Ibrahima ni Sara ye Ala kan minɛ

Dugu dɔ tun be Babɛli gɛrɛfɛ min tɔgɔ tun ko Uri. O yɔrɔ mɔgɔw tun tɛ Jehova bato, u tun be ala caaman wɛrɛw lo bato. Nka cɛɛ dɔ tun be yen min tun be Jehova kelenpe lo bato. A tɔgɔ ko Ibrayima.

Jehova y’a fɔ Ibrayima ye ko: ‘Bɔ i ka soo, faran i ka mɔgɔw la, ani i ka taga jamana dɔ la, ne bena min yira i la.’ O kɔ Ala ye layidu ta Ibrayima ye ko: ‘I bena kɛ siya caaman faa ye, ani ele kama, ne bena koo ɲumanw kɛ mɔgɔ caaman ye dugukolo yɔrɔ bɛɛ la.’

Ibrayima tun t’a lɔn Jehova b’a cira yɔrɔ min na, nka a y’a jigi la Jehova kan. O la, Ibrayima, a muso Sara, a facɛ Tera ani a kɔrɔcɛ dencɛ Lɔti y’u ka minanw lajɛn ani u y’o voyazijan daminɛ.

Jehova tun b’a fɛ Ibrayima n’a somɔgɔw ka jamana min ye, u labanna ka se o yɔrɔ la. Ibrayima tun be ni saan 75 lo ye o wagati la. O jamana tun be weele ko Kanaan. O yɔrɔ la, Ala kumana Ibrayima fɛ, ani ka layidu nin ta a ye ko: ‘I ɲɛɛ be jamana min bɛɛ la ten, ne bena o di i deenw ma.’ Nka Ibrayima ni Sara tun kɔrɔla ani u tun ma deen foyi sɔrɔ. O la do, Jehova tun bena a ka layidu dafa cogo di?