Sisan kɔni, denkɛ sɔrɔla!

Ibrayima ni Sara tun furula kabi saan caaman. U y’u ka boon ɲuman to yen Uri ani ka na to fanibugu kɔnɔ. Nka Sara ma ŋunuŋunu sabu a tun y’a jigi la Jehova kan.

Deen nege tun be Sara la fɔɔ a y’a fɔ Ibrayima ye ko: ‘Ni ne ka jɔnmuso Agari ye deen sɔrɔ, a bena kɛ komi ne yɛrɛ ta lo.’ Kɔfɛ, Agar nana dencɛ sɔrɔ. A tɔgɔ tun ko Isimayɛli.

Saan caaman o kɔ, Ibrayima saan 99nan na ani Sara saan 89nan na, u ye lonan saba sɔrɔ. Ibrayima ko u ka sigi yiri jukɔrɔ ka lafiɲɛ ani ka dumuni kɛ. I b’a lɔn lonan sifa minw tun lo wa? Mɛlɛkɛw tun lo. U y’a fɔ Ibrayima ye ko: ‘Saan wɛrɛ ɲantumasi, ele n’i muso bena dencɛ sɔrɔ.’ Sara tora fanibugu kɔnɔ n’a be mɛnni kɛra. A yɛlɛla a yɛrɛ kɔnɔ ani k’a fɔ ko: ‘Ne kɔrɔla kojugu. Ne bele be se ka deen wolo tiɲɛn na wa?’

Saan kelen o kɔ, Sara ye dencɛ wolo i ko Jehova ka mɛlɛkɛ tun y’a fɔ cogo min na. Ibrayima y’a tɔgɔ la ko Isiyaka, o kɔrɔ ko “Yɛlɛ.”

Isiyaka tun be ɲini ka se saan duuru tuma min na, Sara y’a kɔrɔsi ko Isimayɛli be Isiyaka lɔgɔbɔra. Sara tun b’a fɛ k’a dencɛ tanga. O kama a y’a fɔ Ibrayima ye ko a ka Agar ni Isimayɛli gwɛn. Ibrayima tun t’a fɛ ka sɔn. Nka, Jehova y’a fɔ Ibrayima ye ko: ‘Mɛnni kɛ Sara fɛ. Ne bena Isimayɛli ladon. Nka ne ka layiduw bena dafa Isiyaka sababu lo la.’