An k’an ka batokɛyɔrɔ minɛ koɲuman

¹ Jehowa Seerew ka jɛkuluw hakɛ ka ca ni 94 000 ye diɲɛ kɔnɔ. O jɛkuluw fanba bɛ u lajɛ Masaya So kɔnɔ walisa ka Bibulu kalan ani ka fara ɲɔgɔn kan Kerecɛnya sira la. Masaya So de ye bato senuma kɛyɔrɔ ye.

² Masaya so saniyali baarabolodalen: Baara min bɛ kɛ walisa ka Masaya So saniya, o ye an ka bato senuma kɔnɔko dɔ ye. Notre ministère gafe ɲɛ 61nan ko: “An balimaw ka kan k’a jate bonya ye ka Masaya So kɔkɔrɔdon ni u ka wari ye, ka baara kɛ walisa Masaya So ka kɛ yɔrɔ saniyalen ye, yɔrɔ min cɛ ka ɲi, min minɛnnen bɛ koɲuman fana. Masaya So kɔnɔna ni a kɛnɛmana ka kan ka Jehowa ka jɛkuluba jira cogo bɛnnen na.” Ikomi balimaw bɛ na Masaya So kɔnɔ siɲɛ caman dɔgɔkun kɔnɔ, o kosɔn an ka kan ka a saniya tuma bɛɛ, ka an mago don a la waati bɛɛ la fana. Tuma caman na, mɔgɔ minnu bɛ na jɛkulu walima jɛkuluw ka lajɛw la Masaya So kɔnɔ, olu de bɛ na u yɛrɛ ma walisa k’u jan to o baara la. Iko a tun bɛ kɛ cogo min na Bibulu sɛbɛnwaatiw la, bi fana Jehowa Seerew ka kan k’u timinandiya k’u ka batokɛyɔrɔ ‘labɛn ani k’a dilan.’​—2 Til. 34:10.

³ Masaya so saniyali dɔgɔkun o dɔgɔkun o baarabolodalen sɛbɛn ka kan ka gengen kunnafoni walan kan. Gafe kuluw bɛɛ ka kan ka saniyali baara kɛ ka bɔ ɲɔgɔn kɔrɔ dɔgɔkun o dɔgɔkun. Fɛn minnu ka kan ka kɛ, olu ɲɛfɔlen bɛ sɛbɛn min kɔnɔ, gafe kalan kuluw bɛɛ ka kan k’u sinsin o sɛbɛn kan ka Masaya So saniya. Mɔgɔ minnu bɛ se ka u sen don Masaya So saniyali la walisa a ka kɛ yɔrɔ saniyalen ye, min minɛcogo ka ɲi, bonya bɛ olu bɛɛ bolo k’o kɛ. Ni bangebagaw bɛ u ka denmisɛnninw ɲɛminɛ, denw fana bɛ se k’u sen don Masaya So saniyali la. O cogo la, bangebagaw bɛ u dege u ka waleɲumandɔn jira o bonya ko la. Ni jɛkulu caman bɛ u lajɛ Masaya So kɔnɔ, u ka kan ka sɔn ka baara kɛ ɲɔgɔn fɛ cogo ɲɛnabɔlen na. O cogo la Masaya so saniyali baara tɛna kɛ mɔgɔ damadɔw dɔrɔn kan.

⁴ Baara minnu ka kan ka kɛ dɔgɔkun o dɔgɔkun, olu ɲɛfɔlen bɛ sɛbɛn min kan, o bɛ se ka gengen saniyalifɛnw marayɔrɔ la. O baaraw filɛ: Ka yɔrɔ furan, ka fenɛtiriw jɔsi, ka gɔngɔn bɔ sɛbɛndiyɔrɔ tabali kan, ka ɲamaw bɔ segiw kɔnɔ, ka yɔrɔw jɔsi, ani ka dungare susa ka nɔgɔ bɔ u la. Baara dɔw bɛ yen, olu tɛ kɛ siɲɛ caman i n’a fɔ baara tɔw. Olu ye ka gɔngɔn bɔ yɔrɔ misɛnninw bɛɛ la, ka sigilanw yɔrɔw bɛɛ jɔsi, ka iridow ko, ani ka fifalimasinw ni kuranlanpaw bɛɛ jɔsi. Saniyalifɛnw i n’a fɔ safunɛ ani fɛn wɛrɛ minnu bɛ ta ka yɔrɔ saniya, olu ka kan ka mara yɔrɔ la denmisenninw bolo tɛ se ka se yɔrɔ min na. Sɛbɛnni ka kan ka kɛ o yɔrɔ la walisa k’u jira cogo jɛlen na. Baara bɛ kɛ ni o fɛn kelen-kelen bɛɛ ye cogo min na, o fana ka kan ka sɛbɛn cogo jɛlen na.

⁵ Fɛn min nafa ka bon kosɛbɛ, o ye kojugu walima farati fosi kana kɛ Masaya So la. (Dut. 22:8) O kosɔn, jateminɛ ka kan ka kɛ fɛn minnu kan tuma bɛɛ walisa ka kasaarakow bali, olu ɲɛfɔlen bɛ ɲɛ 4nan na.

⁶ Masaya So ladonni: Masaya So ladonniko bɛ maakɔrɔw kulu de kan. Tuma caman na, maakɔrɔ walima cidenyabaarakɛla magana dɔ bɛ sugandi walisa ka o baara kɛcogo labɛn. Baara minnu bɛ kɛ Masaya So la, a bɛ o ko labɛn don o don walisa Masaya So ka to yɔrɔ saniyalen ye min minɛcogo ka ɲi. Mɔgɔ mago bɛ fɛn minnu na walisa ka o baara kɛ, a bɛ fɛɛrɛ kɛ o fɛnw ka sɔrɔ yen min bɛ bɔli kɛ. A nafa ka bon faratiko si kana sɔrɔ Masaya So ni a lamini na. Ni jɛkulu caman bɛ u lajɛ Masaya So kelen kɔnɔ, maakɔrɔw kuluw bɛ jɛkulunin dɔ sigi min bɛna Masaya So ni a lamini ladonniko labɛn. O jɛkulunin bɛ baara kɛ maakɔrɔw kuluw ka ɲɛmɔgɔya jukɔrɔ.

⁷ Masaya So bɛ sɛgɛsɛgɛ siɲɛ kelen san kɔnɔ ka kɛɲɛ ni cogo sigilen ye. A ko bɛ maakɔrɔw de kan ka fɛɛrɛw tigɛ walisa yɔrɔ minnu ka kan ni dilanni ye, o yɔrɔw ka dilan. A bɛ se ka ɲini weleweledalaw fɛ u ka dɛmɛ don walisa ka yɔrɔ tiɲɛnenw dilan, ka Masaya So ladon walisa a ka to minɛcogo ɲuman na. Bɛɛ ka kan ka kɔlɔsili kɛ walisa ni yɔrɔ fitinin dɔ bɛ yen min ka kan ni dilanni ye, o ka se ka kɛ joona. Ni kafo lakɔlɔsibagaw nana tuma min na jɛkulu kɔnɔ, u bɛ se k’a jira maakɔrɔw la u ka kan ka fɛɛrɛ minnu tigɛ teliya la Masaya So ladoncogo ɲuman kama.

⁸ Ni maakɔrɔw y’a ye k’u mago bɛ laadilikan ni dɛmɛ na Masaya So ladoncogo ɲuman ko la, u bɛ Tɔn bolofara min ka bolo kan, u bɛ se ka u ɲɛsin o ka Masaya So jɔliko baarada ma.

⁹ Baara bɛ kɛ ni jɛkulu ka warikɛsu ye ni hakilitigi ye: Masaya So ni a masurunna ladonni baara fanba bɛ kɛ mɔgɔw fɛ minnu bɛ na u yɛrɛ ma k’o baara kɛ fu. U bɛ o baara min kɛ fu, o bɛ u ka kanuya jira, ka caman bɔ Masaya So ladonni sɔngɔ la. Ni a bɛnnen don ka baarakɛda dɔ ka dɛmɛ ɲini walisa ka baara dɔw kɛ i n’a fɔ ka bubagaw silatunun ka bɔ o yɔrɔ la, walima ka jiribaara walima masɔnbaara dɔ kɛ, maakɔrɔw bɛ wele bila baarakɛdaw ma. Baara minnu ka kan ka kɛ, ani u mago bɛ baarakɛminɛn minnu na, u bɛ kɔn k’o baara ni o baarakɛminɛnw pereperelatigɛ koɲuman sɛbɛn dɔ kan. U bɛ o sɛbɛn ɲɔgɔn dɔ kɛ ka o ci baarakɛda kelen-kelen bɛɛ ma walisa u bɛɛ lajɛlen ka u ka baara sɔngɔ fɔ fɛn kelen kan. Ni o baarakɛdaw ye u ka baara ani u ka fɛnw sɔngɔ bila ka na maakɔrɔw ma, maakɔrɔw b’a lajɛ baarakɛda min ka baara sɔngɔ ka nɔgɔn ka tɛmɛ a tɔw bɛɛ kan. U bɛ o baarakɛda sugandi ka o baara kɛ. O ko kelen de bɛ kɛ hali ni balima dɔ de b’a fɛ ka o baara kɛ, walima ka baarakɛminɛnw feere maakɔrɔw ma wari hakɛ dɔ la.

¹⁰ Tuma caman lɛnpo tɛ sara Masaya Sow kunkɔrɔ, bawo u jɔra walisa ka kɛ batokɛyɔrɔ ye bɛɛ kama. Ni jɛkulu caman bɛ u lajɛ Masaya So kelen kɔnɔ, jɛkulunin min sigira Masaya So ladonniko kama, o tɛ jɛkuluw ka warikɛsu fara ɲɔgɔn kan ka kɛ fɛn kelen ye. U bɛ warikɛsuw to u danma, jɛkulu kelen-kelen bɛɛ ni a ka warikɛsu. Musaka min kɛra Masaya So la, o jɛkulunin bɛ o sɛbɛn kalo o kalo, k’o di maakɔrɔw kulu kelen-kelen bɛɛ ma. O cogo la maakɔrɔw bɛ kunnafoni sɔrɔ tuma bɛɛ warikɛsu cogo ani musakaw kan. A ko bɛ maakɔrɔw de kan ka baara kɛ ni jɛkulu warikɛsu ye ni hakilitigiya ye.

¹¹ Masaya So ladonni ni a kurayali baara minnu ka bon kosɛbɛ: Jɛkulunin min sigira Masaya So ladonniko kama, ni a y’a ye ko baara ɲɛnama dɔ ka kan ka kɛ Masaya So la, k’a da baara kan min bɛ kɛ a kɔnɔ, ani k’a da a ladon koɲuman kan, jɛkulunin bɛ maakɔrɔw kulu ɲininka u hakilinata la o ko kan. Ni a latigɛra ko dɔ ka kan ka fara Masaya So ladoncogo kan, walima ko baaraba ka kan ka kɛ Masaya So la walisa ka a kɛ kura ye, walima ko maakɔrɔw mago bɛ dɛmɛ wɛrɛ la min tɛ sɔrɔ jɛkuluw kɔnɔ minnu bɛ u lajɛ o Masaya So kɔnɔ, maakɔrɔw bɛ Tɔn bolofara min ka bolo kan, u bɛ u ɲɛsin o ka Masaya So jɔliko baarada ma. O kodɔnna ninnu bɛna hakilila nafamaw di u ma, ka baara kɛta ɲɛminɛ. Ni wariba de ka kan ka bɔ o baara kunkɔrɔ, a musakaw bɛ bɛn wari hakɛ min ma tigitigi, o ka kan ka jate. O kɔfɛ, maakɔrɔw bɛ bɛnkan dɔ labɛn ka jɛkulu ladɔnniya o la, k’a ɲininka ni a jɛnna ni o ye.​—San 1994 Feburuyekalo Le ministère du Royaume ɲininkaliw jaabi yɔrɔ lajɛ.

¹² Bonyaba don an bolo dɛ ka se ka an lajɛ Masaya So kɔnɔ! An kana an ka lajɛw kɛ bolokɔfɛko ye abada, walima k’u mafilɛ i n’a fɔ ko minnu nafa man bon. O ko sigira walisa ka dusu don an kɔnɔ. An bɛɛ bɛ se ka an niyɔrɔ kɛ walisa o kow ka taaɲɛ sɔrɔ, an kɛtɔ ka an sen don Masaya So ladonni na. O bɛ bato lakika sankɔrɔta, ka bonya da Jehowa tɔgɔ kan. An bɛɛ timinandiyalen ka to walisa an ka batokɛyɔrɔ ka to minɛcogo ɲuman na.

[Study Questions]

1. Masaya So kun ye mun ye?

2. Mun na a nafa ka bon Masaya So ka kɛ yɔrɔ saniyalen ye min cɛ ka ɲi, min bɛ se ka jira mɔgɔ la?

3. Masaya So saniyali baara bɛ se ka labɛn cogo jumɛn na? Jɔni bɛ se k’u sen don o baara la?

4. Mun ka kan ka kɛ walisa jɛkulu k’a dɔn a ka kan ka min kɛ tuma min na a bɛ Masaya So saniya?

5. Kojugu walima farati fosi kana kɛ Masaya So la, yali o nafa ka bon wa? Fɛn jumɛnw ka kan ka lajɛ tuma bɛɛ? (Ɲɛfɔli min bɛ ɲɛ 4nan na, o lajɛ.)

6. Masaya So ladonni baara bɛ labɛn cogo di?

7. (a) Fɛn jumɛn bɛ kɛ san o san walisa Masaya So ka to minɛcogo ɲuman na? (b) An ka kan k’an hakili to mun na tuma bɛɛ? (Ɲɛfɔli lajɛ ɲɛ 5nan na.)

8. Maakɔrɔw bɛ se ka u ɲɛsin Masaya So jɔliko baarada ma tuma jumɛn na?

9. Ni maakɔrɔw mago bɛ baarakɛda dɔ ka dɛmɛ na, o ko bɛ kɛ cogo di?

10. Mun bɛ se ka kɛ walisa baara ɲuman ka kɛ ni jɛkulu ka warikɛsu ye?

11. Mun ka kan ka kɛ ni a yera ko baaraba dɔw ka kan ka kɛ walisa ka Masaya So ladon koɲuman, walima k’a labɛn kura ye?

12. An bɛ se k’a jira cogo di ko an bɛ nafaba don bonya na min b’an bolo ka an lajɛ Masaya So kɔnɔ?

[Box on page 4]

Lakanali kow lisi

◻ Tasumafagalanw bilalen bɛ yɔrɔ min na, mɔgɔ ka kan ka se ka o yɔrɔ lasɔrɔ nɔgɔya la. San o san, a ka kan k’a lajɛ ni baara bɛ se ka kɛ ni u ye koɲuman.

◻ Mɔgɔ bɛ se ka boli ka bɔ yɔrɔ minnu fɛ teliya la, ani daw, ani yɛlɛnyɛlɛnnan minnu bɛ Masaya so la, o fɛnw bɛɛ ka kan ka jira cogo jɛlen na. Yeelen ka kan ka kɛ o yɔrɔw la. Mɔgɔ ka kan fana ka se k’o yɔrɔw lasɔrɔ nɔgɔya la. Mɔgɔ bɛ yɛlɛnyɛlɛnnan yɔrɔ minnu minɛ ka yɛlen walima ka jigi, olu ka kan ka kɛ fɛn barikamanw ye.

◻ Ɲɛgɛn kɔnɔnaw ani fɛnw bɛ mara arimuwari min kɔnɔ, olu ka kan ka labɛn ka ɲɛ, ka saniya. Mɔgɔ si man kan ka a bolofɛn bila yen. Ɲamaw ani tasuma ka teli ka fɛn o fɛn minɛ nɔgɔya la, o fɛnw si man kan ka bila o yɔrɔw la.

◻ Masaya So bili ani taaranw ka kan ka lajɛ ani ka saniya tuma bɛɛ.

◻ Yeelen ka kan ka kɛ mɔgɔw tɛmɛyɔrɔw la, Masaya So dukɛnɛ la, ani mobiliw jɔyɔrɔ la. Fɛn si man kan ka kɛ o yɔrɔ la min bɛ se ka kɛ sababu ye mɔgɔ dɔ ka cɛɛnɛ walima ka bin.

◻ Kuran bɛ tɛmɛ fɛn o fɛn fɛ, ani fiɲɛ bɛ tɛmɛ yɔrɔ minnu fɛ, olu kow bɛɛ lajɛlen ka kan ka sɛgɛsɛgɛ, ani mago ka kan ka don u la.

◻ Sumaya bɛ se ka na ni tiɲɛni minnu ye, walisa olu ka se ka kunbɛn, ni orobinɛ yɔrɔ min tiɲɛna, ni ji bɛ bɔ o fɛ, o yɔrɔ ka kan ka dilan teliya la.

◻ Ni mɔgɔ si tɛ Masaya So la, a yɔrɔ bɛɛ ka kan ka datugu.

[Box on page 5]

Masaya So ni a dukɛnɛ ladonni

◻ Kɛnɛmana: Bili, kɛnɛma kogo, a pɛntiri, fenɛtiriw, ani Masaya So sɛbɛnnen bɛ walan min kan, yali o fɛnw bɛɛ cogo ka ɲi wa?

◻ Dafɛlaw: Masaya So jɔlen bɛ dugukolo min kan, yali o yɔrɔ bɛɛ minɛcogo ka ɲi wa? Sennatigiw bɛ taama yɔrɔ minnu na, ani fɛn minnu kɛlen bɛ k’a dukɛnɛ kɔɔri, ani mobiliw bɛ jɔ yɔrɔ min na, yali o yɔrɔw bɛɛ minɛcogo ka ɲi wa?

◻ Kɔnɔna: Masaya So dugumana, tapi, irido, sigilanw, kuran ni ji bɛ tɛmɛ yɔrɔ minnu na, ɲɛgɛnw, pɛntiriw, sɛbɛnw bɛ mara arimuwari minnu kɔnɔ, yali o fɛnw bɛ cogo cɛ ka ɲi wa? Baarakɛminɛn minnu bɛ yen kankɔrɔtalanko kama, olu sigilen bɛ yɔrɔ min na, yali o yɔrɔ fana cogo bɛnnen don wa?

◻ Yeelen, kankɔrɔtalan ani fiɲɛ bɛ tɛmɛ yɔrɔ min na, yali olu bɛɛ ka ɲi wa?

◻ Ɲɛgɛnw: Yali u saniyalen bɛ wa? Yali o yɔrɔ dɔ tiɲɛnen tɛ wa?

◻ Jɛkulu ka lakodɔnsɛbɛnw: A wajibiyalen don yɔrɔ min na, yali faamaw ye sɛbɛn di Masaya So dugukolo ko la wa? Yali kuran ni ji bɛ sara tuma bɛɛ wa? Yali o warisarasɛbɛnw bɛɛ maralen bɛ koɲuman wa?