Lakɔlɔsibagaw bɛ ɲɛmɔgɔya ta—Ala-ka-marako Cidenyabaara Kalan Lakɔlɔsibaga
1 Ala-ka-marako Cidenyabaara Kalan lakɔlɔsibaga ye cɛ kɔgɔlen ye hakili ta fan fɛ, min bɛ baaraba kɛ kuma waajuli ni mɔgɔw lakalanni na. A ka kan n’an ka bonya n’an ka dɛmɛ ye. (1 Tim. 5:17) A jɔyɔrɔ baaraw ye jumɛnw ye?
2 Ale de b’i jan to Ala-ka-marako Cidenyabaara Kalan ka sɛbɛnmarayɔrɔ la min bɛ Masaya So kɔnɔ. A mankutu bɛ mɔgɔ o mɔgɔ la, a b’i mago don o tigi la ni diyanye ye ka dusu don a la a k’a tɔgɔ sɛbɛn kalan na. A b’i jɛya’ la ko kunnafonimarasɛbɛn lasagonnen don tigitigi ani ko barokunw dira cogo ɲɛnabɔlen na. Kalan sigi o sigi, o baara ka kan ka di ka kɔn dɔgɔkun saba dɔgɔyalenba ɲɛ. A nege b’a la ka jɛkulu dɔn kosɛbɛ, k’a hakili to kalanden kelen-kelen bɛɛ la an’a semakow la. Hali ni balimakɛ wɛrɛ bɛ se ka kɛ a bolo min b’a dɛmɛ ka kalan bolodasira labɛn, lakɔlɔsibaga yɛrɛ de ka kan ka barokunw tilali lakɔlɔsi.
3 Walisa a ka se ka kalan kɛ k’a ɲɛ, lakɔlɔsibaga ka kan k’a labɛn ni timinandiya ye dɔgɔkun o dɔgɔkun, ka kalan sudalen kalan ni sɛbɛ ye. O b’a to a ka kalan bolodasira diya mɛnta don jɛkulu la, k’a dɔn ni barokun dilen kɛra a cogo la tigitigi, ani ka kalan kolomayɔrɔw sankɔrɔta, seginnkanni sɛbɛnnen sen bɛ o minnu na.
4 A kɛlen kɔ k’a tulo majɔ kalanden kelen-kelen bɛɛ ka jɛmukan kɔrɔ, lakɔlɔsibaga na kalanden tanu k’a ɲɛfɔ mun na jɛmukan kɛcogo dɔ ɲɛna wala mun na yɛlɛmaw ka kan ka don a la walisa a ka fisaya. Ni dɛmɛbaga mago bɛ dɔ la walisa k’a bilasira a ka barokun labɛnni na, lakɔlɔsibaga wala a ɲɛnamɔgɔ wɛrɛ bɛ se k’o dɛmɛ don.
5 Walisa ka nafa dafalen sɔrɔ Ala-ka-marako Cidenyabaara Kalan lakɔlɔsibaga ka baaraba la ka fara a dɛmɛbagaw ta kan, an ka kan ka taa kalan na tuma bɛɛ. An ka kan fana k’an ka barokun dilenw kɛ ani ka laadilikanw sirataama, laadilikan minnu bɛ di an ma ani minnu bɛ di kalanden tɔw ma. O cogo la, an na ɲɛtaa sɔrɔ an ka setigiya la ka Masaya ka cikan jira jama la ani du-ni-du.—Kɛw. 20:20; 1 Tim. 4:13, 15.