Kabako min kɛra kɔgɔji bilen dala

Tuma min na Farahuna y’a mɛn dɔrɔn ko Israɛldenw bɔra Ezipiti jamana na, a y’a ka miiriya yɛlɛma. A y’a fɔ a ka kɛlɛdenw ye ko: ‘ A’ ye ne ka kɛlɛkɛwotorow bɛɛ labɛn ani an k’u nɔgwɛn! An tun man kan k’u bila ka taga.’ Ale n’a ka mɔgɔw y’a daminɛ ka Israɛldenw nɔgwɛn.

Jehova tun b’a ka mɔgɔw ɲɛminɛna. A tun b’o kɛ sankaba sababu fɛ tile fɛ ani tasuma yeelen sababu fɛ sufɛ. A tagara n’u ye Kɔgɔji Wulen daa la ani k’a fɔ u ye k’u ka sigi yen.

O kɔ, Israɛldenw ye Farahuna n’a ka kɛlɛbolo natɔ ye u kɔ. U tun be kɔgɔji ni Ezipitikaw ka kɛlɛbolo cɛ. U kasira k’a fɔ Musa ye ko: ‘An bena sa! I tun k’an to yen Ezipiti jamana na.’ Nka Musa ko: ‘Aw kana siran. A’ y’aw hakili sigi k’a filɛ Jehova bena an kisi cogo min na.’ Tiɲɛn na, Musa tun lanin be Jehova la. O tɛ?

Jehova y’a fɔ Israɛldenw ye k’u ka wuli ka tagama daminɛ. O loon sufɛ, a y’a kɛ sankaba tagara to Ezipitikaw ni Israɛldenw cɛ. Dibi tun be Ezipitikaw ka yɔrɔ la. Nka yeelen tun be Israɛldenw fɛ.

Jehova y’a fɔ Musa ye ko a k’a bolo wuli kɔgɔji sanfɛ. O kɔ, Jehova y’a kɛ fɔɲɔba wulila suu kuru bɛɛ la. Kɔgɔji tigɛra fila, sira bɔra cɛmancɛ la. Israɛldenw mɔgɔ miliyɔn caaman tagamana jii kogow furancɛ la, dugukolo janin kan fɔɔ ka taga bɔ faan wɛrɛ.

Farahuna ka kɛlɛbolow donna kɔdingɛ janin kɔnɔ Israɛldenw nɔfɛ. O kɔ, Jehova ye Farahuna ka kɛlɛbolow ka tagama ɲagami. U ka wotorow seenw y’a daminɛ ka bɔ. Kɛlɛdenw kulera ko: ‘An ka bɔ yan, Jehova b’an kɛlɛla ka di Israɛldenw ma!’

Jehova y’a fɔ Musa ye ko: ‘I bolo kɔrɔta kɔgɔji sanfɛ.’ Jii min tun wulila ka lɔ i ko kogo, o benna Ezipitikaw ka kɛlɛbolow kan yɔrɔnin kelen. Farahuna n’a ka kɛlɛdenw bɛɛ sara. Mɔgɔ si ma kisi.

Jamaba bɔnin kɔ kɔgɔji la, u ye dɔnkili la ka Ala tando ko: “Dɔnkili la ka Masaba [Jehova] boɲa, bari a ye koba kɛ. A ye soo ni sotigi fili kɔgɔji la.” Mɔgɔw tun be dɔnkili lara, musow tun be dundun fɔra ani ka dɔɔn kɛ. Bɛɛ dusu tun ka di sabu sisan kɔni, u hɔɔrɔnyara tiɲɛn tiɲɛn na.