Branch Letter

Masaya Weleweledala Kanulenw:

Koba don haali ka a fɔ siyaw bɛɛ ye ko “Jehowa de ye Ala ye. Ale de ye an da, an ma an yɛrɛ da. . . Aw ka barika da a ye ka a tɔgɔ tanu, k’a masɔrɔ Jehowa ka ɲi.” (Zaburuw 100:​3-5) Ɔwɔ, kun caman bɛ an bolo ka Jehowa fo ani ka a tɔgɔ tanu. A se bɛ an ye ka mɔgɔ o mɔgɔ wele, nisɔndiyaba don an bolo, ka olu bɛɛ wele ka na, u ka a ye ko Jehowa ka ɲi.

Min bɛ a jira ko a seba bɛ an ye ka o kɛ, o ye mɔgɔ hakɛ min nana Hakilijigin na san 2004 awirilikalo la. Senegali jamana na, mɔgɔ 2787 de nana. O hakɛ ye yen weleweledalaw hakɛ sigiyɔrɔma saba ye. Mali la, mɔgɔ 963 de nana. O ye yen weleweledalaw hakɛ sigiyɔrɔma naani ye. Ganbi jamana na mɔgɔ 469 de nana. O hakɛ ye yen weleweledalaw hakɛ sigiyɔrɔma saba ye. Gine Bisawo, mɔgɔ minnu nana o ye yen weleweledalaw hakɛ sigiyɔrɔma wɔɔrɔ ye. Ninnu ye dantigɛliw ye minnu bɛ dusu don mɔgɔ la dɛ! Mɔgɔ kura minnu nana o Hakilijigin ɲɛnajɛ la, Kibaru duman dɔnniya min danna olu dusukun na, yali aw bɛ ka ji don o kɔrɔ wa? Ni u tɛ ka na an ka lajɛ wɛrɛw la, yali an tɛ se ka a ɲini ka a dɔn kun min ye a to u sera ka na Hakilijigin na ani o kɔfɛ ka u dɛmɛ a nege ka kɛ u la ka Jehowa dɔn kosɛbɛ wa? An bɛ dusu don aw bɛɛ kɔnɔ, aw minnu ye Masaya weleweledalaw ye, ani denmisɛnw bɛɛ, aw ka Yesu ladege, ale min tun bɛ hinɛ mɔgɔw la, minnu ‘sɛgɛnnen tun bɛ, ni u jɛsɛnnen iko sagaw, ni gɛnbaga tɛ u la.’ (Matiyu 9:⁠36) An ka u kalan ‘u ka tugu Yesu ka ci fɔlen bɛɛ ko’ (Matiyu 28:20).

Nisɔndiya kun wɛrɛ min bɛ an bolo o ye ko sɔɔni an na kɛ ni an tɔgɔla so kura ye, kafoba jamalajɛ bɛ se ka kɛ yɔrɔ min na. Nin ye ko ɲumanba ye dɛ ka bɔ an ka Ala kanubaganci Jehowa yɔrɔ! A san caman filɛ nin ye, a negeba tun bɛ an na ka nin lajɛkɛyɔro ɲɔgɔn sɔrɔ. Sigiyɔrɔ 1370 bɛ se ka sɔrɔ an ka nin lajɛkɛyɔrɔ la. A kɛrɛw dayɛlɛnen bɛ. O bɛ a to fiɲɛ ka se ka tɛmɛ funteni tuma na. O kosɔn, siga tɛ a la ko an nisɔndiyalen na kɛ kafo ani kafoba jamalajɛw la, ka nafa bɛɛ bɔ kalan bolodalenw bɛɛ la.

Fɛn o fɛn kɛra walisa Masaya kuntilenna ka ɲɛtaa sɔrɔ, Jehowa ka taga a fɛ ka duba o ye.

An faralen ɲɔgɔn kan, a ka di an ye kosɛbɛ ‘an ka sɔrɔ Matigi ka baara caman kɛli la’, Ala ka marako san 2005 daminɛnen kɔnɔ.​—1 Kɔr. 15:58.

Aw balimaw,

Senegali Tɔn Bolofara