Gɛlɛya minnu bɛ se k’i sɔrɔ i batiselen kɔ, yala i y’i yɛrɛ labɛn olu kama wa?

1-2. An bɛ se ka mun de kɛ walisa k’an labɛn gɛlɛyaw kama minnu bɛ se k’an sɔrɔ an batiselen kɔ? Misali dɔ fɔ.

AN B’A lɔn ko k’an to Sutana ka duniɲa nin kɔnɔ, an bena gwɛlɛyaw sɔrɔ. Yezu y’a ka kalandenw lasɔmi ko: “Waajibi lo kunnatiɲɛkow ka kɛ.” (Mat. 18:7). K’o to an hakili la, an ka ɲi k’an yɛrɛ labɛn gwɛlɛya nataw kama. Misali la, bɛnbaliyako be se ka don an n’an balima dɔ cɛ.

² Miiri nin na: Jehova ka ɔriganisasiyɔn be to ka Jehova sagokɛlaw jija u k’u yɛrɛ labɛn balawokow kama. An b’an yɛrɛ labɛn o kama cogo di? A fɔlɔ, an b’a ɲini k’a lɔn balawoko minw be se ka kɛ an ka mara la. O kɔrɔtanin lo kosɔbɛ sanko n’an nana kura ye mara dɔ la. O kɔ, an b’a filɛ an be se ka min kɛ walisa an labɛnnin ka to o balawokow kelen kelen bɛɛ kama (Talenw 21:5). O cogo kelen na, a ka ɲi an k’a ɲini k’a lɔn an be se ka gwɛlɛya minw sɔrɔ an batizenin kɔ. O la, an bena a lɔn an ka ɲi ka min kɛ n’u dɔw y’an sɔrɔ. O cogo la, o gwɛlɛyaw tɛna nɔɔba to an kan ani u tɛna a to an ni Jehova ka jɛnɲɔgɔnya be nagasi (Zab. 17:5). An ka kuma gwɛlɛya saba koo la an be se ka minw sɔrɔ ani an k’a filɛ an be se k’an yɛrɛ labɛn u kelen kelen bɛɛ kama cogo min na.a

NI BALIMA DƆ DONNA I GASI LA

3. An bɛ se ka gɛlɛya jumɛn de sɔrɔ jɛkulu kɔnɔ?

³ I siɲɛ fɔlɔ ka taga Jehova Seerew ka lajɛn dɔ la, ani k’a ye kanuya min b’u ni ɲɔgɔn cɛ, i hakili b’a la o ye min kɛ i la wa? N’a sɔrɔ o y’a to i lara a la ko i ye tiɲɛn diinan lo sɔrɔ (Zan 13:35; Kɔlɔs. 3:12). Blandineb fana tun lanin b’o lo la a fɔlɔ ka taga Jehova Seerew ka lajɛn dɔ la. Nga wagati damanin a batizenin kɔ, koo dɔ y’a sɔrɔ min barila a la. A ko: “Balimamuso dɔ ma n’ minɛ ni ɲumanya ye hali dɔɔni. N’ y’a kɔrɔsi fana ko a tun be to ka balima tɔɔw tɔgɔjugu fɔ. O koo ye n’ kɔnɔ gwan sabu n’ ka bibulukalan ni lajɛnw ye n’ dɛmɛ k’a faamu ko Jehova Seerew b’u jija ka kɛ hɛɛrɛmɔgɔw ye ani u b’u ka kanuya yira ɲɔgɔn na.” Tiɲɛn lo ko i balimaw b’u seko bɛɛ kɛra k’u ka kerecɛn jogow fisaya. Nga, u tɛ mɔgɔ dafaninw ye (Efɛz. 4:23, 24; 1 Zan 1:8). O la, u dɔ be se ka don i gasi la a ka kumaw wala a ka kɛwalew fɛ (Zaki 3:8). A fɔ man di nga, o gwɛlɛyaw ɲɔgɔn y’a to dɔw ye Jehova sago kɛli dabila.

4. An bɛ se k’an yɛrɛ labɛn kabini sisan cogo di walisa an k’a dɔn an ka kan ka min kɛ, ni balima dɔ donna an gasi la don dɔ la? (Efesekaw 4:​32).

⁴ Ni balima dɔ donna i gasi la, i be se ka mun lo kɛ kabi sisan walisa i kana Jehova sago kɛli dabila? To ka tugu Efɛzikaw 4:32 ka ladili kɔ (o vɛrise kalan). N’i tora k’i jija ka tɔɔw minɛ ni ɲumanya ye ani ka makari u la, i bena i yɛrɛ tanga gwɛlɛya caaman ma. O la, a latigɛ ka yafa tɔɔw ma n’i dusu bɛɛ ye n’u donna i gasi la. Mun lo be se k’i dɛmɛ k’o kɛ? Miiri k’a filɛ siɲɛ daa min na i ye Jehova deli ko a ka yafa i ma ani a sɔnna k’o kɛ (Mat. 6:12). N’i miirila k’a ye Jehova yafara i ma siɲɛ daa minw bɛɛ la, a bena nɔgɔya i ma ka yafa tɔɔw ma.

5. Bibulu sariyakolo jumɛn de bɛ se k’an dɛmɛ ni balima dɔ donna an gasi la? (Ntalenw 19:11) (Jaw fana lajɛ).

⁵ Talenw 19:11 kalan. O vɛrise b’a yira ko ni dɔ donna an gasi la, hakilitigiyac be se k’a to an tɛ dimi joona. O vɛrise ye balimamuso Rima dɛmɛ. A batizera a saan damanin ye nin ye. A ko: “Ni balimaw ye koo dɔw kɛ minw be n’ kɔnɔ gwan, n’ be n’ hakili to Talenw 19:11 kɔnɔkumaw na. N’ be miiri u ka koow cogoya n’u bɔyɔrɔ koo la ani n’ be n’ yɛrɛ ɲininga fɛɛn min kama u ye koow kɛ o cogo la. N’ be n’ jija ka waajuli kɛ n’u ye fana. O be n’ dɛmɛ k’o balimaw lɔn koɲuman.” O ye ladili ɲuman yɛrɛ lo ye! Kabi sisan yɛrɛ, i be se k’a ɲini k’i balimaw lɔn. N’i b’u faamu ka ɲɛ, a bena nɔgɔya i ma ka yafa u ma n’u donna i gasi la.

6. Mun de bɛ se ka to jɛɲɔgɔnya ɲuman ka kɛ an n’an balimaw cɛ jɛkulu kɔnɔ?

⁶ Mun lo bena i dɛmɛ ka teriya kɛ ni balimaw ye kafo kɔnɔ? N’i b’a ɲinina k’i balimaw lɔn, sinsin u ka jogo ɲumanw kan (Talenw 10:12 lajɛ; Ɔrɔm. 12:10; Filip. 2:2, 3). A kɔrɔsi o ye balimacɛ Mark dɛmɛ cogo min na. A batizenin kɔ, a y’a daminɛ ka wagati caaman kɛ n’a ka kafo balimaw ye ani a y’u ka fiɲɛw ye. Mun lo y’a to o balimaw ka fiɲɛw ma Mark kunnatiɲɛ? A ko: “N’ y’a faamu ko balimaw ka filiw tɛ foyi ye, n’an y’u suma ni duniɲamɔgɔw ka kojugubaw ye. O la, n’ y’a latigɛ ko n’ tɛna to ka sinsin n’ balimaw ka fili den-denninw kan. Sisan, n’ be to ka sinsin u ka jogo ɲumanw lo kan.” N’i be to ka koow kɛ o cogo la, i bena jɛnɲɔgɔnya ɲuman kɛ n’i balimaw ye i ka kafo kɔnɔ.

I JƐNNA FƐN MINNU KƆ, OLU NEGE Y’A DAMINƐ K’I MINƐ

7. An jɛnna fɛn minnu kɔ, mun de bɛ se ka to olu nege k’an minɛ tuguni?

⁷ I ye tiɲɛn lɔn kura ye tuma min na, siga t’a la ko i lafiyara sabu i bɔra Sutana ka duniɲa juguman nin na. N’a sɔrɔ i y’a fɔ i kɔnɔ ko: “Mɔgɔ be se ka tiɲɛn lɔn ani duniɲa nin koo be tila ka diya a tigi ye cogo di?” Nga ni gwɛlɛyaw b’i kan, i be se k’a daminɛ ka miiri fɛɛn dɔw la i karila minw kɔ ka se ka Jehova bato. O fɛɛnw lɔgɔ yɛrɛ be se k’i minɛ (Nɔnburuw 11:4-6 lajɛ). Misali la, balima dɔw tun be ni lɔyɔrɔba ye u ka baara la, nga u sɔnna k’o baara to yen sabu a tun b’u ka wagati caaman ta. Dɔ wɛrɛw teri sɔbɛw banna u la tuma min na u y’a daminɛ ka bibulukalan kɛ. Dɔ wɛrɛw fana ye see sɔrɔ delinanko jugu dɔ kan hali n’u tun be ninsɔndiya dɔ sɔrɔ o la. Mɔgɔ karila fɛɛn minw kɔ walisa ka kɛ Jehova teri ye, n’a y’a to o fɛɛnw dɔ y’a yɔrɔ janya Jehova la, miiri k’a filɛ Jehova dusu bena kasi cogo min na! I karila fɛɛn minw kɔ, i be se ka mun lo kɛ kabini sisan walisa i kana segi o koow ma gwɛlɛyaw wagati la?

8. An bɛ kalan jumɛn de sɔrɔ ka bɔ Ibrahima ni Sara ka misali la?

⁸ Jehova sagokɛla kantigi caaman kofɔra Bibulu kɔnɔ. U dɔw karila fɛɛn minw kɔ, u lɔgɔ tun be se k’u minɛ. Misali la, Ibrayima ni Sara ye mɛnni kɛ Jehova fɛ: U bɔra Uri dugu la min tun lamininin lo ni kogo barikamanw ye ka taga sigi fanibuguw kɔnɔ (Eburuw 11:8, 9). U tun fɛrɛnin lo cogo min na Uri dugu la, n’a sɔrɔ u tun be miiri o la tuma kelen kelen. Nga “ni o tun tora ka miiri o yɔrɔ ko ra,” wala n’u tun y’a to u ka koo tɛmɛninw lɔgɔ k’u minɛ, u tun ka teli ka kɔsegi Uri dugu la. Sanni k’o kɛ, u tora ka miiri siniɲasigi koo lo la.—Eburuw 11:15, 16, Biblu Ala ta Kuma.

9. Ciden Paul jɛnna fɛn minnu kɔ, a tun bɛ olu jate cogo di? (Filipekaw 3:​7, 8, 13).

⁹ Ciden Pol y’a ka ɲɛnamaya kɛcogo yɛlɛma walisa ka baara kɛ Jehova ye. Sanni a ka kɛ kerecɛn ye, karamɔgɔba Gamaliyɛli y’a kalan Yahutuw ka sariyaw la (Kɛw. 22:3). Pol tun bena lɔyɔrɔba yɛrɛ lo sɔrɔ Yahutu diinan na! (Gal. 1:13, 14). Nga tuma min na a sɔnna kibaro diiman na, a y’a kɔɔ di o koow bɛɛ ma. A kɛnin kɔ kerecɛn ye, yala koow tun ka nɔgɔ a fɛ tuma bɛɛ wa? Ayi. U y’a bugɔ, u y’a don kaso la ani a ka siyamɔgɔw tun b’a kɔniya (2 Kor. 11:23-26). A ka koow tun be cogo min na fɔlɔ la sanni a ka kɛ kerecɛn ye, n’a tun tora ka miiri o la, o tun be se k’a to a b’a fɔ ko a ka koow tun ka fisa fɔlɔ la ka tɛmɛ sisan kan. Nga Pol m’o kɛ. Nɛɛmaba min tun dira a ma ka baara kɛ Yezu Krista ye, ani a tun bena duga minw sɔrɔ sini ma, a tora ka miiri o lo la. Pol karila fɛɛn minw kɔ, a tun lanin b’a la ko ka tugu Yezu kɔ, o nafa ka bon kosɔbɛ ka tɛmɛ o fɛɛnw kan.—Filipikaw 3:7, 8, 13 kalan.

10. An ka kan ka to ka miiri mun de la tuma bɛɛ? (Marka 10:29, 30). (Jaw fana lajɛ).

¹⁰ An be kalan juman lo sɔrɔ o la? I karila fɛɛn minw kɔ walisa ka kɛ kerecɛn ye, n’i y’a daminɛ ka miiri u la, i hakili to a la fana fɛɛn min kama i karila u kɔ (Waaj. 7:10). I karila fɛɛn minw kɔ, ani i be duga minw sɔrɔla sisan k’i to tiɲɛn sira kan, u suma ni ɲɔgɔn ye. Misali la, i be teriya kɛra ni duniɲa kuru bɛɛ Masaba ye (Talenw 3:32). I be denbaya dɔ kɔnɔ min mɔgɔw be duniɲa kuru bɛɛ la ani u be ɲɔgɔn kanu (Mariki 10:29, 30 kalan). Ka fara o kan, i be ni siniɲasigi ɲuman ye! (Ezayi 65:21-23). Mɔgɔ be duga minw sɔrɔ n’a be baara kɛ Jehova ye, n’i be miiri o la tuma o tuma, i karila fɛɛn minw kɔ, u lɔgɔ man teli k’i minɛ.

11. An bɛ kalan jumɛn de sɔrɔ ka bɔ Rose ka ko la?

¹¹ Balimamuso dɔ tɔgɔ ko Rose. A batizera tuma min na a tun be ni saan 50 ɲɔgɔn ye. A karila fɛɛn minw kɔ, a kɔrɔsi a ye min kɛ walisa o fɛɛnw lɔgɔ kana to k’a minɛ. A ko: “A daminɛ na, nowɛli fɛti lɔgɔ tun be n’ minɛ sabu o fɛti tuma na, n’ tun be wagati diiman kɛ ni n’ ka denbayamɔgɔw ye. A tun ka di n’ ye ka kadow di n’ ka mɔgɔ kanulenw ma. A tun ka di n’ ye fana ka denmisɛnw ye nowɛli yiri kɔrɔ ani k’u ɲɛda manamanatɔ ye n’u b’u ka kadow dayɛlɛla.” Mun lo ye Rose dɛmɛ do? A ko: “Saan o saan, n’ be loon dɔ sugandi min be dan na nowɛli loon na ani n’ be n’ ka denbayamɔgɔw bɛɛ lajɛn. N’ be kadow di u ma ani n’ b’a fɔ u ye fɛɛn min kama u koo ka di n’ ye.” Gwɛlɛya wɛrɛ tun be Rose kan. A ko: “N’ ye tiɲɛn lɔn tuma min na, n’ teriw ye n’ bila. Tuma dɔw la, u lɔgɔ tun be n’ minɛ ani a tun be n’ ɲɛɛ na ko n’ be n’ kelen na.”d Mun lo ye Rose dɛmɛ do? A y’a daminɛ ka labɛnw kɛ ni balimamuso caaman ye walisa ka waajuli kɛ n’u ye. A ko: “O kɛra sababu ye n’ ye teri kuraw sɔrɔ. N’ b’o teriw kanu ani u koo ka gwɛlɛ n’ ma.” I be se ka Rose ladegi cogo di? Fɛɛn minw tun ka di i ye sanni i ka tiɲɛn lɔn, u dɔ lɔgɔ be se k’i minɛ. Nga a to i hakili la ko i be se ka fɛɛn wɛrɛ sɔrɔ o nɔɔ na min ka fisa ani min be se k’i ninsɔn diya sɔbɛ la (Filip. 4:8, 9). Kana ɲinɛ ko i be min sɔrɔ n’i be ni Jehova ye, o ka ca kosɔbɛ ka tɛmɛ i karila min kɔ.

NI DƆW YE JEHOVA BATOLI DABILA

12. Ko jumɛn de bɛ se ka kɛ jɛkulu kɔnɔ, min bɛ digi an na kosɛbɛ?

¹² I kɛra Jehova Seere ye tuma min na, i ninsɔn diyara sabu i ye duniɲa juguman nin ka kokɛcogow dabila. Jɛnkulu kelenpe min be mɔgɔw kalan tiɲɛn koo la ani o jɛnkulu mɔgɔw b’u seko bɛɛ kɛ ka koo ɲuman kɛ, i kɛra o mɔgɔ dɔ ye (Ezayi 65:14). Nga tuma dɔw la, i be se k’a mɛn ko kafomɔgɔ dɔ ye kojuguba kɛ wala ko u ye dɔ bɔ kafo kɔnɔ yɛrɛ (1 Kor. 5:13). N’a y’a sɔrɔ ko i somɔgɔ dɔ lo wala mɔgɔ wɛrɛ lo i be min bonya kosɔbɛ, o be se ka digi i la yɛrɛ le! An k’a filɛ o koo ɲɔgɔn ye min kɛ balimamuso Samira la. A ko: “Dɔɔni n’ batizenin kɔ, diinan mɔgɔkɔrɔ dɔ ye jurumuba kɛ ani u y’a bɔ kafo kɔnɔ. O tun be ɲini ka n’ kunnatiɲɛ sabu n’ tun tɛ se ka la a la ko diinan mɔgɔkɔrɔ dɔ be se ka Jehova ni kafomɔgɔw hakɛ ta.” Tiɲɛn lo ko an ka ɲi ka la a la tuma bɛɛ ko an balimaw be Jehova kanu ani ko u b’a fɛ ka to kantigiya la (1 Kor. 13:4, 7). Nga, an ka ɲi k’a to an hakili la ko an balimaw be jurumubaw kɛ tuma dɔw la. O kama saan o saan, u be dɔw bɔ kafo kɔnɔ.

13. An bɛ se k’an yɛrɛ labɛn cogo di kabini sisan walisa ka to kantigiya la, hali n’an ka mɔgɔ sɛbɛ dɔ ye Jehova batoli dabila?

¹³ I be se k’i yɛrɛ labɛn cogo di kabi sisan walisa n’i ka mɔgɔ sɔbɛ dɔ bɔra Jehova kɔ, o kana i kunnatiɲɛ? To ka ele ni Jehova ka jɛnɲɔgɔnya barika bonya (Zaki 4:8). A to i hakili la ko an kelen kelen bɛɛ lo ka ɲi ka teriya kɛ ni Jehova ye, mɔgɔ si tɛ se k’o kɛ an nɔɔ na. Misali la, tuma caaman na an be Jehova bato n’an somɔgɔw ani kafomɔgɔw ye. Nga, an ka ɲi fana ka to ka delili kɛ ani ka Bibulu kalan an yɛrɛ ma.—Zab. 1:2; 62:9.

14. An bɛ kalan jumɛn de sɔrɔ ka bɔ ciden Piɛrɛ ka misali la? (Yuhana 6:​66-​68).

¹⁴ Loon dɔ, Yezu ye kuma dɔ fɔ a ka kalandenw ma min faamu. O y’a to u caaman bɔra a kɔ. N’a sɔrɔ Piyɛri fana tun ma Yezu ka kumaw faamu. Nga a ma bɔ Yezu kɔ (Zan 6:66-68 kalan). Kalanden caaman ye min kɛ, Piyɛri m’o filɛ, nga Yezu tun y’u kalan koo minw na, a sinsinna o lo kan. Ciden Piyɛri ye min kɛ, an be kalan juman lo sɔrɔ o la? Bi fana, hali ni dɔw ye Jehova sago kɛli dabila, an k’a to an hakili la ko an be Ala ka ɔriganisasiyɔn lo kɔnɔ ani ko a be tɛmɛ o ɔriganisasiyɔn lo fɛ k’an kalan tiɲɛn koo la. O la, to k’o tiɲɛn jati fɛɛn nafamanba ye. An tun kumana Samira min koo la, ale ko: “N’ b’a to n’ hakili la ko ni kafomɔgɔ dɔ ye koo jugu kɛ, o kɔrɔ tɛ ko kafomɔgɔ tɔɔw bɛɛ b’o lo kɛ wala ko ɔriganisasiyɔn ka kalanw tɛ tiɲɛn ye. O kɔrɔ tɛ fana ko Jehova be sɔn o tigi ka kɛwale juguw ma.”

15. An bɛ kalan jumɛn de sɔrɔ ka bɔ Emily ka ko la?

¹⁵ An ka Emily ka koo lajɛ. Lɔgɔkun kelen dɔrɔn a batizenin kɔ, u y’a bamuso bɔ kafo kɔnɔ ani a tagara k’u to yen. Emily ko: “N’ tun t’a miiri ko n’ bamuso be se k’o kɛ. O kɛra gwɛlɛyaba yɛrɛ lo ye n’ fɛ ani n’ bamuso ɲɛnafin tun be n’ na kosɔbɛ.” Emily y’a ɲɛfɔ fɛɛn min y’a dɛmɛ k’o gwɛlɛya muɲu. A ko: “N’ facɛ be n’ kanu kosɔbɛ ani a b’a janto n’ na koɲuman. Kafo balimaw fana be n’ jati u ka denbayamɔgɔ dɔ ye. Ka fara o kan, n’ b’a to n’ hakili la ko gwɛlɛya b’an bɛɛ kan. O kama, a kɔrɔtanin lo an magwɛrɛnin ka to ɲɔgɔn na ani ka ɲɔgɔn jija.” (1 Piyɛri 5:9). An kana kɔnɔni kɛ gwɛlɛyaw ka cun an kan an be sɔrɔ k’a daminɛ k’an ka jɛnɲɔgɔnya sabati n’an balimaw ye. An ka to k’o kɛ kabi sisan. O la, gwɛlɛyaw tuma na, an balimaw bena an dɛmɛ.

16. An ka kan ka mun de to an hakili la? (Ja fana lajɛ).

¹⁶ An k’a to an hakili la fana ko minw koo ka di Jehova ye, a b’olu lo kolo (Eburuw 12:6). U ye minw bɛɛ bɔ kafo kɔnɔ, a b’a fɛ u ka kɔsegi ale ma (2 Piyɛri 3:9). O la, n’u y’i ka mɔgɔ kanulen dɔ bɔ kafo kɔnɔ, la a la ko diinan mɔgɔkɔrɔw bena u seko bɛɛ kɛ k’o tigi dɛmɛ a ka kɔsegi Jehova ma.—2 Tim. 2:24, 25.

17. An se ka da mun de la?

¹⁷ An ye gwɛlɛya damanin dɔrɔn lo lajɛ i be se ka minw sɔrɔ i batizenin kɔ. Tiɲɛn lo ko u dɔw be se ka i lasiran, nga kana siran. Koo caaman be yen i be se ka minw kɛ walisa k’i yɛrɛ labɛn u kama. Kana ɲinɛ abada ko Jehova bena i dɛmɛ ka to kantigiya la a ye. A y’i dɛmɛ ka ban ani a b’a fɛ k’i dɛmɛ fɔɔ abada! (1 Piyɛri 5:10). I mako be fanga min na walisa ka gwɛlɛyaw muɲu, a bena o di i ma. N’i tora ka sɔn Jehova ka dɛmɛ na, gwɛlɛya si tɛ yen min bena i yɔrɔ janya a la!—Zab. 119:165; Ɔrɔm. 8:38, 39.