Yali i b’a fɛ ka dɔ fara i ka kɛta kan wa?

¹ Yesu ye Masaya suma ni nafoloba ye min sɔngɔ tɛ se ka fɔ ka ban. (Mat. 13:44-46) Masaya kibaru jɛnsɛnni baara fana ye nafolo ye min nafa ka bon kosɛbɛ. O cidenyabaara in ka kan ni jɔyɔrɔ fɔlɔ ye an ka ɲɛnamaya kɔnɔ hali n’a y’a sɔrɔ o tɛ taa kaariya dɔ kɔ walasa ka an ta kɛ o baara la ka dafa. (Mat. 6:19-21) Yali i b’a fɛ ka dɔ fara i ka kɛta kan Masaya baara la wa?

² I ka nin ko nafamaw jateminɛ: Fɛn caman nafa ka bon walasa ka dɔ fara an ka kɛta kan cidenyabaara la: (1) an jɔlen ka to a kan ka Masaya kunkankow bila jɔyɔrɔ fɔlɔ la an ka ɲɛnamaya kɔnɔ (Mat. 6:​33); (2) an ka dannaya kɛ Jehowa la, k’an jigi da a kan (2 Kɔr. 4:​1, 7); (3) an ka Ala ka dɛmɛ ɲini timinandiya ni kɔnɔnajɛya deliliw fɛ (Luka 11:8-10); (4) an ka tugu o kow nɔfɛ, ka wale kɛ ka bɛn n’an ka deliliw ye.—Yak. 2:14, 17.

³ An bɛ se ka dɔ fara an ka cidenyabaara kan sira minnu fɛ: An bɛɛ bɛ se ka kuntilenna fɔlɔ min da an ɲɛ, o ye ka waati hakɛ dɔ kɛ kalo o kalo cidenyabaara la. Nka, yali i y’a jateminɛ ka cogo kelen-kelen bɛɛ fana kɛ kun ye walasa ka senfɛ seereya kɛ, k’i jija ka tiɲɛ ɲɛfɔ cogo ɲɛnama na wajuli la, ka dɔ fara i ka segin-ka-bɔnyew ɲɛli kan, k’i cɛsiri ka Bibulu kalanw ɲɛminɛ minnu bɛ taa ɲɛ wa? Yali i bɛ se ka kɛ tutigɛbaga farankan, walima tutigɛbaga basigilen ye, walima yɛrɛ ka baara kɛ yɔrɔ la, weleweledala magoba bɛ yɔrɔ min na wa? N’i ye balimakɛ batiselen ye, yali i bɛ se k’a ɲini ka mankutu sɔrɔ walasa ka kɛ cidenyabaara maganna ye, walima maakɔrɔ ye wa? (1 Tim. 3:1, 10) Yali i bɛ se ka dɔ fara i ka cidenyabaara kan, k’i tɔgɔ di Bɛtɛl baara kama, walima Masaya So jɔli baara kama, walima yɛrɛ ka École de formation ministérielle (Cidenyabaara degeli kalanbolo) kɛ wa?—Luka 10:2.

⁴ Balimakɛ dɔ min tun bɛ a ka dahirimɛ ɲini baara la waati dafalen na, o tun bɛ waati caman kɛ farikoloɲɛnajɛ kow la. Dusu donna a kɔnɔ a ka kɛ tutigɛbaga basigilen ye. A y’a daminɛ ni tutigɛbaga farankan baara ye, ka tila ka yɛlɛma don a ka kow la walasa ka don waati dafalen cidenyabaara la. Kɔfɛ, a ye École de formation ministérielle kɛ min y’a dɛmɛ a k’i labɛn a ka sisan baara kama, n’o ye kafo lakɔlɔsibaga ka baara ye. A nisɔn ka di kosɛbɛ katuguni a sɔnna dusulamin dilen ma. A b’a dɔn fana k’a ka hɛrɛ bonyana kosɛbɛ bawo a y’a latigɛ ka dɔ fara a ka kɛta kan Masaya baara la.

⁵ Mɔgɔ minnu b’u yɛrɛ bila a ka baara kama, Jehowa bɛ duba olu ye. (Esa. 6:8) I kan’a to fɛn si k’i bali ka dɔ fara i ka cidenyabaara kan, o la sa, i na wasa ni jigitugu dɔn minnu ka bon kosɛbɛ ni fɔlɔ taw ye.