An ka lafiyawaati to a yɔrɔ bɛnnen na
1 Nin waati gɛlɛn in na, an bɛɛ mago b’a la k’an ka kow yɛlɛma waati ni waati. O la sa, lafiyawaati dɔ bɛnnen bɛ. Nka, ka waati caman tɛmɛ lafiya ni yɛrɛɲɛnajɛ ni hadamadenya sirataamani na mɔgɔw fɛ, o bɛ se ka kɛ sababu ye mɔgɔ tɛ to a ɲɛ na tun fo a tun bɛ waati min kɛ alako ta fan fɛ fɛnw nɔfɛ, o bɛ dɔgɔya ka t’a fɛ. An ka kan ka lafiyawaati to a yɔrɔ bɛnnen na. (Mat. 5:3) O bɛ se ka kɛ cogo di? N’an bɛ tugu laadilikan na min bɛ Efesekaw 5:15-17 la.
2 An ka dan sigi an ka lafiyawaati la: Pol y’a sɛbɛn ko Krecɛnw b’u ka ɲɛnamaya kɛ cogo min na, k’u ka kan k’u ‘kɔlɔsi’ o la ni hakilitigiya ye. K’i yɛrɛminɛ ani k’i ka kow bɛrɛ bɛn, o wajibiyalen don walasa waati min ka kan ka bila lafiya kama, i ka se ka dan sigi o la. An b’an ka lafiyawaati tɛmɛ cogo min na, hakilitigiyako don ka miiri o la kosɛbɛ. Lafiyawaati ka kan ka kuntilenna nafama dɔ de ɲɛ sanni k’an bila ka miiri k’an y’an ka waati tiɲɛ, walima k’o y’an sɛgɛn. Ni lafiyawaati dɔ kɔfɛ an bɛ miiri ko jalaki b’an fan fɛ, o b’a jira k’an ka kan ka kow latilen an ka waati kɛcogo ta fan fɛ.
3 An k’an ka kow bɛrɛ bɛn: Pol ye laadilikan di k’an ka “waati kunmabɔ” ɲɛnamaya ko nafamaw kama, k’an kana kɛ “hakilintanw” ye. Krecɛn minnu y’u yɛrɛbakun di Ala ma, u t’a to u ka ɲɛnamaya kɛcogo ka sinsin lafiyawaati kan. Hali ni lafiya ni ɲɛnajɛ bɛ se k’an fanga bonya ko kura, alako ta fan fɛ fanga bɛ bɔ Ala ka barika walekɛbaatɔ de la. (Esa. 40:29-31) An b’a ka hakili senu sɔrɔ ala-ka-marako baaraw de fɛ, n’olu ye ka Bibulu kalan, ka taa jɛkulu lajɛw la, ani k’i sen don foro baara la. An t’o sɔrɔ ɲɛnajɛw sababu fɛ.
4 Ko minnu ka kan ka bila jɔyɔrɔ fɔlɔ la, an k’olu sigi: Pol ye Krecɛnw kalan ko ‘Jehowa sago ye min ye, ko u k’o dɔn.’ Yesu y’an kalan k’an ka baara minnu bɛ sinsin Ala ka Masaya kan, k’olu de ka kan ka bila jɔyɔrɔ fɔlɔ la an ka ɲɛnamaya kɔnɔ. (Mat. 6:33) Wajibi don an ka fɔlɔ ka fɛnw kɛ, fɛn minnu bɛn’a to an b’an ka ɲɛnamaya kɛ ka kɛɲɛ n’an ka yɛrɛbakundili ye Jehowa ma. O kɔfɛ sa, lafiyawaati bɛ se ka to a yɔrɔ bɛnnen na. N’o kɛra tuma min na, o bɛ nɔ ɲuman to, wa, an bɛna o diyabɔ kosɛbɛ tun.—Waj. 5:12.