Muso cɛ salen min denkɛ su lakununna

Jaa wagati la, Jehova y’a fɔ Eliya ye ko: ‘Taga Sarefati dugu la. Firiyamuso dɔ bena dumuni d’i ma yen.’ Eliya sera dugu donda la ani a ye firiyamuso dɔ ye a be lɔgɔ ɲinina. A ye jii deli a fɛ. K’a to muso be tagara jii bɔyɔrɔ, Eliya y’a weele tugun ko: ‘Sabari, ɲɛ n’ ma ni dumuni dɔ ye.’ Nka muso y’a fɔ a ye ko: ‘Dumuni foyi tɛ n’ fɛ k’a d’i ma. Mugu ni turu dɔrɔn lo be n’ fɛ walisa ka gwa dennin dɔ kɛ ne ni n’ dencɛ ye.’ Eliya y’a fɔ a ye ko: ‘Jehova y’a daa di ko n’i ye dumunifɛn dɔ tobi n’ ye, i ka mugu n’i ka tulu tɛna ban fɔɔ ni san ma ben tugun.’

O la do, muso donna soo kɔnɔ ka gwa kɛ Jehova ka kira ye. I ko Jehova tun y’a fɔ cogo min na, jaa tuma na, firiyamuso n’a dencɛ ye dumuni sɔrɔ tuma bɛɛ k’a dumu. A ka mugu fiyɛ n’a ka tulu daga fanin tora.

Nka o kɔ, kooba dɔ kɛra. Firiyamuso ka cɛdennin banana kosɔbɛ fɔɔ a sara. A ye Eliya deli a k’ale dɛmɛ. Eliya ye deen minɛ muso bolo ka yɛlɛ n’a ye sangaso ka boon kɔnɔna dɔ la. A y’a la dilan kan ani ka delili kɛ ko: ‘Jehova, sabari ka deen nin lakunu.’ K’o deen lakunu, o tun ye kabako ye dɛ! I b’a lɔn fɛɛn min kama wa? Sabu an kɔni be min lɔn, mɔgɔ si suu tun ma kunu ka ye ani firiyamuso n’a dencɛ tun tɛ Israɛldenw ye fana.

Nka cɛdennin niin segira a ma ani a y’a daminɛ ka nɛnɛkiri! Eliya y’a fɔ firiyamuso te ko: ‘A filɛ, i dencɛ be niin na.’ A ninsɔndiyara kosɔbɛ ani a y’a fɔ Eliya ye ko: ‘Tiɲɛn tiɲɛn na, i ye Ala ka mɔgɔ ye. Ne y’o lɔn sabu Jehova ko i ka min fɔ, i y’o dɔrɔn lo fɔ.’