An bɛ se ka to kantigiya la cogo di n’an ka dannaya kɔrɔbɔra?

1-2. Mun de kɛra Yesu kɛtɔ ka mɔgɔw kalan Kapɛrnaum dugu la?

DON DƆ LA, Yesu tun bɛ ka mɔgɔw kalan Kapɛrnaum dugu la. A y’a fɔ u ye ko: “Ni aw ma Mɔgɔ Denkɛ farisogo dun k’a joli min, ɲɛnamaya tɛ aw kɔnɔ fewu”. A y’a fɔ u ye tuguni ko: “Min bɛ ne farisogo dun ka ne joli min, ɲɛnamaya banbali bɛ o tigi fɛ, ne n’a lakunun laban don na” (Yuh. 6:​53, 54). Yesu ka o kumaw ma diya a ka kalanden dɔw ye. U y’a jaabi ko: “Nin kuma ka gɛlɛn dɛ. Mɔgɔ jumɛn bɛ se ka o minɛ?”—Yuh. 6:60.

² O kumaw digira minnu na kosɛbɛ, olu y’a dabila ka tugu Yesu kɔ. Yala o kɔrɔ ye ko dannaya tun t’u la ka ɲɛsin Yesu ma wa? Ayi, ka d’a kan, sani o ka kɛ, Yesu ye min kɛ ani Yesu ye min fɔ, o ye u kabakoya fo u y’a fɔ ko: “Kira min ka kan ka na diɲɛ la, nin cɛ yɛrɛ don!” (Yuh. 6:14). O b’a jira ko u tun dalen bɛ Yesu la, nka u ka dannaya kɔrɔbɔlen, u ma to kantigiya la ka ɲɛsin a ma.

3. Cidenw ye mun de kɛ u kɛlen ka Yesu ka kumaw mɛn ani mun na u ye o kɛ? (Ja fana lajɛ.)

³ Cidenw kɔni tora kantigiya la ka ɲɛsin Yesu ma. Yesu kɛlen ka u ɲininka ni olu fana t’a fɛ ka kɔsegin, Piɛrɛ y’a jaabi ko: “Matigi, an na taa jɔni yɔrɔ? Ɲɛnamaya banbali kumaw bɛ sɔrɔ e de fɛ. Sisan an dara a la k’a dɔn ko i ye Ala ka Senuma ye” (Yuh. 6:​68, 69). A jateminɛ ko Piɛrɛ m’a fɔ ko ale ni ciden tɔw tun ye Yesu ka o kumaw bɛɛ faamuya. Yesu y’a fɔ minkɛ ko u ka kan ka a farisogo dun ani ka a joli min, u tun mana o kumaw faamuya cogo o cogo o waati la, u y’a latigɛ ka to kantigiya la ka ɲɛsin a ma. Mun na? Ka d’a kan u ka dannaya tun sinsinnen bɛ nin tiɲɛ jɔnjɔn de kan: Yesu tun ye “Ala ka Krisita” de ye—Luka 9:​20, 35.

4. Mun de bɛ se k’an ka kantigiya kɔrɔbɔ?

⁴ An ka kantigiya ka ɲɛsin Jehova ma, o bɛ se ka kɔrɔbɔ cogoya caman na. Misali la, an bɛ mun de kɛ ni ɲɛfɔli kura dira an ma Bibulu tɛmɛsira dɔ kan walima ni yɛlɛma donna an ka waajuli kɛcogo la? An bɛ mun de kɛ ni an m’a faamuya kun min na Jehova ma kasaara dɔ bali a ka an sɔrɔ? An ka dannaya bɛ se ka kɔrɔbɔ tuma dɔw la ni an teri sɛbɛ ye kuma dɔ fɔ walima a ye ko dɔ kɛ an na min digira an na kosɛbɛ, walima ni an bɛ mɔgɔ min bonya kosɛbɛ, o tigi ye ko bɛnbali kɛ an na.

5. Misali dɔ di min b’a jira ko an ka kan ka an ka dannaya basigi jusigilan ɲuman kan (Kolosekaw 1:23).

⁵ Walasa k’a dɔn kun min na a nafa ka bon an ka dannaya ka basigi ka ɲɛ, an ka misali ta so dɔ kan min jɔra yɔrɔ la, dugukolo yɛrɛyɛrɛw ka ca yɔrɔ min na. Walasa o so kana bin, ni dugukolo yɛrɛyɛrɛ kɛra, fo o k’a sɔrɔ a jusigira ka ɲɛ. O cogo kelen na, walasa an ka se ka kɔrɔbɔliw muɲu minnu kɔfɔra dakun tɛmɛnnen na, fo o k’a sɔrɔ an ka dannaya basigilen don ka ɲɛ. Ni an tora ka an ka dannaya barika bonya, an bɛna se ka to kantigiya la ka ɲɛsin Jehova ma kɔrɔbɔliw kɔnɔna na.—1 Cor. 15:58; Kolosekaw 1:23 kalan.

6. Mun de ye cidenw dɛmɛ u ka to kantigiya la ka ɲɛsin Yesu ma?

⁶ Mun de ye Yesu ka cidenw dɛmɛ u ka to kantigiya la ka ɲɛsin a ma hali ni tɔw bɛɛ tun seginna kɔ? Ka da a kan u tun b’a dɔn ko Jehova tun ka kan ni batoli ye bawo ale de ye fɛn bɛɛ dabaga ye. U tun b’a dɔn fana ko Yesu ye Ala denkɛ ye, “ɲɛnamaya banbali kumaw” bɛ sɔrɔ ale de fɛ ani ko Jehova bɛ ni Yesu ye. Sani an ka kuma fɛn caman kan minnu bɛ se ka an ka dannaya kɔrɔbɔ, an ka kuma tiɲɛ kuma saba kan minnu bɛ se ka an dɛmɛ an sinsinnen ka to an ka dannaya la, an ka gɛlɛya mana kɛ fɛn o fɛn ye: 1) Jehova de ye fɛn bɛɛ dabaga ye. 2) Bibulu bɔra Jehova de yɔrɔ. 3) Jehova bɛ a ka mɔgɔw dɛmɛ. N’an dalen bɛ o tiɲɛ kuma saba la, an bɛna to kantigiya la hali ni an ka dannaya kɔrɔbɔra.

JEHOVA DE YE FƐN BƐƐ DABAGA YE

7. Jirali 4:11 b’an hakili jigin mun de la, nka mun de bɛ se ka an sɔrɔ ni an ka dannaya kɔrɔbɔra?

⁷ Jirali 4:11 kalan. Nin tɛmɛsira b’an hakili jigin ko Jehova de ye fɛn bɛɛ dabaga ye. Hali ka dan o dɔnniya dɔrɔn ma, o ka kan ka an bila k’a bato. Ka fara o kan, n’an bɛ to k’an miiri ko ale de ye Sebaayabɛɛtigi ye, an bɛna da a la ko a bɛ se ka an kisi ka bɔ an ka kɔrɔbɔliw bɛɛ la. Nka, Sitanɛ ye nin diɲɛ fa ni a ka nkalon kumaw ye minnu bɛ mɔgɔw bila ka sigasiga ni Ala bɛ yen. Hali nin diɲɛ in dɔnnikɛlabaw b’a fɔ ko olu bɛ se ka daliluw di, minnu b’a jira ko ɲɛnamaya nana a yɛrɛ ma ten. An ka kan ka da a la tigitigi ko Jehova de ye an dabaga ye ani ko a bɛ an kanu. N’o kɛra, hali ni an bɛ tɔɔrɔ kɔnɔ, an tɛ sigasiga a la ko Ala bɛ yen ani ko a bɛna an dɛmɛ.—Heb. 11:6.

8-9. Ni i y’a daminɛ ka sigasiga ko Jehova de ye dabaga ye, i bɛ se ka mun de kɛ? (Ja fana lajɛ.)

⁸ N’a y’a sɔrɔ i y’a daminɛ ka sigasiga a la ko Jehova de ye dabaga ye, a ɲini ka o sigasiga bɔ i la joona. Ɲininiw kɛ an ka gafew kɔnɔ. O cogo la, i bɛna dalilu jɔnjɔnw sɔrɔ minnu b’a jira ko Jehova de ye fɛn bɛɛ dabaga ye. An ka gafeninw minnu tɔgɔ ye faransɛ kan na ko, La vie a-t-elle été créée ? ani Cinq questions à se poser sur l’origine de la vie, i bɛna kunnafoniw caman sɔrɔ olu kɔnɔ minnu bɛ se ka i dɛmɛ k’i ka dannaya kologɛlɛya. Dalilu wɛrɛ minnu b’a jira ko Ala bɛ yen tigitigi, i bɛ se ka olu sɔrɔ barokun in kɔnɔ min tɔgɔ faransɛ kan na ko, “Évolution ou conception ?” an ka jw.org siti kan. Balimamuso Jessica, ale min bɛ bɔ Etazuni y’a fɔ ko: “Ne kɛlen ka sɛgɛsɛgɛli kɛ an ka gafew kɔnɔ, ne dara a la ko daliluw bɛ yen minnu b’a jira ko Dabaga hakilitigi dɔ bɛ yen, min ye fɛn bɛɛ da. Ne tun bɛ o dɔn, nka ne ye o kunnafoni minnu kalan, olu ye sigasigaw bɛɛ bɔ ne la”. An ka gafe min tɔgɔ ye ko, “Ɲɛnamaya kɛ nisɔndiya la fo badaa!”, kalansenw 6nan ani 7nan, a bɛ se ka kɛ k’i ye olu kalan ka ban, wa i tun ye nafa sɔrɔ o la. Nka, yala i bɛ se ka u kalan kokura wa?

⁹ Dalilu jɔnjɔn minnu b’a jira ko Ala bɛ yen tigitigi, yala i bɛ se ka waati ta ka olu kalan i ka yɛrɛ kalan senfɛ wa? I bɛna kunnafoni minnu sɔrɔ o kalan kɔnɔ, o bɛna i dɛmɛ ka da a la tigitigi ko Jehova bɛ yen ani ka a jogow dɔn ka ɲɛ (Rom. 1:20). K’a fara o kan, minnu dalen t’a la ko Ala bɛ yen, i bɛna se ka olu dɛmɛ. An ka kan ka an hakili to min na o ye ko, Jehova ye dalilu caman de di an ma minnu bɛ an dɛmɛ ka da a la ko, ale de ye an dabaga ye.

Nebula: IAC/RGO/David Malin Images; fish and car: Mercedes-Benz USA; plane: Kristen Bartlett/University of Florida

BIBULU BƐ BƆ JEHOVA DE YƆRƆ

10. Mun na Bibulu nafa ka bon an bolo kosɛbɛ? (2 Timote 3:​16, 17).

¹⁰ 2 Timote 3:​16, 17 kalan. Bibulu ye cikan de ye ka bɔ Jehova yɔrɔ k’a di hadamadenw ma. An bɛ ɲininkali nafaman minnu kɛ an yɛrɛw la ɲɛnamaya ko la, i n’a fɔ: Ɲɛnamaya daminɛna cogo di? Mun na Ala ye an da? A sago ye mun de ye ka ɲɛsin an ma? an bɛ o ɲininkaliw jaabiw sɔrɔ a kɔnɔ. An dalen b’a la ko Bibulu bɔra Jehova de yɔrɔ. O de kosɔn, Bibulu ye Kitabu ye min nafa ka bon an bolo kosɛbɛ. O la, an b’a fɛ ka Ala ka kuma faamuya kosɛbɛ ani ka an seko bɛɛ kɛ walisa ka o waleya an ka ɲɛnamaya kɔnɔ.

11. Mun na i dalen b’a la ko Bibulu bɔra Ala de yɔrɔ?

¹¹ Mun na an dalen b’a la tigitigi ko Bibulu bɔra Ala de yɔrɔ? K’a da kun caman kan. Bibulu maanaw bɛɛ ye tiɲɛ de ye (Luka 3:​1, 2). A bɛ fɛn o fɛn fɔ danfɛnw fana kan, olu bɛɛ ye tiɲɛ ye (Job 26:7). Bibulu ye kitabu ye min jɛnsɛnna ka tɛmɛn kitabu bɛɛ kan, hali ni Sitanɛ y’a seko bɛɛ kɛ walisa k’a silatunu. Bibulu sɛbɛnna cɛ binaani ɲɔgɔn de fɛ san 1 600 kɔnɔ. O bɛɛ n’a ta, Bibulu kumaw tɛ ɲɔgɔn sɔsɔ. Hali ni Bibulu sɛbɛnna a bɛ san caman bɔ, a ka laadilikanw bɛ ka mɔgɔ miliyɔn caman dɛmɛ hali bi (Nt. 13:20; 15:21; Mat. 7:12). Bibulu ka kiraya kumaw caman de tiimɛna. O ye dalilu wɛrɛ ye min b’a jira an na ko, kuma min bɛ Bibulu kɔnɔ, an bɛ se ka da o la (Jos. 23:14). Siga si t’a la ko Bibulu bɔra Ala de yɔrɔ.

12. N’an bɛ ka sigasiga ko Bibulu ye Ala ka kuma de ye, an ka kan ka mun de kɛ?

¹² An ka kan ka mun de kɛ n’an y’a daminɛ ka sigasiga ko Bibulu ye Ala ka kuma de ye? An ka kan ka Jehova deli o ko la ani ka sɛgɛsɛgɛliw kɛ walisa ka o sigasiga bɔ an na. Balimakɛ funankɛnin min tɔgɔ ye ko Jordan, min lamɔna tiɲɛ sira kan, ale y’a fɔ ko: “Mɔgɔw bɛ kuma minnu fɔ ne ye, ne tɛ da olu bɛɛ la ten. Ne mago b’a la ka sɛgɛsɛgɛli kɛ ne yɛrɛ ye fɔlɔ. Ka tiɲɛ yɛrɛ fɔ, hali bi tuma dɔw la, ne bɛ fɛn minnu kalan, walima ne bɛ fɛn minnu mɛn, ne bɛ to ka sigasiga olu la. Nka, ni o kɛra, ne bɛ sɛgɛsɛgɛliw kɛ an ka gafew kɔnɔ walisa ka jaabiw sɔrɔ ne ka ɲininkaliw la ani ka se sɔrɔ ne ka sigasigaw kan.” Kun min na an dalen b’a la ko Bibulu bɔra Ala de yɔrɔ, n’an taara a fɛ ka miiri o la, an ka dannaya kolo bɛna gɛlɛya—1 Kɔr. 3:​12, 13.

JEHOVA BƐ A KA MƆGƆW DƐMƐ

13. N’an y’a daminɛ ka sigasiga k’a dɔn jɛkulu jumɛn de ye Jehova ka jɛkulu ye bi, an ka kan ka mun de kɛ?

¹³ N’an y’a daminɛ ka sigasiga ko Jehova Seerew ye jɛkulu ye Jehova bɛ min dɛmɛ bi, an ka an seko bɛɛ kɛ walisa ka o sigasiga bɔ an na joona. An bɛ se ka o kɛ ni an ye nin ɲininkaliw kɛ an yɛrɛw la: ‘Jɔni de bɛ ka u seko bɛɛ kɛ walisa ka tugu Bibulu sariyakolow kɔ bi? Jɛkulu jumɛn de bɛ u ka dannayakow bɛɛ sinsin Bibulu dɔrɔn de kan?’ (2 Tim. 4:​3, 4). ‘Jɔni de bɛ ka Jehova sago kɛ bi?’—Mat. 7:​20, 21.

14. Jehova bɛ ka baara kɛ ni a ka Seerew ye cogo di walisa ka Matiyu 24:14 ka kiraya kuma tiimɛ?

¹⁴ Ala b’a fɛ nin kibaru duman waajuli ka kɛ diɲɛ yɔrɔ bɛɛ la, sani laban ka se. O la, an bɛ se k’an yɛrɛ ɲininka: ‘Jɔni de bɛ ka nin kibaru duman waajuli kɛ bi?’ (Mat. 24:14). O jaabi jɛlen don. Jehova bɛ ka baara kɛ ni a ka jamakulu ye, n’o ye Jehova Seerew ye, walisa ka nin kibaru duman waajuli kɛ. Jehova Seerew kelenpe de bɛ ka nin masaya kibaru duman waajuli kɛ jamana 240 ni kɔ la. Wa, an bɛ ka o baara kɛ Yesu ka ɲɛminɛli kɔrɔ a ka ca ni san 100 ye sisan. O baara min ye baara bɛɛ la nafaman ye min kalifara an ma, an bɛ o ta sɛbɛ la tuma bɛɛ.—Mat. 28:​19, 20.

15. Jehova Seerew ye nɔɔrɔ da Ala tɔgɔ kan cogo di? (Matiyu 6:9; Esayi 43:10).

¹⁵ Matiyu 6:9 ani Esayi 43:10 kalan. An bɛ wele ko Jehova Seerew, wa Jehova tɔgɔ ka da an kan, an wasalenba don o la. Nin diɲɛ in kɔnɔ bi, mɔgɔ caman t’a dɔn ko Ala tɔgɔ ye ko Jehova. Nka, an ye an seko bɛɛ kɛ walisa Ala tɔgɔ ka kan ka kɛ yɔrɔ o yɔrɔ Bibulu kɔnɔ, a ka kɛ o yɔrɔw la. O tɔgɔ in bɛ sɔrɔ siɲɛ 7 000 ni kɔ La Bible, Traduction du monde nouveau kɔnɔ.

16. Mun na an bɛ se k’a fɔ ko cikan min bɛ sɔrɔ Yuhana 13:​34, 35 la, ko Jehova Seerew bɛ ka o labato? (Ja fana lajɛ.)

¹⁶ Yuhana 13:​34, 35 kalan. Bɛn tɛ hadamadenw ni ɲɔgɔn cɛ bi, wa u bɛ ɲɔgɔn koniya. Nka, Jehova batobagaw tɛ ten. U bɛ ɲɔgɔn kanu, wa bɛn bɛ u ni ɲɔgɔn cɛ. Yala o tɛ kabakoba ye bi wa? An bɔyɔrɔw tɛ kelen ye, an ka ɲɛnamaya kɛcogo tɛ kelen ye, wa an ma lamɔ cogoya kelen na. Nka, o bɛɛ n’a ta, an b’an seko bɛɛ kɛ walisa bɛn ani kanuya ka kɛ an ni ɲɔgɔn cɛ. Yala i delila ka taa dugu dɔ la ani ka taa jɛkulu wɛrɛ ka lajɛ la yen yɔrɔ la wa? N’o don, i y’a kɔlɔsi ko u mana bɔ yɔrɔ o yɔrɔ, kanuya bɛ balimaw ni ɲɔgɔn cɛ. O b’a jira k’a jɛya ko Jehova bɛ ka baara kɛ ni an ye, an minnu ye a ka Seerew ye, walisa ka a sago kɛ. N’an ye o to an hakili la, o bɛna an dɛmɛ an ka to kantigiya la ka ɲɛsin Jehova ma, an mana kɔrɔbɔ cogo o cogo.

KANA JEHOVA BATOLI DABILA BADAA

17-18. An bɛ se ka gɛlɛya jumɛnw de sɔrɔ, nka an bɛ se ka mun de fɔ ni jagɛlɛya ye?

¹⁷ An bɛ ɲɛnamaya la diɲɛ laban ani waati gɛlɛnw de la. O la, siga t’a la ko an bɛna gɛlɛyaw sɔrɔ an ka ɲɛnamaya kɔnɔ (2 Tim. 3:​1, 13). Ko dɔw bɛ se ka an sɔrɔ an ka ɲɛnamaya kɔnɔ fana, minnu bɛ se k’a to an bɛ hami ko jugu. Jehova ka jɛkuluba bɛ se ka latigɛli dɔw kɛ minnu faamuyali bɛ se ka gɛlɛya an bolo. An balimakɛ walima an balimamuso dɔ jɛkulu kɔnɔ bɛ se ka ko dɔ kɛ an na min bɛ an tɔɔrɔ. A bɛ se ka kɛ ko an tɛ an ka gɛlɛya ɲɛnabɔ cogo dɔn walima yɛrɛ an t’a dɔn kun min na gɛlɛya dɔ bɛ ka an sɔrɔ.

¹⁸ Nka, hali ni o gɛlɛyaw bɛ an tɔɔrɔ kosɛbɛ ani ka an hakili ɲagami, an bɛ se ka to kantigiya la ka ɲɛsin Jehova ma. An bɛ se ka o kɛ ni an dalen bɛ a la ko ale de ye fɛn bɛɛ dabaga ye, ko Bibulu ye a ka kumakan ye, ani ko Jehova Seerew de ye jɛkulu ye Jehova bɛ ka baara kɛ ni min ye bi. O la, Piɛrɛ tun ye min fɔ Yesu ye, anw fana bɛ se k’a o fɔ Jehova ye: “An na taa jɔni yɔrɔ? Ɲɛnamaya banbali kumaw bɛ sɔrɔ e de fɛ.”