Don kelen jamalajɛ kɛrɛnkɛrɛnnen ka kalan bolodalen kura

¹ Kunnafoni caman bɛ sɔrɔ bi, minnu bɛ mɔgɔ dɛmɛ k’i sɔnkun to kɛnɛya la. O bɛ kɛ sababu ye ka mɔgɔ ka ɲɛnamaya diya a bolo, ka a kuntagala janya. Dusukun suguya min bɛ an na, o nafa ka bon kosɛbɛ ka tɛmɛ an sɔnkun ka kɛnɛya kan. O la sa, san 2003 ka don kelen jamalajɛ kalan bolodalen min bɛna daminɛ Sɛtanburukalo la, o kumakun bɛnnen bɛ dɛ! A kumakun tɔgɔ ye ko: “An ka baara kɛ Ala ye ni dusukun dafalen ye.” (1 Til. 28:9) An bɛ se ka sigi n’a ye ka kalan sugu jumɛn sɔrɔ o la?

² Kafo lakɔlɔsibaga bɛna jɛmukan di min tɔgɔ ye ko: “An ka tɔw dɛmɛ u ka baara kɛ Jehowa ye ni nisɔndiya ye.” Balima dɔw bɛna wele jama ɲɛ fɛ k’u ɲininka. U bɛna a jira ko mɔgɔ minnu b’a fɛ ka baara kɛ Jehowa ye, ni an bɛ u dɛmɛ ka dɔ fara u ka kanuya kan ka ɲɛsin kibaru duman ma, ani ni an bɛ Bibulu kalan kɛ u kun, o kow bɛ nisɔndiya lase an ma. An ka kumana welelen bɛna jɛmukan fɔlɔ min kɛ, o tɔgɔ ye ko: “An ka an dusukun lakana diɲɛ ɲagaminen kɔnɔ.” Siga t’a la ko o bɛna dusu don lamɛnbagaw bɛɛ kɔnɔ, k’u dusu saalo. Sɔgɔmada lajɛ bɛna kuncɛ ni batɛmu jɛmukan ye.

³ Wulada fɛ, jɛmu min tɔgɔ ye ko: “An ka bolo mɔɔnɔbɔ ka mɔgɔw dɛmɛ,” o bɛna kuma an ka mɔgɔ dɛmɛ kan. Bangebagaw bɛ se ka mun kɛ walisa ka u denw dusukun lakana ko juguw ma, ka u dɛmɛ u ka magɛrɛ Jehowa la? Jɛmukan min tɔgɔ ye ko “Aw y’aw denw dɛmɛ u ka nisɔndiya sɔrɔ Jehowa ko la,” o bɛna hakilila nafamaw di ka a jira o bɛ se ka kɛ cogoya min na.

⁴ Yala an bɛ ka nafa sɔrɔ Jehowa ka fɛɛrɛ tigɛlenw na, walisa an dusukun ka to kɛnɛya la, ani ka barika to a la alako ta fan fɛ wa? An ka kumana welelen ka jɛmukan laban bɛna sinsin fɛnba 4 kan an bɛ minnu kɛ don o don walisa an ka to kɛnɛya la alako ta fan fɛ. A ka jɛmukan tɔgɔ ye ko: “An ka dusukun dafalen mara an ka baara la Jehowa ye.” Ni an bɛ a kɔnɔnajɛya deliliw sɛbɛw kɛ, ka Ala ka kuma kalan, ka an timinandiya waajuli la, ka jɛ ka ko kɛ ni balima kerecɛnw ye, an bɛ waati joli ta olu kama ani an bɛ u minɛ ni cɛsiri jumɛn ye. Yala an bɛ se ka dɔ fara an ka ɲɛtaa kan nin kow ninnu dɔ la kelen na wa?

⁵ Jehowa bɛ ka nin welekan bila bɛɛ ma: ‘Aw y’aw dusukun dayɛlɛ kololi ma, ka aw tulo dayɛlɛ dɔnniya kumaw ma.’ (Ntal. 23:12) Aw k’a boloda kabini sisan ka na nin don in na min bɛna Bibulu dɔnniya caman di an ma. N’aw ye o kɛ, o bɛna aw kologɛlɛya ka taa a fɛ, walisa aw ka baara kɛ Jehowa ye ni dusukun dafalen ye, nisɔndiya kɔnɔ.