Mɔgɔ bɛ sara sɔrɔ a ka tɔɔrɔ muɲuli de la
1 ‘Aw na aw yɛrɛ niw kisi ni aw ye tɔɔrɔw muɲu.’ (Luka 21:19) Yesu ye kiraya kumaw minnu fɔ ‘diɲɛ in banni ko la,’ o dɔ de filɛ nin ye. Nin kumaw b’a jira k’a jɛya ko ni an b’a fɛ ka an ka dafalenya mara, an ka kan ka an yɛrɛ labɛn walisa an ka se ka kɔrɔbɔliko caman muɲu. Nka, ni Jehowa ka barika bɛ an na, an kelen-kelen bɛɛ bɛ se ka ‘tɔɔrɔkow muɲu fo laban na, ka kisi sɔrɔ.’—Mat. 24:3, 13; Fil. 4:13.
2 Ni u bɛ an tɔɔrɔ, walima ni gɛlɛyaw bɛ an kan kɛnɛya ta fan fɛ, walima wariko gɛlɛyaw, olu ni dusukasi bɛ an ka don o don gɛlɛya an bolo kosɛbɛ. Nka hali o la, an man kan ka ɲinɛ abada ko Sitanɛ bɛ k’a ɲini ka an ka kantigiya tiɲɛ. Sitanɛ ye a fɔ ko an tɛ se ka kɛ kantigiw ye. Ni an sera ka tile kelen o tile kelen kɛ kantigiya la ni Jehowa ye, o bɛ kɛ an niyɔrɔ jaabi ye Sitanɛ ma, ale min ye kɔrɔbɔlikɛla ye. Ni an jijalen tora kɔrɔbɔliw kɔnɔna la, an bɛ “ɲɛjiw” minnu bɔn o senfɛ, Jehowa bɛ o “ɲɛjiw” filɛ koba ye, ani fana an ka kantigiya b’a nisɔndiya! Ni an y’a dɔn ko ɲinɛ ma kɛ an “ɲɛjiw” kɔ o bɛ dusu don an kɔnɔ.—Zab. 56:8; Nt. 27:11.
3 Gɛlɛyaw bɛ an saniya: Tɔɔrɔ bɛ se k’a jira ko limaniyaba tɛ an na walima ko fiɲɛn dɔ bɛ an na, i na a fɔ yada walima muɲubaliya. Sanni an k’a ɲini ka an yɛrɛ tanga tɔɔrɔw ma cogo la min bɛ Bibulu sariya kɛlɛ, an ka kan ka tugu Ala ka Kuma kɔ, o min bɛ an laadi ko an k’a to “tɔɔrɔ muɲuli ka a ka baara kɛ k’a dafa.” Mun na? Bawo ni an muɲuna gɛlɛyaw kɔnɔ ni limaniya ye, o bɛ an dɛmɛ walisa “an ka dafa ka kɔgɔ.” (Yak. 1:2-4) Tɔɔrɔ muɲuli bɛ se ka an dɛmɛ ka jogo ɲumanw sɛnɛ an yɛrɛ la. Ka kow kɛ ni hakili ye, k’i yɛrɛ bila tɔw nɔ na, ani ka makari, olu ye a jogo ɲuman dɔw ye.—Rom. 12:15.
4 An ka limaniya bɛ kɔrɔbɔ k’a ye fɛn sɛbɛ ye: Ni an muɲuna tɔɔrɔw kɔnɔ, an bɛ limaniya sɛbɛ sɔrɔ. O ye koba ye Ala ɲɛkɔrɔ. (1 Pi. 1:6, 7) O limaniya sugu bɛ an labɛn walisa an sabatilen ka to ni tɔɔrɔ wɛrɛw y’an sɔrɔ tuma min na. Ka tɛmɛ o bɛɛ kan, an b’a ye ko Ala sɔnna an na. O bɛ an ka jigiya kologɛlɛya, a bɛ kɛ ko sɛbɛ ye an bolo.—Rom. 5:3-5.
5 Tɔɔrɔ muɲuli bɛ sara min di ni a ka bon ni sara bɛɛ ye, o kofɔlen bɛ k’a jɛya Yakuba 1:12 kɔnɔ. A fɔra yen ko: ‘Kɔrɔbɔli bɛ kun mɔgɔ min na, o tigi ye dubaden ye, katuguni ni o tigi tilennen sɔrɔla kɔrɔbɔli kɔnɔ, Matigi ye ɲɛnamaya masafugula min layidu ta a kanubagaw ye, o tigi na o sɔrɔ.’ O la sa, an bɛɛ ka an yɛrɛ bɛɛ di Jehowa ma, an ka to o kɔnɔ, an dalen ka to a la ko a bɛna sara ɲumanba di “a kanubagaw ma.”