U b’u mago don Makɛ ka nafolo la

¹ Bibulu sɛbɛnwaati la, fɛn caman tun bɛ kalifa sokunnasigibaga ma. O cogo de la Ibrahima ye ci bila a ka sokunnasigibaga ma walisa a ka muso ɲini a denkɛ Isaka ye (Jen. 24:1-4). Sangatigiya tun bɛ o sokunnasigibaga bolo ka Ibrahima denbolo kɛ fɛn mɛnta ye. O tun ye sangatigiyako yɛrɛ de ye. O la sa, balannako tɛ ko Pol k’a fɔ ko: “Min bɛ ɲini koɲɛnabɔbagaw, [“sokunnasigibagaw”, NW] fɛ, o ye ko: u ka kɛ dannamɔgɔw ye.”—1 Kɔr. 4:2.

Krecɛn ka koɲɛnabɔli

² Bibulu bɛ Krecɛn ka cidenyabaara ɲɛ dɔw kofɔ iko koɲɛnabɔliw. Misali la, ciden Pol tun kumana Efesekaw fɛ ko ‘Ala ka nɛɛma ko (“koɲɛnabɔli”, NW) min kalifara ale ma u ye’. (Efe. 3:2; Kol. 1:25.) Ci min tun b’a kan ka kibaru duman kofɔ siyaw ye, a tun b’o mafilɛ iko koɲɛnabɔli. O ko la a tun ka kan ka kɛ kantigi ye (Kɛw. 9:15; 22:21). Ciden Piɛrɛ y’a sɛbɛn a balima munnenw ma ko: “Aw ka kɛ ɲɔgɔn jatigi ye ni dajukɔrɔ kuma tɛ. Aw bɛɛ kelen kelen ye nilifɛn min sɔrɔ, aw ka ɲɔgɔn mago ɲɛ ni o ye, ka kɛ Ala ka nɛɛma sifa caman marabaga ɲumanw ye.” (1 Piɛ. 4:9, 10; Heb. 13:16). Fɛn o fɛn tun bɛ san kɛmɛ fɔlɔ Krecɛnw bolo, o tun bɛ bɔ Jehowa ka nɛɛma de la. O la sa, u tun ye o kow kunnasigibagaw ye ani u tun ka kan ka baara kɛ n’u ye cogo la min bɛ bɛn Krecɛn ma.

³ Bi bi in na fana, Jehowa Seerew bɛ fɛnw ye o cogoya kelen de la. Ikomi u y’u yɛrɛ latɛmɛ Jehowa Ala ma, u b’a jate ko fɛnw bɛɛ minnu b’u bolo i n’a fɔ u ka ɲɛnamaya, u farikolo barika ani u ka nafolo, k’olu ye “Ala ka nɛɛma sifa caman” denw ye. Iko sokunnasigibaga ɲumanw, u b’a dɔn k’u bɛ baara kɛ n’o fɛn ninnu ye cogo min na, k’o sangatigiya b’u bolo Jehowa Ala ɲɛ na. Ka fara o kan, kibaru duman dɔnniya dira u ma. O fana ye fɛn kalifalen ye u ma. O ko la u b’a kanu ka baara kɛ n’o ye cogo bɛɛ la fisaman na. O baara ye ka nɔɔrɔ da Jehowa tɔgɔ kan ani ka mɔgɔ wɛrɛw dɛmɛ ka tiɲɛ dɔnniya sɔrɔ.—Mat. 28:19. 20; 1 Tim. 2:3, 4; 2 Tim. 1:13, 14.

⁴ Jehowa Seerew b’u ka koɲɛnabɔli baara kɛ cogo jumɛn na? Salon baara dantigɛli b’a jira k’u ye lɛrɛ hakɛ min kɛ ka ‘Masaya kibaru duman’ waajuli kɛ dunuya kɔnɔ, k’o ka ca ni miliyari kelen ye, ani ko mɔgɔ minnu ye mago jira kɛ ka ɲɛsin kibaru duman ma, u ye Bibulu so kɔnɔ kalan minnu ɲɛminɛ n’u ye, k’o tun ye 4500000 ye (Mat. 24:14). U y’a jira fana k’u ye Jehowa ka sokunnasigibaga kantigiw ye tuma min na u ye bolomafaraw kɛ ni fonisireya ye walisa ka baara kɔkɔrɔmadondo diɲɛ kɔnɔ, ani ka Masaya So minɛ cogo ɲuman na, ani fana ka kɛ kafo lakɔlɔsibagaw ni Krecɛn wɛrɛw jatigiw ye. U ye ɲumanya jira fana min ye man di ka ɲɛsin dɛsɛbagatɔw ma, misali la, minnu ye maramafɛn kɛlɛw kasaaratɔw ye. Foroba jate la, Krecɛn lakikaw b’u mago don Makɛ ka nafolo la cogo la min ye a bɛɛ la fisaman ye.

“Sokunnasigibaga dannamɔgɔ hakilitigi”

⁵ O koɲɛnabɔli tɛ kɛ dɔrɔn mɔgɔ kelen-kelen bɛɛ yɔrɔ, nka fana jamakulu ta fan fɛ. Yesu kumana Krecɛn jɛkulu ko la dugukolo kan i n’a fɔ ‘Sokunnasigibaga dannamɔgɔ hakilitigi’ dɔ (Luk. 12:42, NW). O “Sokunnasigibaga dannamɔgɔ” ka sangatigiya ye ka “dumuni” di ani ka kibaru duman waajuli kɛ jamanaw bɛɛ la (Jir. 12:17). Ka ɲɛsin o ma, Ɲɛmɔgɔya Kulu min ye o sokunnasibaga dannamɔgɔ kulu ka kumalasebaga ye, a ye sangatigiya sɔrɔ Ala fɛ k’a ka “wari talan” kow ɲɛnabɔ cogo la min bɛ bɛn (Mat. 25:15). “Sokunnasigibaga dannamɔgɔ hakilitigi” cogo la, bolofara baaradaw caman bɛ cɛsiri bɛnnenw bɛɛ kɛ walisa ka baara kɛ ni bolomafaraw bɛɛ ye sangatigiya cogo la walisa ka Masaya mago lataa ɲɛ. O bolomafara ninnu bɛ kɛ dannaya dafalen kɔnɔ. Sangatigiya bɛ “Sokunnasigibaga dannamɔgɔ hakilitigi” bolo k’a mago don u la walisa baara ka kɛ n’u ye ka bɛn ni u di kun ye, nka, ni hakilitigiya ye, wa wari kana tiɲɛ fana, ani sigi kelen bɛ ni nafa min ye, o ka sɔrɔ.

⁶ Min ye ka baara kɛ ni hakilitigiya ye ni bolomafaraw ye, an bɛ misali sɔrɔ Jehowa Seerew ka sɛbɛnw bɔli baara yiriwali la san kɛmɛ mugannan in kɔnɔ. Bibuluw ani sɛbɛn minnu sinsinnen don Bibulu kan: sɔn-ni-sɔn gafeninw, gafew, gafeninw, sɛbɛndenninw ani Masaya Kibaruyaw sɛbɛnw, olu ye ɲɛciba sɔrɔ “kibaru duman” jɛnsɛnni na “donw laban” na (Mar. 13:10; 2 Tim. 3:⁠1). Min ye La Tour de Garde ta fan ye, ale de ye barakɛminɛn fɔlɔ ye walisa ka “dumuni di a tuma na” “Ala ka du” kɔnɔmɔgɔw ma, ani u jɛɲɔgɔnw, saga wɛrɛw “jamaba” mɔgɔw fana ma. — Mat. 24:45; Efe. 2:19, NW; Jir. 7:9; Yuh. 10:⁠16.

⁷ A daminɛ na, Jehowa Seerew ka sɛbɛnw bɛɛ tun bɛ bɔ sɛbɛndilanyɔrɔw la wari la, nka, san 1920nan n’o kɔ taw la, u y’a latigɛ ko nafa tun na kɛ a la, ani k’a tun na fisaya sɔrɔ ta fan fɛ, ko Jehowa ka magannaw yɛrɛ k’u ka sɛbɛnw dilan. Daminɛ fitininw kɔfɛ, san 1920nan na, sɛbɛnw dilanni baara yiriwala dɔɔnin dɔɔnin Brooklyn New York ka na laban ka kɛ fɛnba ye. San 1967nan na, sankasoba minnu tun bɛ kare naani fa, olu de tun kɛlen bɛ sɛbɛndilanyɔrɔ ye. U y’a daminɛ fana ka sɛbɛnw dilan jamana wɛrɛw la, nka, o baara nin nana jɔ o jamana caman na k’a sababu kɛ Diɲɛ Kɛlɛba Filanan ye.

⁸ Nka, u n’u ka bonya bɛɛ, sɛbɛnw dilanni min bɛ kɛ Ameriki jamana na, o ma labɔli kɛ walisa ka sɛbɛnw di diɲɛ yɔrɔw bɛɛ la. San minnu tugura kɛlɛ kɔ, olu kɔnɔna na u ye sɛbɛnw dilanni daminɛ, walima u taara’ fɛ jamana caman na. Afriki du Sud, Alemaɲi Federal, Angiletɛri, Kanada, Danemarke, Gɛrɛse ani Suwisi sen b’o jamanaw na. San 1970nan daminɛ na, Ostrali, Berezil, Fɛnlande, Gana, Japɔn, Nizeria ani Filipine jamanaw nana fara tɔw kan. Jamana dɔw sɛbɛndilanyɔrɔ bɛ gafew de dilan. O waati kelen na, Gileyad cidenw degela sɛbɛndilanyɔrɔ baara kama ani k’u ci o jamana ninnu dɔw la walisa ka balimakɛw dɛmɛ k’o baara kɛ.

⁹ San 1980nan ninnu kɔnɔna na, jamana minnu na sɔn-ni-sɔn gafeninw bɛ dilan, o jamanaw hakɛ ye 51 sɔrɔ.a Min tun ye ka baara kɛ ni Makɛ ka nafolo ye, o kow bɛɛ tun kɛra cogo ɲumanba ye o ko la! O tun ye seereyaba dɔ ye Masaya baara yiriwali la! Jehowa Seere miliyɔn minnu bɛ ‘Jehowa bonya n’u bolofɛn nafaman bɛɛ ye’, o ko ye u ka kɔkɔrɔmadondoni nafama seereyaba ye (Nta. 3:9)! O cogo la, Jehowa tun y’u sɔn cogo caman minnu na, u y’u yɛrɛ jira sokunnasigibaga ɲumanw ye ka ɲɛsin o kow ma.

Yecogo yɛlɛmani

¹⁰ San 1970nan ninnu kɔnɔna na ani san 1980nan n’o kɔ taw daminɛ na, ɲɛtaa caman kɛra sɛbɛndilanni ko la. Jehowa Seerew ye fɛɛrɛ kuraw ta. Fo o tuma na, u tun bɛ sɛbɛnw dilan iko sɛbɛnw bɛ dilan cogo min na ka kɔrɔ, n’o ye typographie ta ye. [Typograhie mansin na, siginidenw wala jɔlitaamasyɛn sigira nɛgɛ kan. Lankiri bɛ bɔn o kan. U bɛ tila k’o nɛgɛ dafiri furajɛ kan u kɛtɔ k’u digi a kan.] O cogo yɛlɛmana dɔɔnin dɔɔnin. U y’a daminɛ ka sɛbɛndilancogo kura offset ta. [O ye mansin belebele dɔ de ye min kɛlen bɛ ni nɛgɛburuw (cylindre) caman ye. Jaw ni masalabolow nɔ bɛ bila nɛgɛfalafa dɔ kan cogo kɛrɛnkɛrɛnnen na. Nɛgɛfalafala in bɛ kɛ ka nɛgɛburuw meleke mansin kɔnɔ. Nɛgɛburuw bɛ munumunu ɲɔgɔn fɛ ni teliya ye. Lankiri bɛ bɔn nɛgɛfalafala kan. Furajɛ tɛmɛtɔ nɛgɛburuw ni ɲɔgɔn cɛ, jaw ni masalabolo nɔ bɛ bɔ a kan.] O cogo de la sɛbɛn cɛɲiw bɛ bɔ sisan ni jaw ye minnu ɲɛw ye naani ye sanni u ɲɛ ka kɛ fila ye (finman ni ɲɛ wɛrɛ) iko a tun bɛ cogo min na sɛbɛndilancogo kɔrɔ la, n’o ye typographie ta ye. O kɔfɛ, baara minnu bɛ kɛ sanni sɛbɛndilanni yɛrɛ ka kɛ, ɔrdinatɛri ye yɛlɛma don olu la. O la sa, . Jehowa Seerew ye fɛɛrɛ dɔ yiriwa ko Système de Photocomposition Électronique Multilingue (MEPS), kunnafoniw dicogo fɛɛrɛ dɔ min bɛ kɛ ɔrdinatɛri fɛ. A b’a to sɛbɛndilanni bɛ kɛ kan caman na minnu ka ca ni 370 ye. Min ye ka baara kɛ nin kanw ɲɔgɔnna na, kunnafoniw dicogo fɛɛrɛw si tɛ yen min bɛ feere diɲɛ kɔnɔ n’a bɛ se ka suma ni MEPS ta ye.

¹¹ MEPS ani fɛɛrɛ kura wɛrɛw sababu la, i n’a fɔ batakiw laseli ɔrdinatɛri fɛ, ɲɛtaaba wɛrɛ sera ka kɛ dumuni bɔli la a waati la. Fɔlɔ la, fɛɛrɛ kɔrɔw fɛ, sɔn-ni-sɔn gafeninw barokunw kan wɛrɛw la minnu tɛ angilɛkan ye, u tun bɛ bɔ kalo caman, tuma dɔ yɛrɛ la, san kelen o barokun kelenw bɔlen kɔfɛ angilɛkan na. Sisan, La Tour de Garde bɛ bɔ kan 115 la ɲɔgɔn fɛ, ani Réveillez-vous! bɛ bɔ kan 62 la ɲɔgɔn fɛ. O kɔrɔ ko diɲɛ kɔnɔ, La Tour de Garde dɔgɔkun kalan min kolabɛnna Jehowa Seerew fɛ, mɔgɔ minnu bɛ na o la, kɛmɛ o kɛmɛ la, 95 bɛ barokun kelen de segɛsɛgɛ waati kelen fana na. O ye duba ye sa dɛ! Cogo sɔsɔbali la, ka nafolo don o fɛɛrɛ kura ninnu na, o ye ka baara kɛ cogo ɲuman na ni Makɛ ka nafolo ye!

Magow caman kolabɛncogo ko la

¹² O fɛɛrɛ kura ninnu kosɔn, Jehowa Seerew ka jamakulu magow yɛlɛmana ka ɲɛsin diɲɛ fan bɛɛ sɛbɛndilanni ko ma. Mansinw offset ka teli kosɛbɛ ani u da ka gɛlɛn kosɛbɛ fana ni typographie mansinw ye. Nafa bɛ ɔrdinatɛri ani kunnafoni fɛɛrɛ minnu na walisa ka baara kɛ sanni sɛbɛnw yɛrɛ dilanni ka daminɛ — a sɛbɛnni, a yɛlɛmali kan wɛrɛw la, baara min bɛ kɛ ka sɛbɛn cɛɲɛ ani u farali ɲɔgɔn kan ka kɛ fɛn kelen ye — olu ye fɛnw ye minnu bɛ cogo camanba di ka tɛmɛ fɛɛrɛ kɔrɔw kan, nka u sɔngɔ ka ca kosɛbɛ. A jɛyara joona ko nafa tun t’a la tuguni ka sɔn-ni-sɔn gafeninw dilan jamana 51 na. O kosɔn, san 1990nan n’o kɔ taw la, “sokunnasigibaga dannamɔgɔ” ye ko mafilɛ ko kura. Mun bɔra o la?

¹³ Kalanw y’a jira ko “fɛn nafamaw” minnu dira Jehowa Seerew ani u teriw fɛ, ko baara bɛna se ka kɛ n’u ye ka ɲɛ ni sɛbɛndilanni baara kolabɛnna ko kura. Tɔn bolofara minnu tun bɛ sɛbɛn dilan, dɔ bɔra dɔɔnin dɔɔnin u hakɛ la. Alemaɲi ye sɔn-ni-sɔn gafeninw dilanni ta ko kura Erɔpe kɔrɔn yanfan n’a tilebin yanfan jamana caman ye, o jamana minnu dɔw tun b’u ka sɔn-ni-sɔn gafeninw dilan u yɛrɛw ye fo ka se o tuma ma. Itali bɛ sɔn-ni-sɔn gafeninw ani sɛbɛnw di Afriki ni Erɔpe worodugu yanfan jamanaw ma, ka fara Gɛrɛse ni Albani kan. Afriki la, Nizeria ni Afriki du Sud dama de bɛ sɔn-ni-sɔn gafeninw dilan. O kolabɛncogo kura ɲɔgɔn kɛra diɲɛ yɔrɔ caman na.

Ko minnu ka kan ka jateminɛ

¹⁴ San 1998 Zuluyekalo la, sɔn-ni-sɔn gafeninw dilanni bɛna dabila Erɔpe jamana dɔw la, iko Otrisi, Danemarke, Faransi, Gɛrɛse, Peyiba ani Siwisi. Sɔn-ni-sɔn gafeninw bɔli ka ɲɛsin Erɔpe ma, o bɛna kɛ Alemaɲi, Angiletɛri, Espaɲi, Fɛnlande, Itali ani Suyɛde fɛ. Musaka fuw bɔli na bali o cogo la. Yɛrɛma bolomafara minnu bɛ kɛ ka ɲɛsin baara ko ma diɲɛ bɛɛ kɔnɔ, baara bɛna kɛ n’u ye ka ɲɛ. Sinsi kɛra kun jumɛnw kan walisa ka jamanaw sugandi minnu bɛna taa’ fɛ ka sɛbɛnw dilan ani minnu bɛna u dilanni dabila? Ka kɛɲɛ n’a ka ci ye, n’o ye k’a mago don ni hakilitigiya ye Makɛ ka nafolo la, “sokunnasigibaga dannamɔgɔ” ye sɛbɛnw dilanni sɔngɔ an’u tilatilali musakaw jateminɛ jamana kelen-kelen bɛɛ la. Jamana kelen-kelen bɛɛ ka sariyaw jateminɛna walisa k’a lajɛ yɔrɔ min na sɛbɛnw tun bɛna se ka dilan ani ka tilatila sariyakanko lahaalayaw bɛɛ la fisaman kɔnɔ.

¹⁵ Kun fɔlɔ min kosɔn sɛbɛnw dilanni bɛna dabila jamana dɔw la ani ka yiriwa dɔ wɛrɛw la, o ye ka kow nɔgɔya. A ka nɔgɔn kosɛbɛ ka sɛbɛnw dilan jamana kelen na jamana caman wɛrɛw ye ka kɛnyɛ n’u magow ye. O cogo la, baara bɛ kɛ ni minɛnw sɔngɔ gɛlɛn minnu ye, baara ɲuman n’a kɛ n’u ye. K’a ta sisan ma, sɛbɛnw dilanni bɛ kɛ dɔrɔn yɔrɔ minnu na u sɔngɔ ka nɔgɔ kosɛbɛ, ni baarakɛminɛnw bɛ yen ani n’u bɛ ci lahaalaya ɲumanw kɔnɔ. O cogo la, baara ɲuman bɛ kɛ ni Makɛ ka nafolow ye. A jɛlɛn don k’o kɔrɔ tɛ ko sɛbɛnw dilanni bɛ dabila jamana minnu na, k’o jamanaw na waajuli bɛna dabila. Sɛbɛnw hakɛ camanba bɛna sɔrɔ yen, ani Jehowa Seerew waa kɛmɛ caman minnu bɛ balola o jamana ninnu na, u bɛna taa’ fɛ ka “hɛrɛ kibaru duman” kofɔ u mɔgɔ ɲɔgɔnw ye (Efe. 2:17, NW). Ka fara o kan, kɔmana hɛrɛmaw caman bɛ o kolabɛncogo ko kura la.

¹⁶ Misali la, mansin kuraw fanba minnu tun bɛ Danemarke, Gɛrɛse, Peyiba ani Siwisi, olu cira Nizeria ani Filipine. Erɔpe jamanaw mansinw bolibaga ŋanaw sɔnna ka taa ni mansinw ye ani ka balimakɛw dege yen walisa olu yɛrɛw ka tila k’u boli. O la sa, sisan, o jamanaw bɛ ni sɔn-ni-sɔn gafenin kelenw ye minnu bɛ ni mankutuba iko jamana tɔw.

¹⁷ I ka nafa wɛrɛ fana jateminɛ: Sɔn-ni-sɔn gafeninw dilanni bɛ taa’ fɛ jamana damadɔ minnu na, u dilan sɔngɔ bɛ o jamanaw de kan sisan. O la sa, jamana minnu na sɔn-ni-sɔn gafeninw dilanni dabilala, wari bɛ yen sisan fɛn wɛrɛw kama. Misali la, ka Masaya Sow jɔ, walima balimakɛ minnu bɛ faantan jamanaw na, k’olu magow ɲɛ. O cogo la, ka baara kɛ koɲuman ni Makɛ ka nafolo ye, o b’a to ciden Pol ye bataki min ci Korɛntekaw ma, o kumaw ka se ka sirataama ka ɲɛ jamanaw bɛɛ la ko: ‘A tɛ ko aw ka degun, walisa dɔw ka lafiya, nka aw bɛɛ ka kɛnye. Aw ka nafolo caya bɛ olu ka faantanya mago ɲɛ sisan, [...] walisa aw bɛɛ ka kɛnye.’—2 Kɔr. 8:13, 14.

¹⁸ O kolabɛncogo ko kura sababu la, diɲɛ bɛɛ kɔnɔ, Jehowa Seerew b’a ye k’u ka surun ɲɔgɔn na kosɛbɛ. Jehowa Seere minnu bɛ Danemarke, olu fɛ kunko tɛ u ka sɔn-ni-sɔn gafeninw ka dilan Alemaɲi, hali n’a y’a sɔrɔ u yɛrɛw tun bɛ deli k’u dilan. Waleɲumandɔn b’u la kosɛbɛ ka ɲɛsin u balimakɛw ka baara ma Alemaɲi. Yali Jehowa Seere minnu bɛ Alemaɲi u bɛ dimi k’u ka bolomafaraw bɛ kɛ ka sɛbɛnw dilan minnu sinsinen don Bibulu kan Danemarke, Irusi, Ukɛrɛni walima jamana wɛrɛw ye wa? Ayi dɛ. U nisɔndiyalen don k’a dɔn k’u balimakɛ minnu bɛ o jamanaw na, k’u ka bolomafaraw bɛ se ka kɛ sisan ka mago wɛrɛw ɲɛ.

An ka mago don nafolo la

¹⁹ Diɲɛ bɛɛ la, Jehowa Seerew ka Masaya So kelen-kelen bɛɛ kɔnɔ, buwati dɔ bɛ yen bolomafaraw kama, n’a tɔgɔ ye ko “Tɔn ka diɲɛ kɔnɔ baara kɔkɔrɔmadondoni bolomafaraw — Matiyu 24:14”. Yɛrɛma bolomafaraw minnu bɛ bila o buwatiw kɔnɔ, u bɛ kɛ ka mago ɲɛ, a kɛra yɔrɔ o yɔrɔ ye. “Sokunnasigibaga dannamɔgɔ” ani Tɔn bolofaraw de b’a latigɛ min bɛ kɛ n’u ye. O cogo de la, yɔrɔ min na sariya b’a yamaruya, bolomafara minnu bɛ bila buwati kɔnɔ jamana dɔ la, o bɛ se ka ta ka Jehowa Seerew ka baara kɔkɔrɔmadondo jamana wɛrɛ la, o min n’o yɔrɔ kilomɛtɛrɛ hakɛ bɛ se ka caya ni waa caman ye. Jamana dɔw la, o bolomafara suguw bɛ ta ka dɛmɛ don Krecɛnw ma minnu ye kasaaratɔw ye fiɲɛbaw, sanjibaw, dugukolo yɛrɛyɛrɛw walima kɛlɛw la. U bɛ kɛ fana ka cidenw kɔkɔrɔmadondo jamanaw na minnu ka ca ni 200 ye.

²⁰ Tuma caman na, Jehowa Seerew ka jɛkulu kɔnɔ, kuma tɛ kɛ wari kow kan fo siɲɛ kelen kalo o kalo, wa sanga damadɔ dɔrɔn kɔnɔ. Wari ɲini tɛ kɛ Masaya Sow kɔnɔ walima jamalajɛw la. Wari tɛ ɲini fana mɔgɔ si fɛ, wa a tɛ fɔ mɔgɔ dɔw ye fana k’u ka wari ɲini an ye. Min bɛ deli ka kɛ, o ye ko La Tour de Garde bɛ barokun kelenpe dɔrɔn bɔ san o san walisa k’a ɲɛfɔ mɔgɔw ye minnu b’a ŋaniya ka bolomafaraw di Watch Tower Tɔn ma, o bolomafaraw bɛ se ka kɛ cogo min na walisa ka baara kɔkɔrɔmadɔndo diɲɛ bɛɛ kɔnɔ. Tɔn ka wari ko kuma tɛ deli ka ɲɛfɔ Réveillez-vous! kɔnɔ. Cogo jumɛn na dun diɲɛ bɛɛ kɔnɔ waajuli baara belebeleba in sera ka kɛ? Mago bɛ Masaya So minnu na, olu sera ka jɔ cogo di? Tuma-bɛɛ baarakɛla kɛrɛnkɛrɛnnenw sera ka kɔkɔrɔmadondo ani Krecɛnw minnu tun mago bɛ dɛmɛ na, olu ye dɛmɛ sɔrɔ cogo jumɛn na? Jehowa dubara a ka magannaw ye cogo dakabana la ni fonisireyawale ye (2 Kɔr. 8:⁠2). Nin ko in fɛ, an bɛ foli lase bɛɛ ma minnu ye ‘Jehowa bonya n’u ka fɛn nafamaw ye’. U bɛɛ ka d’a la ko “Sokunnasigibaga dannamɔgɔ” bɛna taa’ fɛ k’a mago don Makɛ ka nafolo la! An bɛ Jehowa deli walisa fɛɛrɛ minnu tigɛra baara yiriwali kama diɲɛ kɔnɔ, a ka duba u ye.

[Duguma sɛbɛn]