Ni i baramɔgɔ dɔ ye Ala ka sira bila fo a gɛnna ka bɔ jɛkulu la, kantigiya jira ka kɛɲɛ ni kerecɛnya sira ye

¹ Kanuya min bɛ denbaya kɔnɔmɔgɔw ni ɲɔgɔn cɛ, o barika bɛ se ka bonya kosɛbɛ. O la sa, ni Kerecɛn dɔ furuɲɔgɔn, walima a den, walima a bangebaga, walima a baramɔgɔ wɛrɛ ye Ala ka sira bila fo a gɛnna ka bɔ jɛkulu la, walima ni o tigi y’a sen bɔ jɛkulu la, o bɛ se ka kɛ kɔrɔbɔli ye o Kerecɛn bolo. (Mat. 10:37) Kerecɛn kantigiw ka kan k’o baramɔgɔ sugu minɛ cogo di? Yali o tigi minɛcogo ka kan ka yɛlɛma ni aw sigilen bɛ so kelen kɔnɔ wa? Bibulu bɛ min fɔ o ko la, ani sariyakolo minnu bɛ sirataama ka ɲɛsin o mɔgɔ gɛnnenw ma, ani mɔ­gɔw ma, minnu ye u sen bɔ jɛkulu la, an k’o mafilɛ.

² Mɔgɔ minnu ye Ala ka sira bila fo u gɛnna, olu bɛ minɛ cogo min na: Ala ka Kuma b’a wajibiya Kerecɛnw ma, ko u ka jɛɲɔgɔnya dabila ni mɔgɔ ye, min ye Ala ka sira bila fo a gɛnna ka bɔ jɛkulu kɔnɔ: ‘Mɔgɔ min bɛ wele balima, ni o ye jatɔ ye, wala wasabali, wala bolisɔnna, wala nenilikɛla, wala dɔlɔtɔ, wala binkannikɛla, aw ni o tigi kana jɛ foyi la . . . A’ ye kojugukɛla bɔ aw cɛma.” (1 Cor. 5:​11, 13) Yesu ka kuma minnu sɛbɛnnen bɛ Matiyu 18:17 la, olu fana ɲɛsinnen bɛ o ko ma: ‘A jate jurumutɔ ye, walima faama wariminɛbaga ye.’ O waati la, Yesu lamɛnbagaw tun b’a dɔn ko jɛɲɔ­gɔnya si tun tɛ Yahutuw ni Jantiliw cɛ, wa u tun b’u yɛrɛ tanga faama wariminɛbagaw la, iko ban kɛra mɔgɔ minnu na.’ O cogo la, Yesu tun ye a nɔfɛmɔgɔw kalan k’u kana jɛɲɔgɔnya kɛ ni mɔgɔ gɛnnenw ye.​—⁠ Sɛtanburukalo tile 15, san 1981, La Tour de Garde ɲɛw 18-​20 lajɛ.

³ O kɔrɔ ye ko mɔgɔ o mɔgɔ ye Ala ka sira bila fo a gɛnna ka bɔ jɛkulu la, Kerecɛn kantigiw tɛ jɛɲɔgɔnya kɛ ni o tigi ye, alako ta fan fɛ. Nka, a ko tɛ dan o dɔrɔn ma. Ala ka Kuma ko an man kan ka ‘dumuni kɛ ni o mɔgɔ sugu ye.’ (1 Kɔr. 5:11) O la sa, an b’an yɛrɛ minɛ fana walisa an kana balimaya kɛ ni mɔgɔ gɛnnen ye. O ye k’a fɔ ko o tigi sen man kan ka ye an ka ɲɛnajɛw la, ani an ka tulonkɛw, walima an ka pikinikiw la. An man kan ka taa sanni kɛ, walima ka taa ɲɛnajɛyɔrɔw la n’o tigi ye. An tɛ dumuni kɛ n’a ye so kɔnɔ, walima rɛsitoran la.

⁴ Min ye ka kuma mɔgɔ gɛnnen fɛ dun? Hali ni Bibulu tɛ don o ko bɛɛ ɲɛ na k’a fɔ, o n’a ta o ta, 2 Yuhana 10 b’an dɛmɛ ka Jehowa hakilila faamu. A ko: “Ni mɔgɔ dɔ bɛ na aw ma, k’a sɔrɔ a tɛ ni nin kalan ye, aw kana o ladon aw ka so, walima k’a fo.” Sɛtanburukalo tile 15, san 1981, La Tour de Garde ɲɛ 25 nan ye ɲɛfɔli kɛ o tɛmɛsira kan. A ko: “Ka mɔgɔ fo dɔrɔn, o bɛ se ka kɛ fɛn fɔlɔ ye min bɛ na ni baro ye, laala yɛrɛ o bɛ se ka kɛ teriya dɔ daminɛ ye. Yali an b’a fɛ k’o fɛn fɔlɔ kɛ ni mɔgɔ gɛnnen ye wa?”

⁵ O Tour de Garde kelen ɲɛ 31 nan na, a fɔlen bɛ ko: “Kerecɛn min mana a yɛrɛ bila jurumu kɛli la, fo ka se gɛnni ma ka bɔ jɛkulu la, o tigi bɛ bɔnɛ fɛn caman na: Tɔgɔ ɲuman min tun b’a la Jehowa ɲɛkɔrɔ, a bɛ bɔnɛ o la. Teriyasira min tun bɛ ale ni jɛkulu kɔnɔmɔgɔw cɛ, a bɛ bɔnɛ kosɛbɛ o la, ale ni a baramɔgɔ kerecɛnw cɛsira fana sen b’o la kosɛbɛ.”

⁶ Ni an ni mɔgɔ gɛnnen sigilen bɛ so kelen kɔnɔ: Yali o kɔrɔ ye ko Kerecɛn minnu sigilen bɛ so kelen kɔnɔ ni mɔgɔ gɛnnen dɔ ye, olu man kan ka kuma, ani ka dumuni kɛ ni o tigi ye wa? Walima o tigi man kan ka fara u kan u ka don o don ko kɛtaw la wa? Awirilikalo tile 15, san 1991, La Tour de Garde ɲɛ 22 nan jukɔrɔ, a sɛbɛnnen bɛ ko: “Ni mɔgɔ gɛnnen bɛ Kerecɛn du kɔnɔ, o tigi sen bɛ ha­libi du koɲɛw ni du ka baaraw la don o don.” O la sa, mɔgɔ gɛnnen bɛ se ka fara denbaya kɔnɔmɔgɔ tɔw kan cogo min na dumuni kɛtuma, ani ko wɛrɛw kɛtuma na, o bɛ denbaya kɔnɔmɔgɔw de bolo k’o latigɛ.

Nka, o n’a ta o ta, u t’a fɛ an balima kerecɛn k’a miiri ko kabini gɛnni kɛra kow ma yɛlɛma.

⁷ O bɛɛ n’a ta, Sɛtanburukalo tile 15, san 1981, La Tour de Garde ɲɛ 28 nan bɛ kuma mɔgɔ gɛnnen kan, ani mɔgɔ min y’a sen bɔ jɛkulu la. A ko: “jɛ­ɲɔgɔnya min tun bɛ ale ni jɛkulu kɔnɔmɔgɔw cɛ a­lako ta fan fɛ, o banna pewu. A ko bɛ ten fana, hali ka ɲɛsin a baramɔgɔw ma, sokɔnɔmɔgɔw fana sen b’o la. . . . O kɔrɔ ye ko jɛɲɔgɔnya min tun bɛ u ni ɲɔgɔn cɛ so kɔnɔ, alako ta fan fɛ, yɛlɛma bɛ don o la. Misali la, ni furucɛ de gɛnna, o bɛna kɛ degun ye a muso ni a denw bolo, ni o tigi b’a fɛ ka denbaya ka Bibulu kalan ɲɛminɛ, walima denbaya ka Bibulu kalanjɛ, walima ka denbaya ka delili ɲɛminɛ. Ni a b’a fɛ ka delili ɲɛminɛ dumuni kɛtuma na, a dalilu b’a bolo k’o kɛ, bawo a b’a yɛrɛ de ka so. Nka, o tuma na, sokɔnɔmɔgɔ tɔw kelen-kelen bɛɛ bɛ se k’u ka delili kɛ u yɛrɛ kɔnɔ. (Nt. 28:9; Zab. 119:​145, 146) Ni denbaya kɔnɔmɔgɔw bɛ ka u ka Bibulu kalanjɛ kɛ ɲɔgɔn fɛ, walima k’u ka denbaya ka Bibulu kalan kɛ, ni mɔgɔ gɛnnen b’a fɛ ka ye o kalan kɛnɛ kan, yali o bɛ se ka kɛ wa? Sokɔnɔ­mɔgɔw bɛ se k’a to a ka na o la ka lamɛnni kɛ, n’a tɛna a ɲini ka tɔw kalan, walima ka diinɛ miiri­yaw fɔ tɔw ye.”

⁸ Ni den ma kɛ baliku ye fɔlɔ, wa n’a ni a bange­bagaw sigilen bɛ so kelen kɔnɔ, a ka kalanko bɛ a bangebaga Kerecɛnw de kan, hali bi. Nowanbu­rukalo tile 15, san 1988 La Tour de Garde ɲɛ 20 nan b’a fɔ ko: “U bɛ taga a fɛ cogo min na ka dumuni, ni fini, ni siyɔrɔ di den ma, o cogo kelen na, u ka kan k’a kalan, k’a kolo, ka kɛɲɛ ni Ala ka Kuma ye. (Nt. 6:​20-22; 29:17) Bangebaga minnu bɛ u denw kanu, olu bɛ se o cogo la ka Bibulu kalan kɛ ni u den ye, hali n’a gɛnnen don. Ni bangebagaw bɛ kalan kɛ ni ale kelenpe dɔrɔn ye, laala, a bɛna nafaba sɔrɔ o latilenni kalan na. Walima, u bɛ se k’a latigɛ, a ka taga a fɛ k’a niyɔrɔ sɔrɔ denbaya ka kalan na.”​—⁠Ɔkutɔburukalo tile fɔlɔ, san 2001, La Tour de Garde ɲɛw 16-​17 lajɛ.

⁹ Ni an ni mɔgɔ gɛnnen sigilen tɛ so kelen kɔnɔ: Awirilikalo tile 15, san 1988 La Tour de Garde ɲɛ 28 nan ko: “A ko tɛ kelen ye ni krecɛn ni mɔgɔ gɛnnen, walima n’a ni mɔgɔ senbɔlen sigilen tɛ so kelen kɔnɔ.” A bɛ se ka kɛ ko u tɛna ɲɔgɔn ye ka caya, fo a bɛ kɛ i n’a fɔ jɛɲɔgɔnya si tɛ balimaw ni mɔgɔ gɛnnen cɛ. Hali ni sokɔnɔ ko dɔw b’a waji­biya u ka ɲɔgɔn ye, o n’a ta o ta, “u ka ɲɔgɔnye ka kan k’a kɛ tuma kelen-kelen,” ka kɛɲɛ ni Ala ka ci fɔ­len ye. O ci fɔlen b’a jira ko jurumukɛla min t’a fɛ ka nimisa, ko ‘An ni o tigi kana jɛ foyi la.’ (1 Kɔr. 5:11) Kerecɛn kantigiw ka kan k’u jija walisa olu ni o baramɔgɔ sugu kana jɛ fɛn fosi la, ni kun ɲɛnama tɛ u bolo k’o kɛ. Hali ni jagoko bɛ u ni ɲɔgɔn cɛ, o ko ka kan ka dɔgɔya kosɛbɛ.​—⁠Sɛtanburukalo tile 15, san 1981 La Tour de Garde ɲɛw 29-​30 lajɛ.

¹⁰ La Tour de Garde bɛ kuma ko wɛrɛ fana kan min bɛ se ka kɛ: “Ni an baramɔgɔ dɔ, i n’a fɔ du denkɛ, walima mansa dɔ, an ni min sigilen tɛ so kelen kɔnɔ, n’a ye Ala ka sira bila fo a gɛnna ka bɔ jɛkulu la, wa, n’a b’a fɛ sisan ka segin ka na so kɔnɔ, o ko bɛ kɛ cogo di? Denbaya bɛ se ka fɛn min latigɛ, o bɛ bɔ ko yɛrɛ cogoya la. Misali la, mansa gɛnnen bɛ se ka bana, walima a tɛ se a yɛrɛ kɔrɔ tun, wariko ta fan fɛ, walima farikolo ta fan fɛ. A wajibiyalen bɛ Kerecɛn denw ma, u ka u mansa dɛmɛ, ka kɛɲɛ ni Bibulu kɔnɔkuma ani taamacogo ɲuman naamuw ye. (1 Tim. 5:⁠8) Fɛn min bɛ se ka kɛ, o bɛ bɔ ko caman na, i n’a fɔ bangebaga mago kɛrɛnkɛrɛnnenw, a hakilila, ani sotigi haminanko ye min ye ka ɲɛsin a ka denbaya ka nɛɛma ma, alako ta fan fɛ.”​—⁠ Sɛtanburukalo tile  15, san 1981, La Tour de Garde, ɲɛw 28-9 lajɛ.

¹¹ Min ye den ta fan fɛ la ye, o barokun kelen ko: “Ka ɲɛsin den gɛnnen ma min banana farikolo ani dusukun ta fan fɛ, tuma dɔw la, bangebaga bɛ jɛ n’a ye, a ka segin ka na so, waati dɔ kɔnɔ. Nka, mɔgɔ gɛnnen bɛ balo cogo min na tigitigi, bange­bagaw bɛ se ka jateminɛ kɛ o ko kelen-kelen bɛɛ la. Yali den gɛnnen tun y’a yɛrɛ ta fɔlɔ la, nka sisan a dɛsɛra a yɛrɛ kɔrɔ wa? Walima, a b’a fɛ ka segin ka na so kɔnɔ walisa k’a ka diɲɛnatigɛ ko nɔgɔya a yɛrɛ bolo wa? A hakilila ni a kɛcogo ye mun ye? Yali a bɛ na ni ‘nbuurufunun fɛn’ ye so kɔnɔ wa, min kɔrɔ ye tiɲɛni?”​—⁠Gal. 5:⁠9.”

¹² Nafa minnu b’a la ka kɛ kantigi ye Jehowa fan fɛ: Fɛɛrɛ min tigɛra ka ɲɛsin mɔgɔ gɛnni ko ma, ani ka an tanga kojugukɛlaw ma minnu t’a fɛ ka nimisa, o nafa ka bon. A bɛ jɛkulu lakana, k’a saniyalen to, k’a jira ko an ye mɔgɔw ye minnu bɛ Bibulu ka sariyakolo kɔrɔtalenw kɔkɔrɔdon. O sariyakolow ɲɛsinnen bɛ jogo ɲumanya de ma. (1 Pi. 1:​14-16) Ko minnu bɛ mɔgɔ jogo cɛn, a b’an tanga olu fana ma. (Gal. 5:​7-9) A b’a to fana kojugukɛla ka nafaba sɔrɔ kololi la. O kololi bɛ se k’a dɛmɛ a ka bange ‘fɛn hɛrɛma na, n’o ye tilennenya ye.’​—⁠Heb. 12:11.

¹³ An balimakɛ dɔ, ni a filanin ɲɔgɔn kɛlen kɔ ka kafo lakɔlɔsibaga ka jɛmukan dɔ lamɛn, u y’a ye k’u bɛ u ba minɛ cogo min na, u ka kan ka yɛlɛma don o la. U ni u ba tun sigilen tɛ yɔrɔ kelen na, wa, u ba tun gɛnna ka bɔ jɛkulu la, a tun bɛ san wɔɔrɔ bɔ. Jamalajɛ kɔfɛ dɔrɔn, balimakɛ ye a ba wele k’a fɔ a ye ko a b’a fɛ k’a sɛmɛntiya a ye, ko a b’a kanu kosɛbɛ. Nka, a y’a ɲɛfɔ a ye ko ale ni a filanin ɲɔgɔn tɛna se ka kuma a fɛ tun, fo ni du kunkoba dɔ kɛra a sababu ye. Waati dɔɔnin dɔrɔn o kɔfɛ, u ba ye nali daminɛ lajɛw la, fo ka segin a kɔ, ka na Je­howa ma kokura. A cɛ min tun tɛ dannabaga ye, o fana ye kalan daminɛ ka batise.

¹⁴ Fɛɛrɛ min tigɛra ka ɲɛsin mɔgɔ gɛnni ko ma ka bɔ jɛkulu la, iko a ɲɛfɔlen bɛ cogo min na Bibulu kɔnɔ, o b’an ka kanuya jira ka ɲɛsin Jehowa ma, k’a to Jehowa k’a kɔrɔbɔbaga jaabi. (Nt. 27:11) O la sa, an bɛ se ka da a la ko an bɛna Jehowa ka mandiya, n’a ka duba sɔrɔ. Masakɛ Dawuda tun y’a sɛ­bɛn ka ɲɛsin Jehowa ma: ‘Ne tɛna n mabɔ a ka sa­riyaw la. Mɔgɔ min ye kantigi ye, i na kantigiya ta ka o tigi sɛgɛrɛ.’​—⁠2 Sam. 22:​23, 26.

[Study Questions]

1. Ko jumɛn bɛ se ka Kerecɛn ka kantigiya kɔrɔbɔ?

2. Ka kɛɲɛ ni Bibulu kɔnɔ kuma ye, mɔgɔ minnu gɛnna ka bɔ jɛkulu la, Kerecɛn ka kan k’olu minɛ cogo di?

3, 4. Jɛɲɔgɔnya sugu jumɛn dagalen tɛ jɛkulu kɔnɔmɔgɔw ni mɔgɔ gɛnnenw, ani mɔgɔ senbɔlenw cɛ?

5. Ni mɔgɔ dɔ gɛnna, a bɛ bɔnɛ mun ni mun na?

6. Yali a wajibiyalen bɛ Kerecɛn ka jɛɲɔgɔnya sugu bɛɛ dabila ni a baramɔgɔ gɛnnen ye, a ni min sigilen bɛ so kelen kɔnɔ wa? A ɲɛfɔ.

7. Jɛɲɔgɔnya min bɛ sokɔnɔmɔgɔw ni ɲɔgɔn cɛ, alako ta fan fɛ, o bɛ yɛlɛma cogo di ni sokɔnɔmɔgɔ dɔ gɛnna?

8. Kerecɛnw jɔyɔrɔ ye jumɛn ye ka ɲɛsin u den gɛnnen ma min tɛ baliku ye fɔlɔ, ni a sigilen bɛ u ka so?

9. Ni a ni mɔgɔ gɛnnen sigilen tɛ so kelen kɔnɔ, Kerecɛn ni o tigi cɛ bɛna kɛ cogo di?

10, 11. Kerecɛn bɛna jateminɛ jumɛn kɛ sani a ka jɛn n’a ye a baramɔgɔ gɛnnen ka segin ka na sigi so kɔnɔ?

12. Fɛɛrɛ min tigɛra ka ɲɛsin mɔgɔ gɛnni ko ma, o nafa dɔw ye jumɛnw ye?

13. Denbaya dɔ kɔnɔmɔgɔw ye yɛlɛma jumɛn don u kɛcogo la, wa, o kɔ kɛra mun ye?

14. Fɛɛrɛ min ɲɛsinnen bɛ mɔgɔ gɛnni ko ma, mun na an ka kan k’o kɔkɔrɔdon?