An kana kɛ mɔgɔ ɲɛjurujanw ye

¹ A ka Kulunikan Waajuli senfɛ, Yesu ye an hakili jigin fɛn dɔ la min bɛ se ka nɔ bila an ka ɲɛnamaya bɛɛ la. A tun bɛ ka kuma ɲɛkisɛ bisiki dɔ de kan. A ko: ‘Ni i ɲɛkisɛ ka kɛnɛ, i farikolo bɛɛ bɛ kɛ yeelen na, nka ni i ɲɛkisɛ ka jugu, i farikolo bɛɛ bɛ kɛ dibi la.’ (Mat. 6:​22-​24) Ɲɛkisɛ min ka kɛnɛ, walima mɔgɔ min tɛ ɲɛjurujan ye, o tigi ɲɛ jɔlen bɛ kɛ fɛn kelen kan​—ka Ala sago kɛ​—an magoɲɛfɛnw si ɲinini tɛ kɛ a bolo jɔrɔ kun ye, fo ka a dama tɛmɛ. (Mat. 6:​19-​21, 24-​33) Mun bɛ se ka an dɛmɛ walisa an ka to ni ɲɛkisɛ ye min ka kɛnɛ, walima an kana kɛ mɔgɔ ɲɛjurujanw ye?

² Min b’an bolo, an k’a dege k’an wasa don o la: Sɛbɛnniw ka ko wajibiyalen dɔ ye ka i mago don i ka dukɔnɔmɔgɔw ka musaka la. (1 Tim. 5:8) Nka o kɔrɔ tɛ ko an wajibiyalen don ka fɛnw bɛɛ la ɲuman ani fɛn bɔlen-kuraw bɛɛ dɔrɔn de ɲini. (Nt. 27:20; 30:​8, 9) Sɛbɛnniw bɛ dusu don an na ko ni “dumuni ni finiw” bɛ an fɛ, an kana jɔn olu ma, an ka an wasa don olu la. Olu ye ɲɛnamaya fɛn wajibiyalenw ye. (1 Tim. 6:8; Heb. 13:​5, 6) Ni an bɛ o laadilikan mɛn, o bɛ se k’an dɛmɛ an ɲɛmajɔlen ka to kuntilenna ɲuman kan.

³ Hakilitigiya don an fɛ, ni an bɛ an yɛrɛ tanga wari-juruta ma min wajibiyalen tɛ, ni an tɛ bolofɛnw kɛ ka an yɛrɛ kun fa, walima ni an tɛ tugu kow kɔ minnu bɛ an ka waati ta ani an ka kan ka an mago don minnu na kosɛbɛ. (1 Tim. 6:​9, 10) An bɛ se ka o kɛ cogo di? Ni an bɛ a fɛ ka ko dɔ kɛ, an ka a filɛ delili kɔnɔ, ka miiri kosɛbɛ, ni o ko tɛ na ni tɔɲɔn ye alako ta fan fɛ. An ka a latigɛ ka alako kɛ an ka fɛn fɔlɔ ye an ka ɲɛnamaya la.​—Fil. 1:​10; 4:​6, 7.

⁴ Aw ka ɲɛnamaya kɛcogo ka nɔgɔya: Dɛmɛ wɛrɛ min bɛ walisa aw kana sama fɛnnadiya nɔfɛ o ye k’a ɲini k’aw ka ɲɛnamaya kɛcogoya nɔgɔya. Balimakɛ dɔ, min y’a ye ko a ka denbaya bɛ se ka jɛn fɛn dɔw kɔ, k’a sɔrɔ o tɛ u degun, o ye nin fɔ: “Sisan ne bɛ se ka ko caman kɛ ne balimaw ye jɛkulu kɔnɔ. Ne dalen bɛ a la kosɛbɛ ko Jehowa bɛ duba a batobaga bɛɛ ye minnu bɛ bato-sɛbɛ bila u yɛrɛ ka kow ɲɛ fɛ.” I tɛ taga a fɛ ka dugawu caman diya bɔ, i kɛtɔ ka i ka ɲɛnamaya kɛcogoya nɔgɔya i yɛrɛ bolo?

⁵ An mago bɛ a la ka an cɛsiri tuma bɛɛ, walisa an ka se ka an ban Sitanɛ na, ka an ban a ka diɲɛ na o min sinsinnen bɛ bolofɛnw sɔrɔli kan, ani an kana sɔn an ka dafabaliya ka se sɔrɔ an kan. Yanni an ka an ɲɛw labila fɛn bɛɛ filɛli la, an ka u jɔlen to Ala sago kɛli kan, ani jigiya nafama kan min bɛ an bolo, ni o ye ɲɛnamaya banbali ye.​—Nt. 4:​25; 2 Kɔr. 4:​18.

[Questions]

1. Ni a fɔra ko mɔgɔ dɔ ɲɛkisɛ ka kɛnɛ, o kɔrɔ ye mun ye, ani fana mun na o nafa ka bon?

2. Ala ka Kuma bɛ dusu don an na an ka magoɲɛfɛnw filɛ k’a bɛrɛkɛɲɛ cogo di?

3. Mun bɛ se ka an dɛmɛ an kana doni ta ka da an yɛrɛ kan?

4. Mun na an ka kan ka siraw ɲini walisa an ka ɲɛnamaya kɛcogoya ka nɔgɔya?

5. Mun na an mago bɛ cɛsiri la tuma bɛɛ, walisa an kana kɛ mɔgɔ ɲɛjurujanw ye?