Diinɛ maakɔrɔw ka baara ye mun ye jɛkulu kɔnɔ?

An ka diinɛ maakɔrɔ tɛ i n’a fɔ kerecɛnte diinɛ ɲɛmɔgɔw ɲɔgɔnw ye. U bɛ baara min kɛ jɛkulu kɔnɔ u tɛ sara o kama. I n’a fɔ an san kɛmɛ fɔlɔ la, mɔgɔw don minnu ka surun Jehova la kosɛbɛ, u sugandira walasa ka ‘Ala ka jɛkulu mara’. (Kɛwalew 20:28) Ko minnu b’a to u bɛ jɛkulu ɲɛminɛ ani k’u mago don jɛkulu la, u bɛ o dafa, u tɛ o ‘kɛ ni diyagoya ye nka u bɛ o kɛ ni diyaɲe ye, u tɛ o kɛ tɔnɔ jugu kosɔn nka u bɛ o kɛ ni ŋaniya ɲuman ye.’ (1 Piɛrɛ 5:1-3) U bɛ mun kɛ an ye?

U bɛ u janto an na ani u bɛ an lakana. Maakɔrɔw bɛ jɛkulu ɲɛminɛ, k’a lakana ani k’a dɛmɛ a gɛrɛlen ka to Jehova la. Maakɔrɔw y’a faamu min kɛ ko Ala de ye o jɔyɔrɔba in di u ma, u tɛ u fanga sigi an kan, nka u bɛ baara kɛ walasa an ka ɲɛnamaya ka ɲɛ ani an ka nisɔndiya sɔrɔ. (2 Kɔrɛntekaw 1:24) I n’a fɔ sagagɛnna bɛ i janto a ka sagadenw na cogo min na, u bɛ u seko bɛɛ kɛ walasa ka jɛkulu kɔnɔ mɔgɔw kelen-kelen bɛɛ dɔn.—Ntalenw 27:23.

U bɛ an kalan Ala sago kɛli la. Dɔgɔkun o dɔgɔkun, maakɔrɔw bɛ jɛkulu lajɛw ɲɛminɛ walasa ka an ka dannaya kɔgɔ. (Kɛwalew 15:32) Nin mɔgɔ cɛsirilen ninnu ye misali ɲuman ye waajulibaara la, u bɛ an bilasira ani u bɛ an kalan waajulibaara kɛcogoya wɛrɛw bɛɛ la.

U bɛ dusu don an kɔnɔ. Walasa ka an kelen-kelen bɛɛ dɛmɛ ka jɛɲɔgonya ɲuman sɔrɔ ni Jehova ye, maakɔrɔw bɛ baro kɛ ni an ye masaya so kɔnɔ walima u bɛ taa bɔ an ye an ka so. U ka kuntilenna ye k’an dɛmɛ ani ka an dusu saalo ni Bibulu ye.—Yakuba 5:14, 15.

Ka fara u ka jɛkulu baara kan, diinɛ maakɔrɔ fanba bɛ baara kɛ u yɛrɛ ye ani jɔyɔrɔw bɛ u bolo denbaya kɔnɔ minnu bɛ u ka waati ta. Nin balima ninnu ka ‘baara gɛlɛn kosɔn’, u ka kan ni an ka bonya ye.—1 Tesalonikekaw 5:12, 13.

• Diinɛ maakɔrɔw ka baara ye mun ye?

• U bɛ dɛmɛ jumɛn lase an kelen-kelen bɛɛ ma?