Masamuso jugu ɲangira

Kabini masaso finɛtiri la Zizireyɛli, masacɛ Akabu tun be se ka Nabɔti ka ɛrɛzɛn nankɔ ye. Akabu tun b’o nankɔ fɛ ani a y’a ɲini k’a san Nabɔti fɛ. Nka Nabɔti banna k’a feere a ma sabu a tun bɛnnin tɛ ni Jehova ka sariya ye ka dugukolo feere i ye min sɔrɔ cɛɛn ye. Yala Akabu ye Nabɔti bonya a ka tilenninya kosɔn wa? Ayi. Akabu dimina kosɔbɛ. A dusu tiɲɛna haali fɔɔ a ma bɔ a ka boon kɔnɔ ani a banna ka dumuni kɛ.

Akabu muso Zezabɛli, o masamuso jugu y’a fɔ a ye ko: ‘I ye Israɛl ka masa ye. I be fɛɛn o fɛɛn fɛ, i be se k’o sɔrɔ. Ne bena o nankɔ di i ma.’ A ye lɛtɛrɛw sɛbɛ k’u ci dugu cɛkɔrɔbaw ma k’a fɔ u ye ko u k’a fɔ ko Nabɔti ye Ala dɔgɔya ani ko u k’a bon ni kabakuruw ye k’a faga. Cɛkɔrɔbaw y’o lo kɛ. O kɔ, Zezabɛli y’a fɔ Akabu ye ko: ‘Nabɔti sara. Nankɔ nin ye i ta ye.’

Zezabɛli ma Nabɔti dɔrɔn lo faga gwansan. A ye Jehova kanubaga caaman faga. A ye boliw bato ani a ye kojugu caaman wɛrɛw kɛ. Jehova y’o bɛɛ ye. A bena mun lo kɛ Zezabɛli la do?

Akabu sanin kɔ, a dencɛ Zoramu sigira masaya la. Jehova ye cɛɛ dɔ ci a ka taga Zezabɛli n’a ka somɔgɔw ɲangi. O cɛɛ tɔgɔ ko Zewu.

Zewu yɛlɛla a ka wotoro kan ka taga Zizireyɛli, Zezabɛli siginin be dugu min na. Zoramu tagara a kunbɛn wotoro kan ani k’a ɲininga ko: ‘Kɔni hɛɛrɛ lo?’ Zewu y’a jaabi ko: ‘K’i bamuso Zezabɛli to kojugukɛ la, mun hɛɛrɛ lo bena sɔrɔ?’ Zoramu y’a ka wotoro ɲɛɛ yɛlɛma ko a be boli dɔrɔn, Zewu y’a bon ni biɲɛ ye k’a faga.

O kɔ, Zewu tagara Zezabɛli kama masaso la. Zezabɛli y’a mɛn ko Zewu be nana minkɛ, a ye kale la, k’a kuun dilan ani a tagara lɔ sanbon finɛtiri la n’a be kɔnɔni kɛra. Zewu setɔ dɔrɔn, Zezabɛli y’a kunbɛn ni kuma gomanw ye. Baaraden minw tun be Zezabɛli kɔrɔ, Zewu kumana u fɛ ni kaanba ye ko: “Aw y’a minɛ k’a fili duguma!” U ye Zezabɛli ɲɔndi ka bɔ finɛtiri la, a benna ka sa.

O kɔ, Zewu ye Akabu dencɛ 70 faga ani a ye dugu saniya ka bɔ Baali batoli la. I y’a kɔrɔsi ko Jehova be fɛɛn bɛɛ lɔn ani ko a be kojugukɛlaw ɲangi wagati bɛnnin na wa?