Dɔnniya min bɛ na ni ɲɛnamaya banbali ye, an k’o gafe jira Desanburukalo la
1 Dɔnniya min bɛ na ni ɲɛnamaya banbali ye! Nin gafe in dilanna walisa ka mɔgɔw dɛmɛ ka tiɲɛ dɔnniya jɔnjɔn sɔrɔ teliya la. Desanburukalo la, an bɛna taa’ fɛ k’a jira an ka danyɔrɔ la. An bɛ se ka mun fɔ walisa k’an lamɛnbagaw nege lawuli?
2 Ka ɲɛsin mɔgɔw ma minnu ka limaniya dɔgɔyara Ala ta fan fɛ, nin ye kumajiracogo dɔ ye min bɛ se k’u nege lawuli:
◼ “Mɔgɔ caman minnu mɔna Ala dannaya kɔnɔ, u b’a ye k’u ka limaniya man bon i n’a fɔ a tun bɛ cogo min na. E yɛrɛ ɲɛ na, a kun bɛ se ka kɛ mun ye? [An k’a tigi to ka jaabi di.] An ka limaniya Ala la, o bɛ bonya n’an bɛ miiri diɲɛ n’a kabakow ma. [An ka Zaburu 19nan, a tilayɔrɔdennin fɔlɔ kalan.] Mɔgɔ min ka sariya bɛ boli sankolo fɛnw kan, o tigi de fana bɛ sariya ɲumanw di an ma, sariya minnu b’an ɲɛminɛ. [An ka Zaburu 19:7-9nan kalan.] An bɛ se ka fɛn o fɛn dɔn Ala an’a ŋaniyaw ko la, o tɛmɛsiraw b’a jira ko nafa b’o la. [Ja min b’a ɲɛ 4nan ni 5nan na, o jira a la. Sɛbɛnni minnu bɛ ja kan, olu kalan.] N’i b’a fɛ k’o dɔnniya kɛrɛnkɛrɛnnen sɔrɔ, a bɛna diya n’ ye ka nin gafe in to i bolo.”
3 N’an miirila masibako dɔ la min kɛra kɔsa in na, an bɛ se ka fɔ ko:
◼ “Siga t’a la, i y’a mɛn ko [o ko fɔ]. An ɲɛ bɛ tilenbaliyako ni tɔɔrɔko minnu na, walima olu minnu sera an ma, yali i y’i yɛrɛ ɲininka ni Ala bɛ hami tiɲɛ na olu ko la wa? [An ka to a ka jaabi di.] Bibulu b’a jɛya an ye ko Ala b’an kanu wa k’a bɛna an dɛmɛ waati gɛlɛnw na.” An ka Zaburu 72:12-17nan yɔrɔ dɔw kalan. An ka gafe dayɛlɛ a ɲɛ 70nan na, k’a jira ko Dɔnniya min bɛ na ni ɲɛnamaya banbali ye, k’o gafe bɛ jaabi di ɲininkali kan, mɔgɔw miliyɔn caman b’u yɛrɛ ɲininka min na, n’o ye ko: Mun na Ala ye tɔɔrɔ labila? “Bibulu bɛ o ɲininkali in min jaabi di, i bɛna’ ye k’o bɛ mɔgɔ dusu saalo. N’ b’a fɛ ka nin gafe in to i bolo walisa i yɛrɛ ka se k’a dɔn.”
4 N’an ni denfa walima denba dɔ bɛnna, an ka kuma denbaya ko kan:
◼ “Bangebagaw caman sɔnna a ma k’a ka gɛlɛn ka hɛrɛ sɔrɔ denbaya kɔnɔ. E yɛrɛ ɲɛ na, fɛnba jumɛnw de b’o bali? [An ka to a ka jaabi di.] An fanba b’an seko kɛ, nka an bɛɛ b’a fɛ k’a dɔn min bɛ se k’an dɛmɛ ka nafa caman sɔrɔ kosɛbɛ tun o la. Bibulu bɛ laadilikan ɲumanw di. [An ka Kolosekaw 3:12, 18-21nan yɔrɔ dɔw kalan.] Fɛnw caman bɛ Bibulu fɛ ka fɔ o kan iko gafe masalakun 15nan b’a jira cogo min na, n’o kumakun ye ‘Denbaya dɔ jɔ min bɛ Ala bonya’. Bibulu kɔnɔ laadilikan minnu b’a jira furuɲɔgɔnw ka bɛnbaliya bɛ ɲɛnabɔ cogo min na, ani denmisɛnw bɛ dɛmɛ cogo min na walisa ka gɛlɛya kunbɛn, olu dalajɛlen don a kɔnɔ. N’ dalen b’a la k’a kalanni bɛna diya i ye.”
5 N’an b’a fisaya ka kuma kun surunya, an bɛ se ka kuma dabɔ nin cogo la:
◼ “Yali i delila k’i yɛrɛ ɲininka mun na an bɛ kɔrɔ ka sa? Gafe in masalakun 6nan b’a ɲɛfɔ saya sababu ye min ye ani cogo min na Ala bɛna dan bila o la. Bibulu b’a fɔ an ye ko Ala ye ɲɛnamaya banbali layidu ta mɔgɔw ye, mɔgɔ minnu b’a kanu. [An ka Yuhana 17:3nan kalan.] N’i b’a fɛ ka dɔ dɔn ka fara o kan, nin kitabu in min bɛ dɔnniyaba di, o bɛna diya i ye.”
6 N’an labɛnnen don koɲuman, an bɛna se ka baara kɛ ni nin gafe in ye walisa ka ‘Sɛbɛnniw dayɛlɛ cogo dafalen na’ an mɔgɔɲɔgɔnw ye, u ka nisɔndiyaba kama.—Luka 24:32.