Tɔɔrɔ tannan

Musa y’a fɔ Farahuna ye ko a tɛna na a fɛ tugun. Nka sanni a ka bɔ, a y’a fɔ Farahuna ye ko: ‘Ezipiti jamana mɔgɔw ka deen fɔlɔw bɛɛ bena sa dugutilama, k’a ta Farahuna dencɛ ma ka taga a bila jɔɔnw dencɛw ma.’

Jehova y’a fɔ Israɛldenw ye k’u ka dumuni dɔ kɛ min be dan na. A ko: ‘Sagaden cɛman wala bakɔrɔnin min ye saan kelen ye, a’ y’o faga ani k’a joli dɔ mɔ aw ka bondaw kan. A’ y’a sogo jɛni k’a ɲimi ni buru ye min fununin tɛ. A’ y’aw ka faniw ni sanbaraw don k’aw yɛrɛ labɛn taga kama. Suu nin na, ne bena aw hɔɔrɔnya.’ Miiri k’a filɛ Israɛldenw ɲagalila cogo min na!

Dugutilama, Jehova ka mɛlɛkɛ tɛmɛna Ezipitikaw bɛɛ ka soo. Joli tun tɛ bonda minw bɛɛ kan, o yɔrɔw dencɛ fɔlɔw sara. Nka joli tun be minw kan, mɛlɛkɛ panna olu la. Deen sara Ezipitikaw ka soo kelen kelen bɛɛ kɔnɔ, faamanw fara fantanw kan. Nka deen si ma sa Israɛldenw fɛ.

Hali Farahuna yɛrɛ ka dencɛ sara. A tun tɛ se ka muɲuli kɛ tugun. A sinna k’a fɔ Musa ni Arɔn ye ko: ‘ A’ ye wuli. A’ ye taga ka bɔ yan. A’ ye taga aw ka Ala bato. A’ y’aw ka bɛgɛnw minɛ ka taga!’

Israɛldenw tagamana ka bɔ Ezipiti jamana kɔnɔ kalo yeelen jukɔrɔ. U tun be tugura ɲɔgɔn kɔ ka kɛɲɛ n’u ka denbayaw ani u ka bɔnsɔnw ye. Cɛɛw tun ye mɔgɔ 600 000 ye, ka fara musow ni denmisɛn caaman kan. Mɔgɔ caaman wɛrɛ tugura u kɔ walisa olu fana ka se ka Jehova bato. Sisan kɔni, Israɛldenw hɔɔrɔnyara!

Saan o saan, u tun ka ɲi k’o dumuni kɛrɛnkɛrɛnnin kɛ walisa k’u hakili jigi cogo min na Jehova tun y’u kisi. O dumuni tun be weele ko Tɛmɛnkan seli.