TILAYƆRƆ 4

Ala ye jɔni ye?

MƆGƆW bɛ fɛn caman kɛ u ka ala ye, k’u bato. Nka Ala ka Kuma b’a fɔ ko Ala lakika kelenpe de bɛ yen. A ɲɔgɔn tɛ yen, a bɛ fɛn bɛɛ kunna, a bɛ yen badaa. Ale de ye fɛn bɛɛ da sankolo la ani dugukolo kan. A ye ɲɛnamaya di an ma. O de kosɔn Ale kelen de ka kan ni batoli ye.

Kabakurun walahaw bɛ Musa bolo sariya tan sɛbɛnnen bɛ minnu kan — Ala tɔgɔ sɛbɛnnen filɛ Kitabu kɔrɔ dɔ kɔnɔ

Mankututɔgɔ caman bɛ Ala la, nka a halalatɔgɔ ye kelenpe de ye. O tɔgɔ ye ko JEHOVA. Ala yɛrɛ y’a fɔ Musa ye ko: “I k’a fɔ Israɛl bɔnsɔn ye tan, ko Jehova, u bɛnbaw ka Ala, Ibrahima ka Ala, Isaka ka Ala, Yakuba ka Ala, o ye i ci u ma. O ye ne tɔgɔ ye fo abada, u bɔnsɔn mɔwolow bɛɛ na u hakili to ne la ten.” (Ekisode 3:15, BS) Jehova tɔgɔ sɛbɛnnen bɛ sɔrɔ Kitabu kɔnɔ siɲɛ 7000. A fɔra Zaburuw kɔnɔ Ala ko la ko: ‘E min tɔgɔ ko Jehova, e kelenpe ye Kɔrɔtalenba ye dugukolo bɛɛ kunna.’— Zaburu 83:19, BS.

Ala tɔgɔ sɛbɛnnen filɛ Kitabu kɔrɔ dɔ kɔnɔ — Sariya min dira nabila Musa ma, o tun “fɔra mɛlɛkɛw fɛ”

Hadamaden si ma deli ka Ala ye. Ala y’a fɔ Musa ye ko: “I tɛ se ka ne ɲɛda ye, katuguni hadamaden si tɛ se ka ne ye ani ka to ɲɛnamaya la.” (Ekisode 33:20, MN) Ala bɛ sankolo la, wa hadamadenw ɲɛ tɛ se k’a ye. A man ɲi ka boli dilan, ka ja walima Ala bisigifɛn dilan k’u bato. Jehova ye nin cikan fɔ nabila Musa ye, ko: “I kana ja dɛsɛlen si dilan i yɛrɛ ye wala fɛn si bisigi, sankolo la fɛn wo, dugukolo kan fɛn wo, dugukolo jukɔrɔ ji la fɛn wo. I kana i biri u kɔrɔ, i kana baara kɛ u ye, katuguni ne, Matigi, i ka Ala, keleya bɛ ne la.” (Ekisode 20:2-5) Ala y’a fɔ kira Esayi fana ye ko: ‘Ne ye Jehova de ye, o ye ne tɔgɔ ye. Ne tɛna ne nɔɔrɔ di dɔ wɛrɛ ma. Ne tɛna ne tanuli di ja dɛsɛlenw ma.’—Esayi 42:8, BS.

Mɔgɔ caman dalen b’a la ko Ala bɛ yen, nka a bɛ kɛ dɔw kɔnɔ ko mɔgɔ tɛ se ka Ala dɔn walima ka gɛrɛ a la. Sani k’a kanu, u bɛ siran a ɲɛ de. E bɛ mun miiri nin na: Yali Ala bɛ a mako don i la wa? Yali cogo b’i bolo ka se k’a dɔn tigitigi wa? Kitabu b’a fɔ ko Ala ye ala sugu min ye, an ka o lajɛ ɲɔgɔn fɛ.

Ala ka hakili senu ani a ka mɛlɛkɛw

Ala bɛ a sagonata tiimɛ cogo di? Cogo kelen ye ka baara kɛ ni a ka hakili senu ye. Hakili senu tɛ a damafɛn ye min bɛ ko kala ma, mɛlɛkɛ tɛ fana. Nka Ala ka barika yebali don, dan tɛ o la. A bɛ o de kɛ ka a sagonakow bɛɛ kɛ. Ala ye o barika de kɛ ka sankolo ni dugukolo da. “Sankolo dara Matigi ka kuma barika la, sankolo dolow bɛɛ dara a dafiɲɛ fɛ [n’o ye a ka hakili senu ye].” (Zaburu 33:6) Tuma min na Ala tun bɛ ka dugukolo labɛn hadamadenw ye, dugukolo yɔrɔ bɛɛ tun ye ji ye. Ala ka Kuma b’a fɔ ko o waati la, “Ala Ni [walima hakili senu] birilen tun bɛ ji kun na.” (Jenɛse 1:2) O kɔ fɛ, Ala ye a ka hakili senu kɛ ka fɛn ɲɛnama sifaya bɛɛ da dugukolo kan.

Ala bɛ baara kɛ ni mɛlɛkɛw fana ye walisa ka a sago kɛ. A ye u da sankolo la a kɛrɛ fɛ. Fangaba de bɛ mɛlɛkɛw la. U bɛ Ala ka ciw lase, ka baara nafama wɛrɛw fana kɛ. Misali la, Kitabu b’a jira ko Sariya min dira nabila Musa ma, ko o kuma “tun fɔra mɛlɛkɛw fɛ.” U bɛ a ka baarakɛlaw dɛmɛ dugukolo kan fana. O de la Kitabu b’a fɔ ko “minnu bɛna kisili ciyɛn ta, mɛlɛkɛw cilen bɛ ka olu de mago ɲɛ.”—Heburuw 1:14; 2:2.