tɔɲɔli min kɛ, ka i jija fana ka o ko ɲɛnabɔ. O fɛnw de sen bɛ yafa-ɲini yɛrɛyɛrɛ la. I ye mɔgɔ min hakɛ ta, o tigi fana ka kan ka sɔn i ka yafa ɲini na. I ye ko minnu labɛn walisa ka tɔɲɔko ɲɛnabɔ, a ka kan ka sɔn o fana na. (Mat. 18:21, 22)

10. Ala bɛ baara minnu kalifa an ma, olu kɛli ko la, 2 Masakɛ 13:18, 19 b’an kalan mun na? [w02 1/12 ɲ. 31 d. 1-2] Hali ni sira caman fɛ Jehowa bɛ barika don an na, a sigilen bɛ ni a ye fana an ka an jija. Ikomi masakɛ Joas dɛsɛra ka jijawale kɛ, a ye se min sɔrɔ a juguw kan kɛlɛ la, o ma caya. O sariyakolo kelen fana bɛ sirataama an kan. Ni baaraw dira an ma ka kɛ, an ka kan ka an jija ka baara kɛ ni timinandiya ye ani ni an dusukun bɛɛ ye, ka an ɲɛsin Jehowa ma walisa a k’an dɛmɛ, sanni an ka jɔrɔ gɛlɛyakow ni ko wɛrɛw la minnu bɛ se k’an bali ka an ka baaraw kɛ. (Esa. 35:3, 4)

DƆGƆKUN KƆNƆ BIBULUKALAN

11. Mun na Yahutuw tun bɛ se ka jufa di ‘siginfɛw’ ma walima k’a feere ‘dunanw’ ma, k’a sɔrɔ olu yɛrɛ tun tɛ sɔn ka o dun? (Dut. 14:21) Bibulu kɔnɔ, ‘siginfɛ’ tun bɛ se ka kɛ mɔgɔ ye min tɛ Israɛl den ye nka min tun tuubira ka don Yahutu diinɛ na. Siginfɛ tun bɛ se ka kɛ fana jamana wɛrɛ mɔgɔ ye min tun bɛ a ka ɲɛnamaya kɛ ka kɛnyɛ ni Israɛl jamana ka sariya sigilen jujɔw ye, k’a sɔrɔ a ma kɛ Jehowa batobaga ye. Dunanw ni siginfɛ minnu ma tuubi ka don Yahutu diinɛ na, Sariya fanga tun tɛ boli olu kan. O la sa, olu tun bɛ se ka baara kɛ ni jufa ye sira caman fɛ. Israɛl denw yamaruyalen tun don ka o bagan sugu di u ma walima k’o feere u ma. Nka, mɔgɔ min tun tuubira ka don Yahutu diinɛ na, ale tun sirilen bɛ Tɔn na, Tɔn min tun sinsinnen bɛ Sariya kan. Iko a jiralen bɛ cogo min na Levitike 17:10 la, a tun dagalen tɛ o mɔgɔ sugu ka bagan joli dun. [1, w04 15/9 ɲ. 26]

12. Kalansira jumɛn dilen bɛ an ma Dutɛrɔnɔmɛ 20:5-7 la? Mɔgɔw minnu bɛ hukumu kɛrɛnkɛrɛnnen dɔw kɔnɔ an man kan ka ɲinɛ olu kɔ, hali ni baara kɛta min b’an bolo, o nafa ka bon kosɛbɛ. [2, w04 15/9 ɲ. 27]

13. ‘Ka wugu walima ka wuguden minɛ juru kun kɔrɔ,’ mun na o bɛ se ka suma ni ‘ni dɔ minɛni’ ye’? (Dut. 24:6) Wugu walima wuguden bɛ mɔgɔ dɔ ‘ni’ jira, walima mɔgɔ ka dahirimɛ-ɲini-fɛn jira. Ka o fɛn dɔ la kelen minɛ, o bɛ se ka denbaya mumɛ bɛɛ bali u ka tile dumuni sɔrɔ. [3, w04 15/9 ɲ. 26]

14. Ikomi Israɛl denw tun ma yamaruya ka kɛn si dun, a kɔrɔ dun tun ye mun ye ko u tun bɛna ‘sagajigi kɛn’ dun? (Dut. 32:13, 14) Yan yɔrɔ la, kɛn ni a kɔrɔ don. A bɛ bagan kulu ka bagan bɛɛ la ɲuman de jira. O fɔcogo cɛɲi ɲɔgɔn jiralen bɛ nin Bibulu tɛmɛsira kelen kɔnɔ. A bɛ kuma ‘alikama kɔmɔkili kɛn’ ni ‘rɛzɛn joli’ kan. [5, w04 15/9 ɲ. 27]

15. Bi bi in na, Akan ka jurumu wale ni mun bɛ se ka suma ni ɲɔgɔn ye? (Jos. 7:1-26) [w86 15/12 ɲ. 20 d. 20] I na a fɔ Akan, kabini san 1919, waati ni waati, ‘wara farinma’ natabaw wulila Ala ka jamakulu cɛma, minnu taamana u yɛrɛ ka ɲɛngoya sira la. Kow sigilen bɛ cogo min na Ala-ka-marako sira la, u ma o fana jate. O natabaw tun b’a fɛ ka segin Babilonɛ ka kalansiraw ma. Jijukɔrɔsa cogo la, u y’a ɲini ka siga don ‘laban donw ko la,’ ka Jehowa Seerew ka baara sumaya. O mɔgɔ suguw tun ka kan ka gɛn ka bɔ jɛkulu kɔnɔ. (Kɛw. 20:29; 2 Pi. 3:3, 4; 2 Yuh. 10, 11)