Aw ka Masaya Kibaru weleweleda
1 “Wajibi don ne ka Ala ka masaya kibaru duman fɔ, katuguni o de ye ne ci kun ye.” (Luka 4:43) Yesu ye nin kumaw kɛ ka a ka waajuli kun bɛrɛbɛrɛ ɲɛfɔ ni o ye Ala ka Masaya weleweledali ye. Bi an bɛ kibaru min lase, o fana sinsinnen bɛ masaya de kan i n’a fɔ a fɔra cogo min na Matiyu 24:14 kɔnɔ ko: ‘Nin masaya kibaru duman waajuli na kɛ dugukolo yɔrɔ bɛɛ la, ka kɛ seereya ye siyaw bɛɛ ma; o kɔ, laban na se.’ Tiɲɛ jumɛnw ɲɛsinnen bɛ Ala ka masaya ko ma, ni mɔgɔw ka kan ka o dɔn?
2 Sisan Ala ka Masaya bɛ fanga la sankolow la, wa, a bɛna sigi hadamadenfanga bɛɛ nɔ na. Sitanɛ gɛnna ka bɔ sankolo la kaban, wa an ka bi diɲɛ juguman donna a ka don labanw na. (Jir.12:10,12) Sitanɛ ka diɲɛ juguman bɛna halaki pewu, nka Ala ka Masaya tɛna yigiyɔgɔ. A bɛna to kudayi.—Dan. 2:44; Heb. 12:28.
3 Ala ka Masaya bɛna Ala kanminɛbagaw diyanyeko ɲumanw bɛɛ di u ma. Kɛlɛ, mɔgɔ faga, tɔɲɔli, ani faantanya bɛna ni ɲɛni minnu ye, a bɛna olu bɛɛ ban pewu. (Zab. 46:8, 9; 72:12-14) Bɛɛ bɛna dumuni camanba sɔrɔ. (Zab. 72:16; Esa. 25:6) Bana ani farikolo dɛsɛw bɛna kɛ ko tɛmɛnenw ye. (Esa. 33:24; 35:5, 6) Mɔgɔw bɛna dafa ka taa a fɛ tuma min na, o tuma kelen fana na, dugukolo bɛna yɛlɛma ka kɛ alijinɛ ye, wa mɔgɔw na sigi ɲɔgɔn fɛ bɛn kɔnɔ.—Isa. 11:6-9.
4 An ka bi ɲɛnamaya kɛcogo de fɛ, an b’a jira ko an b’a fɛ Masaya ka fanga ka boli an kan. Masaya kibaru jɔyɔrɔ ka kan ka ye an ka ɲɛnamaya kɛcogo bɛɛ la, an kuntilennaw na, ani an bɛ kow minnu bila an ka ko tɔw bɛɛ ɲɛ. Misali la, hali ni a waajibiyalen bɛ an kan ka an ka denbaya ka ɲɛnamaya magow ɲɛnabɔ, an man kan k’a to o kow ka bila Ala ka Masaya kow ɲɛ. (Mat. 13:22; 1 Tim. 5:8) Nka, an ka kan ka Yesu ka laadilikan minɛ ni sɛbɛ ye: “Aw ye Ala ka Masaya ni a ka tilennenya ɲini fɔlɔ. O mana kɛ, Ala na o fɛnw [ɲɛnamaya tɛ taa fɛn minnu kɔ] bɛɛ di aw ma ka fara olu kan.” —Mat. 6:33.
5 Teliya la, mɔgɔw ka kan ka Masaya kibaru mɛn, ka u ka kow kɛ ka bɛn ni o ye, a ko man kan ka bila ka sumaya. An k’u dɛmɛ ka o kɛ ni ‘ kuma cogo ye min b’u bila ka da an ka kuma la Ala ka Masaya ko la.’—Kɛwalew19:8.