Tile saba lajɛba lajɛli ni a lamɛnni tele ni arajo la

Tile saba lajɛba min kɛra san 2020, o kɛra ko ye min ɲɔgɔn ma deli ka kɛ. O kɛra an ka lajɛba fɔlɔ ye min kɛra diɲɛ fan bɛɛ, min wideyow labɛnna k’u bila intɛrinɛti kan! O bɛɛ n’a ta, balima minnu bɛ Malawi ani Mozanbiki, olu fanba sera ka tile saba lajɛba lajɛ, k’a sɔrɔ u ma tɛmɛn intɛrinɛti fɛ. O sera ka kɛ cogo di?

Ɲɛmɔgɔ kulu ka komite fila, ni o ye Komitew ka baarako labɛnbagaw ka komite ani mɔgɔw kalanni komite ye, olu ye yamaruya kɛrɛnkɛrɛnnen di walasa tile saba lajɛba ka bɔ tele ni arajo la, Malawi ni Mozanbiki duguw la. Mun na o yamaruya kɛrɛnkɛrɛnnen dira u ma? Jamana minnu na intɛrinɛti sɔngɔ ka gɛlɛn kosɛbɛ diɲɛ bɛɛ kɔnɔ, Malawi sen bɛ olu la, o de kama, Jehova Seere minnu bɛ se ka intɛrinɛti sɔrɔ yen, olu man ca kosɛbɛ. William Chumbi, o min ye Malawi tɔn bolofara komite mɔgɔ dɔ ye, o ko: “Sira kelenpe min fɛ balo bɛ se ka di balimaw ma alako ta fan fɛ, o ye arajo ni tele ye.” Luka Sibeko, o min fana bɛ baara kɛ Malawi tɔn bolofara komite la, o fana ko: “Ni an tun ma se ka tile saba lajɛba sɔrɔ tele ni arajo sababu fɛ, balima damadɔ dɔrɔn de tun bɛna se ka a lajɛ an ka tɔn bolofara la.” Mozanbiki fana, masinimafɛn minnu fɛ balimaw bɛ se ka tile saba lajɛba lajɛ, olu sɔrɔli se bɛ balima damadɔ dɔrɔn de ye, ka fara intɛrinɛti sɔrɔli gɛlɛya kan.

Labɛn minnu kɛra

COVID-19 fiɲɛbana kosɔn, dɔgɔkun lajɛw tun bɛ kɛ teleso ni arajoso dɔw la ka ban.a An balimaw ye a ɲini o telesow ni o arajosow fɛ, ni u tun bɛ se ka waati wɛrɛw boloda tile saba lajɛba emisiyonw kama.

Malawi, an balimaw ye gɛlɛya dɔ sɔrɔ. Tuma caman na, telesow ni arajosow bɛ lɛrɛ kelen dɔrɔn de di u ka clients ka emisiyonw kama. U bɛ jɔrɔ bawo ni emisiyon janyana kojugu, o man di mɔgɔw ye. Nka, an balimaw ye a ɲɛfɔ u ye ko an ka baara in bɛ mɔgɔw bɛɛ de nafa. Tuma min na an tun ka kan ka to sow kɔnɔ fiɲɛbana in kosɔn, kibaru duman min bɛ bɔ Bibulu kɔnɔ ni o bɛ mɔgɔ dusu saalo, an taara a fɛ ka o fɔ mɔgɔw ye, o min bɛ se ka u dɛmɛ u ka kɛ fasoden ɲumanw ye ani ka hɛrɛ sɔrɔ u ka denbaya kɔnɔ. U kɛlen ka o mɛn, o telesow ni o arajosow sɔnna ka dɔ fara an ka emisiyonw waati bolodalenw kan.

Malawi, tile saba lajɛba sera ka lamɛn ani ka lajɛ arajoso kelen ani teleso kelen de la, wa o fila bɛɛ tun bɛ se ka sɔrɔ jamana fan bɛɛ la ani mɔgɔ miliyɔn caman tun bɛ se ka olu lasɔrɔ. Mozanbiki, tile saba lajɛba sera ka bɔ teleso kelen na ani ka lamɛn arajoso 85 la.

Nin jamana fila bɛɛ la, dolari wari 28.227b de bɔra walasa ka tile saba lajɛba bɔ teleso la, ani dolari wari 20.000 ɲɔgɔn walasa a ka se ka lamɛn arajo la. Walasa emisiyon dɔ ka bɔ arajo fitininw na, o wari hakɛ bɛ taa dolari wari 15 ɲɔgɔn na, nka ni jamana arajosow don, o wari hakɛ bɛ taa fo dolari wari 2.777 la.

An balimaw ye baaraba de kɛ walasa bolomafara minnu bɛ di, baara ka kɛ ni olu ye koɲuman. Malawi, misali la, balimaw sera ka tɛrɛmɛli kɛ walasa ka sɔngɔ nɔgɔmanw sɔrɔ. Ni i ye emisiyon bɔli sɔngɔ ta kɛmɛ kɛmɛ sara la, bi saba bɔra a la balimaw ye. O tɛrɛmɛli ye a to dɔ bɔra emisiyonw sɔngɔ la, o la an sera ka dolari wari 1.711 mara. Tɔgɔ ɲuman min bɛ an na ko an ye mɔgɔ laadiriw ye, ani ko an bɛ an ka wari sara waati bɛnnen na, o de y’a to Mozanbiki arajoso dɔw sɔnna ka dɔ bɔ emisiyonw sɔngɔ la.

Waleɲumandɔnw jirali

An balimaw nisɔndiyara kosɛbɛ ka se ka tile saba lajɛba lajɛ ani ka a lamɛn u ka yɔrɔ telesow ni arajosow la. Patrick, o min ye diinɛ maakɔrɔ ye Malawi, o ko: “Ɲɛmɔgɔ kulu balimaw ye bonya kɛrɛnkɛrɛnnen min da an kan nin fiɲɛbana in kɔnɔna na, an bɛ u fo o kosɔn.” Isaac, o min fana bɛ bɔ Malawi, o ko: “Ikomi arajo dɔrɔn de bɛ an bolo, an bɛ Jehova ka jɛkuluba fo kosɛbɛ bawo an sera ka tile saba lajɛba lamɛn arajo la. O kɛra sababu ye, ne ni n’ka denbaya sera ka nafa sɔrɔ tile saba lajɛba la. O ye a jira an na ko Jehova bɛ a ka mɔgɔw kanu.”

Weleweledala dɔ min bɛ Mozanbiki, san 2020 tile saba lajɛba kɛra ale ka lajɛba fɔlɔ ye. A ko: “Fɛɛrɛ minnu sigira sen kan walasa an ka lajɛba lajɛ tele la, o ye ne hakili jigin a la ko Jehova de ye Sebaayabɛɛtigi Ala ye. Fiɲɛbana in ma a bali ka an balo alako ta fan fɛ, wa a ye o di ne ma fo ne ka salɔn kɔnɔ. O ye dalilu di ne ma ko kanuya bɛ Jehova ka mɔgɔw ni ɲɔgɔn cɛ. Ne dalen b’a la kosɛbɛ ko nin ye diinɛ lakika yɛrɛ de ye.”

Diinɛ maakɔrɔ dɔ min tɔgɔ ko Wyson, ale ko: “Jɔnkɛ dannamɔgɔ ye a janto an na cogo min na fiɲɛbana in kɔnɔna na, ne b’a fɛ ka u fo o kosɔn. Ka se ka tile saba lajɛba lajɛ tele la ani ka a lamɛn arajo la ani ka a nafa sɔrɔ, wariko gɛlɛya bɛ an minnu na, o ye an caman dɛmɛ kosɛbɛ bawo faantanya bɛ an ka dugu la kosɛbɛ ka tɛmɛn diɲɛ fan caman kan.”

San 2021 tile saba lajɛba kama, Komitew ka baarako labɛnbagaw ka komite ani Mɔgɔw kalanni komite, olu ye ko dɔ kɛ tuguni u tɛ deli ka min kɛ walasa lajɛba ka bɔ tele ni arajo la, dugu sugandilen dɔw la. O kɛli wari sɔrɔla cogo di? O sɔrɔla bolomafaraw de fɛ minnu bɛ di an ka baaraw kama diɲɛ bɛɛ kɔnɔ. Olu caman bɛ di cogoya caman fɛ minnu bɛ sɔrɔ donate.jw.org siti kan. Aw bolo labilalalen bɛ bolomafara minnu di, aw ni ce olu kosɔn.