I baarakɛcogo ka ɲɛ i ka cidenyabaara la

¹ Sankolo ye dibi don. Mankan jugumanba bɛ ka bonya iko i tuloden ka ci. Fɛn dɔ bɛ jiginna iko kabanɔgɔ sisi. O ye mun ye? Ntɔn miliyɔn kɛlɛbolo natɔ don walisa ka na ni tiɲɛniba ye dugukolo kan! O ko min tun ɲɛfɔra kira Joɛl fɛ, o bɛ ka timɛ bi fana Ala ka maganna munnenw n’u jɛɲɔgɔnw, jamaba, ka waajuli baara fɛ.

² San 1998 Mɛkalo tile fɔlɔ La Tour de Garde bɛ nin fɔ a ɲɛ 11nan na, a dakun 19nan na, ko: “Ala ka bi-tile ntɔnw kɛlɛbolo ye seereya dafalen di Krecɛnte ‘dugu’ kɔnɔ. (Joɛl 2:9) . . . U bɛ ka taa fo ka balilan sugu bɛɛ kunnasagon, ka don du miliyɔn kɔnɔ, ka kuma mɔgɔw fɛ nbɛdaw la, walima nɛgɛjuru sira fɛ, ka mɔgɔ kumaɲɔgɔnya sira sifa bɛɛ la tuma min na u bɛ ka Jehowa ka cikan fɔ.” Ala ye o baara min ci bila an kan, k’i niyɔrɔ sɔrɔ o la, yali o tɛ bonyaba ye wa?

³ An Jehowa ka magannaw, an tɛ iko ntɔn yɛrɛ-yɛrɛ minnu kuntilenna dɔrɔn ye k’u yɛrɛ balo. An bɛ waajuli kɛ mɔgɔ minnu kun, u ka ɲɛnamaya hamiba de fana b’an na. Tiɲɛkuma nɔɔrɔman minnu bɛ Ala ka Kuma kɔnɔ, an b’a fɛ ka tɔw dɛmɛ k’olu dɔn, k’u bila ka sendaɲɛw kɛ minnu bɛna u lase kisili banbali ma. (Yuh. 17:3; 1 Tim. 4:16) O kosɔn, an b’a fɛ k’an ka baarakɛcogo ɲɛ an ka cidenyabaara la. An ka waajuli kɛcogoya kɛra fɛn o fɛn ye, an ka kan k’a jateminɛ n’an b’o kɛ sira la ani waati la minnu bɛna na ni nafa bɛɛ la fisama ye. Ikomi “nin diɲɛ cogo na tɛmɛ,” an bɛ koɲuman de kɛ k’an kɛcogoya an’an kumacogo sɛgɛsɛgɛ walisa ka gɛlɛya kunnasagon, n’o ye ka kɛ mɔgɔw ye minnu bɛ nafa sɔrɔ.—1 Kɔr. 7:31.

⁴ K’a sɔrɔ an b’an cɛsiri ka kuma mɔgɔw fɛ sira caman na, du-ni-du baara ye hali bi an ka cidenyabaara jujɔ ye. Yali n’i bɛ taa bɔ mɔgɔw ye, i b’a sɔrɔ tuma caman na k’u tɛ so walima k’u bɛ sunɔgɔ la wa? Ikomi i tɛ se ka kibaru duman tila n’u ye, o b’i dusutiɲɛ sa dɛ! I bɛ se k’o gɛlɛya kunnasagon cogo jumɛn na?

⁵ I k’i ka kow cogo bɛn mɔgɔw ma ka kɛ hakilitigi ye: San kɛmɛ fɔlɔ la, Israɛl jamana na, mɔnikɛlaw tun bɛ mɔni kɛ sufɛla de la. Mun na sufɛ? Hali k’a sɔrɔ o waati tun tɛ a bɛɛ la ɲuman ye olu bolo, o waati tun ye a bɛɛ la ɲuman ye walisa ka jɛgɛ camanba minɛ. Nafa camanba tun bɛ se ka sɔrɔ waati min na, o tun ye o waati ye. A kɛtɔ ka kuma o kɛcogo kan, san 1992 Zuwɛnkalo tile 15 La Tour de Garde ko: “An fana ka kan k’an ka danyɔrɔ cogoya sɛgɛsegɛ walisa an ka taa mɔni kɛ, n’an bɛ se k’a fɔ o cogo la, tuma min na mɔgɔ fanba b’u ka so, ani waati min na u bɛ se ka sɔn mɔgɔw la u ka so.” Kɔlɔsili basigilen kɛra mɔgɔw delinakow kan. A jirala ko kin caman na duguba kɔnɔ ani sigiyɔrɔw la, mɔgɔw bɛ se ka sɔrɔ so n’an bɛ taa bɔ u ye sɔgɔma joona fɛ, Sibiri ani Kari donw na. Nka, tuma caman na u man teli ka sɔn an ka bɔnyeliw ma o waatiw la. N’o de fana ye i ka yɔrɔ cogo ye, yali i bɛ se k’i ka bɔnyeli waati latilen walisa k’o kɛ tile gannen, walima yɛrɛ wuladafɛ wa? O ye cogo ɲuman de ye walisa ka dɔ fara an ka cidenyabaara nafa kan ani ka bonya da an sigiɲɔgɔnw kan. O bonya de fana ye Krecɛn ka kanuya sɛbɛ darula ye.—Mat. 7:12.

⁶ Ciden Pol b’an hakili jigin Filipekaw 4:5nan na, k’an ka kan k’a to ‘an dusu sumalenya ka dɔn mɔgɔw bɛɛ fɛ.’ Ka kɛɲɛ ni o cikan fiyɛlen ye, an b’a fɛ ka kɛ mɔgɔw ye minnu ka ko bɛrɛ bɛnnen don ani minnu bɛ hakilitigiyabaara kɛ u ka kɛcogow la, tuma min na u b’u ka waajulibaara kɛ ni timinandiya ni nisɔndiya ye. An t’a fɛ ‘ka siran [‘k’an yɛrɛ minɛ’, NW] ka kalan kɛ mɔgɔw bɛɛ ɲɛna ani sow bɛɛ kelen-kelen kɔnɔ’, nka, an b’a fɛ ka jɛya a la k’an b’an ka du-ni-du baara kɛ a bɛnnen don tuma min na ani nafa b’a la waati min na. (Kɛw. 20:20) Iko san kɛmɛ fɔlɔ mɔnikɛlaw Israɛl jamana na, an t’a fɛ k’an hami ka mɔni kɛ waati min ye a bɛɛ la ɲuman ye an fɛ, nka k’o kɛ nafa bɛ sɔrɔ waati min na.

⁷ Latilenni jumɛnw bɛ se ka kɛ? Tuma caman na, foro baara ka lajɛw bɛ kɛ nɛgɛ kan ɲɛ 9 walima 9 ni tila la Sibiri ani Kari donw na. O kɔfɛ, kulu bɛ du-ni-du baara daminɛ danyɔrɔ la o yɔrɔnin bɛɛ la. Nka, maakɔrɔ dɔw ye mabɛn kɛ walisa kulu ka cidenyabaara ɲɛ wɛrɛw kɛ, i n’a fɔ ka waajuli kɛ nbɛdaw la, jagokɛyɔrɔw la, walima ka segin-ka-bɔnyew kɛ sanni ka taa du-ni-du baara la mɔgɔw sigiyɔrɔw la. Jɛkulu dɔw ye u ka foro baara ka lajɛw bila sɔgɔma tile kɔrɔtalen, nɛgɛ kan ɲɛ 10, 11 walima 12 la. O kɔfɛ, kulu b’i sin du-ni-du baara ma. A bɛ to baara la fo wula daminɛ na. Danyɔrɔ dɔw la, wula daminɛ bɛ se ka kɛ waati bɛɛ la ɲuman ye walisa ka ɲɔgɔn lajɛ foro baara kama ka tɛmɛ sɔgɔmadafɛ la kan. An bɛ nafa min sɔrɔ du-ni-du baara la, o latilenni suguw bɛ se ka kɛ sababu ɲuman ye ka dɔ fara o nafa kan.

⁸ Kɛ mɔgɔ ye min bɛ faranfasiyali kɛ, wa n’a bɛ tɔw gasi sigi: N’an bɛ kuma mɔgɔw fɛ du-ni-du baara la, u walekɛcogo tɛ kelen ye ka ɲɛsin an ka cikan ma. Sow kɔnɔ, mɔgɔ dɔw bɛ sɔn, dɔw ka sira si tɛ, minnu bɛ sɔsɔli walima kɛlɛ kɛ, olu ka dɔgɔ. Ka ɲɛsin mɔgɔw ma minnu bɛ sɔsɔli kɛ, Comment raisonner à partir des Écritures b’an hakili jigin k’an kana’ ɲini ka “‘se sɔrɔ kɛlɛ la’ ni mɔgɔw ye minnu tɛ bonya si jira ka ɲɛsin tiɲɛ ma.” Ni mɔgɔ dɔ bɛ kɛlɛ fɛ, a cogo bɛɛ la fisaman ye ka taa. An man kan abada ka kɛlɛ wuli mɔgɔ fɛ an kɛtɔ k’a ɲini cogo bɛɛ la u ka kuma an fɛ, walima u ka sɔn an miirinata ma. An man kan k’an ka cikan diyagoya mɔgɔ kun. O tɛ na kɛ hakilitigiya baara ye, wa tuma caman na a bɛ na ni kunkow ye Seere tɔw ani baara ma.

⁹ Sanni ka danyɔrɔ dɔ kɛ, a ka fisa k’a lajɛ ni sɛbɛn dɔ tɛ danyɔrɔ karati foroko kɔnɔ. Mɔgɔ minnu y’a ɲini an fɛ k’an kana taa bɔ u ye tun, olu sɔrɔyɔrɔ bɛ se ka kɛ o sɛbɛn kɔnɔ. N’a bɛ o cogo la, weleweledala o weleweledala min bɛ waajuli kɛ nbɛdaw la, olu kelen-kelen bɛɛ bɛna lasɔmi. Mɔgɔ si man kan ka bɔ a yɛrɛ la k’o tigiw ye k’a sɔrɔ a ma baara lakɔlɔsibaga hakilinata sɔrɔ.

¹⁰ Tuma min na an bɛ du-ni-du baara la, n’an bɛ faranfasiyali kɛ, an bɛ dɔ fara an ka baarakɛcogo ɲɛ kan. Kɛ kɔlɔsikɛla ye tuma min i bɛ ka gɛrɛ so dɔ la. Yali fenɛtriw bɛɛ datugulen don koɲuman wa? Yali baara kɛkan si tɛ ka bɔ wa? O bɛ se k’a jira ko sokɔnɔmɔgɔw bɛ sunɔgɔ la. N’an seginna ka na bɔ u ye kɔfɛ, a ka c’a la, an bɛna baro nafama sɔrɔ kosɛbɛ ni sokɔnɔmɔgɔ dɔ ye. Laala, o waati la, a bɛ se ka fisaya kosɛbɛ ka tɛmɛn o so kan k’a nimero sɛbɛn. I bɛ se ka so cogo lajɛ ko kura sanni ka bɔ danyɔrɔ la, walima i k’a sɛbɛn walisa i ka segin ka na kɔfɛ.

¹¹ Kow bɛ se ka lawuli fana n’i ka ɲɛmajɔbaliya kɔnɔ i ye mɔgɔ dɔ lakunun, walima ka mɔgɔ dɔ tɔɲɔ. O bɛ se k’o tigi tɔɔrɔ walima k’a ladimi. An ka kɛwale ka kan ka kɛ mun ye o la? Ntalenw 17:27nan bɛ nin laadilikan di: “Min dusu sigilen bɛ, o ye faamulitigi ye.” Hali n’an ma yafa ɲini an ka cidenyabaara ko la, siga t’a la an bɛ se k’a fɔ a tigi ye k’an nimisalen don ka na waati bɛnbali la. Ni bonya ye, an bɛ se k’a ɲini a fɛ ni waati wɛrɛ ka fisa a ma kosɛbɛ n’an bɛ se ka segin ka na o min na. K’i ka hami jira ni kɔnɔnajɛya ye, ani k’o fɔ ni dususumalenya ye, o bɛ kɛ sababu ye tuma caman na k’o tigi dusu mada. (Nta. 15:1) N’o tigi y’a fɔ an ye k’a bɛ baara kɛ sufɛ tuma ni tuma, sɛbɛn dɔ ka kan ka fara danyɔrɔ karati kan walisa don nataw la, bɔnyeliw ka se ka kɛ waati bɛnnen na.

¹² Faranfasiyali fana bɛnnen don n’an b’an cɛsiri k’an ka danyɔrɔ baara cogo dafalen na. Ikomi mɔgɔw caman t’u ka so siɲɛ fɔlɔ min na an bɛ taa bɔ u ye, o kosɔn, an ka kan ka dɔ fara cɛsiriw kan walisa k’u ye ka kisili cikan tila n’u ye. (Rom. 10:13) Kunnafoniw y’a jira ko sɔn ni sɔn, weleweledalaw bɛ so kelen kɛ siɲɛ caman tile kelen kɔnɔ walisa k’a se ka mɔgɔ dɔ sɔrɔ so. O tɛ kɛ u sigiɲɔgɔnw ɲinɛ ma. A tɛ na ni miiriya ɲuman ye Jehowa Seerew ko la. Laala u bɛna an mafilɛ iko mɔgɔ minnu ‘b’u ka bɔnyeliw la tuma bɛɛ’ u ka nbɛdaw la. O bɛ se ka bali cogo di?

¹³ Faranfasiyali sɔrɔ. Mɔgɔ min tun tɛ yen, n’i bɛ segin ko kura a bara, yali taamaseerew bɛ yen minnu b’a jira ko dɔ bɛ so kɔnɔ sisan wa? N’a y’a sɔrɔ batakiw ni sebɛndenninw kunw bɔlen don batakiw buwati la, a ka c’a la, o tigi tɛ so fɔlɔ. Ka na tuguni o waati la, nafa tɛna kɛ o la. N’i y’a ɲini siɲɛ caman ka mɔgɔ dɔ ye tile waatiw dafaralen caman na, misali la, i n’a fɔ sufɛla, n’o tigi ma se ka ye, i bɛ se k’a lasɔrɔ nɛgɛjuru sira fɛ. N’o fana tɛ, sɛbɛndennin dɔ bɛ se ka bila cogo la min tɛ kɔlɔsi donda la, kɛrɛnkɛrɛnnenya la ni danyɔrɔ bɛ kɛ tuma caman na cogo bɛnnen na. Danyɔrɔ bɛ baara waati nata min na, a bɛ se ka ɲɛ k’o tigi lasɔrɔ o waati la.

¹⁴ Sanni an ka don so dɔ kɔnɔ, an k’an kɔlɔsi walisa an kana dugumala nɔgɔ. An ka hakili sɔrɔ tuma min na wulu bɛ wowo an na. N’an bɛ waajuli la sankasoba dɔ la, an ka kuma dɔɔnin. An k’an yɛrɛminɛ mankan kɛli la. O bɛ se k’o yɔrɔ mɔgɔw tɔɔrɔ, k’a jira k’an bɛ yen.

¹⁵ Kɛ mɔgɔ ye min ka ko ɲɛnabɔlen don ni danbe b’a la: Ni kolabɛnni ɲuman ye, an bɛ se k’an bali ka kuluba kɛ min bɛ kɔlɔsi kosɛbɛ ani min bɛ danyɔrɔ fa. Mɔgɔw bɛ se ka jɔrɔ u kɛtɔ ka weleweledalaw caman ye k’u lajɛ u ka so ɲɛ fɛ. Tuma dɔw la, ko minnu kɛra waajuli la, balimakɛw b’o lakali ni mankanba ye. O bɛ nɔ jugu bila an ka cidenyabaara danbe la ani an ka baara kɛcogo ɲuman na. An t’a fɛ k’a jira k’an bɛ mɔgɔw ka yɔrɔw “fa”. Danyɔrɔ baara labɛnw bɛ kɛ ka ɲɛ kosɛbɛ foro baara ka lajɛ de la. Weleweledalaw kulu fitininw, i n’a fɔ denbaya dɔ jate, o tɛ mɔgɔw lasiran, wa o kolabɛnni ko ka nɔgɔn danyɔrɔ baara kɛli la.

¹⁶ N’u bɛ waajuli la, labɛnni koɲuman bɛ bangebagaw wajibiya u k’u denw taamacogo kɔlɔsi. Ni denmisɛnw bɛ mɔgɔkɔrɔbaw bilasira da-ni-da baara la, u ka kan k’a jira k’u lamɔna ka ɲɛ. U man kan ka denmisɛnninw to ka tulon kɛ walima ka yala u yɛrɛma, ka kɛ sababu ye kinkɔnɔmɔgɔw walima tɛmɛbagaw k’u kɔlɔsi cogo bɛnbali la.

¹⁷ Mɔgɔ caman ye nafa sɔrɔ u kɛtɔ ka kuma mɔgɔw fɛ, mɔgɔw bɛ se ka sɔrɔ yɔrɔ o yɔrɔ la: nbɛdaw la, mobili jɔyɔrɔw la, ani foroba yɔrɔ wɛrɛw la. Yan yɔrɔ la fana, an b’a fɛ ka seereya ɲuman di, an ka kumaw dɔrɔn fɛ tɛ, nka n’an kɛcogo bɛrɛ bɛnnen fana ye. Jɛkulu kelen-kelen bɛɛ weleweledalaw ka kan ka jɛya a la k’u bɛ dan u ka danyɔrɔw dancɛw la walisa u kana sennatigiw degun jagokɛyɔrɔw la, walima ka baarakɛlaw degun u ka jagokɛyɔrɔ la, i n’a fɔ taajifeerelaw, o minnu ka yɔrɔw dayɛlɛlen don su fara tile kan. Walisa ka jɛya a la k’an b’an ka cidenyabaara kɛ cogo ɲɛnabɔlen na, ni danbe ye, danyɔrɔ min dira an ma, an man kan ka baara kɛ o kɔ kan fo n’a y’a sɔrɔ mabɛn kɛrɛnkɛrɛnnenw kɛra jɛkulu wɛrɛ baara lakɔlɔsibaga fɛ walisa k’u dɛmɛ. (A suma ni 2 Kɔrɛntekaw 10:13-15 ye.)

¹⁸ Kɛnɛ caman bɛ jɛkulu minnu bolo, ni o yɔrɔ la kɛnɛ kan waajuli bɛ se ka kɛ, jɛkulu dɔw ye o yɔrɔw kolabɛn ka kɛ danyɔrɔw ye. O la sa, danyɔrɔ karati tila-tilara ka kɛ welewedala kelen ka danyɔrɔ walima kulu ka danyɔrɔ ye. O b’a nɔgɔya kosɛbɛ walisa ka se ka danyɔrɔ kɛ koɲuman ani k’a bali fana weleweledala caman ka baara kɛ yɔrɔ kelen ani waati kelen na, ka kɛɲɛ ni sariyakolo ye min bɛ 1 Kɔrɛntekaw 14:40nan kɔnɔ ko: “Nka fɛn bɛɛ ka kɛ cogo bɛnnen na, a ko ɲɛnabɔlen koɲuman.”

¹⁹ An yecogo ka kan ka danbe jira tuma bɛɛ ani k’an jira koɲuman cidenyabaarakɛlaw ye Jehowa tɔgɔ bɛ minnu kan. O fana ye tiɲɛ ye an ka baarakɛminɛnw ko la. Bololabɔrɔ minnu kɔrɔla fo ka fara-fara ani Bibulu minnu yɔrɔ bɔra ɲɔgɔn na, walima minnu ɲɛ tiɲɛna, o fɛnw bɛ dɔ bɔ Masaya cikan nafa la. Mɔgɔ dɔ y’a fɔ ko an ka finiw ani an kun labɛncogo “b’a jira joona an ye mɔgɔ min ye, an kɛcogo an’an jɔyɔrɔ ye min ye kow sigicogo la”. O la sa, an ka finiw man kan ka kɛ fɛnw ye iko an m’an mago don u la, walima ka kɛ fɛn damatɛmɛlenw ye. Nka tuma bɛɛ, u ka kan ka ‘bɛn kibaru duman ma’.—1 Timote 2:9, 10 (NW) lajɛ.

²⁰ Ciden Pol b’a fɔ 1 Kɔrɛntekaw 9:26nan (NW) na ko: “Ne bɛ ka boli cogo min na, o tɛ kɛ ni siga-siga ye. Ne bɛ n’ ka daɲa kɛ cogo min na, o bɛ kɛ walisa n’ kana fiɲɛ bugɔ.” An kɛtɔ ka Piɛrɛ ladege, an fana jɔlen ka to a kan ka baara ɲuman ni baara nafama kɛ. I n’a fɔ Jehowa ka ‘ntɔnw kɛlɛbolo’ mɔgɔ dɔ, tuma min an b’an niyɔrɔ kɛ ni timinandiya ye seereya baara la, an ka kisili cikan lase bɛɛ ma an ka danyɔrɔ la. An k’o kɛ ka kɛɲɛ ni cogo bɛrɛ bɛnnen ani faranfasiyali ye, o minnu bɛnnen don Krecɛnw ma.