Ta’a fɛ k’i ka alako mago wasa

1. Jehova ye an da ni mago jɔnjɔn jumɛnw de ye? (Matiyu 5:3)

JEHOVA b’a lɔn adamadenw mako be min na. Misali la, walisa ka to niin na, an mako be dumuni, fani ani siyɔrɔ la. N’an m’o fɛɛnw dɔ sɔrɔ, hali ni wagati kunkurunin kɔnɔ lo, koow be gwɛlɛya an ma. Jehova b’a lɔn ko an mako be fɛɛn wɛrɛ la. A y’an dan ka Alakow fana nege don an na (Matiyo 5:3 kalan). N’an b’a fɛ ka ninsɔndiya sɔbɛ sɔrɔ, an ka ɲi ka sɔn a ma ko an mako b’a la k’o nege wasa ani ko an ka ɲi ka to k’o kɛ.

2. K’a ‘dɔn ko an ye faantanw ye ala ta fan fɛ’, o kɔrɔ ye mun ye? Misali dɔ fɔ?

² Gɛrɛkikan kumaden min bayɛlɛmana ko “b’a lɔn k’u mako be Ala la,” o ɲɛsinna delilikɛla dɔ ma min mako be dɛmɛ na. Miiri delilikɛla dɔ koo la. A ka faniw nɔgɔnin lo, u faran farannin lo, ani dumuni bɛrɛ t’a fɛ k’a dumu. Tilefɛ, a siginin lo tile gwangwan jukɔrɔ ani sufɛ nɛnɛ b’a la kosɔbɛ. Mɔgɔw be boli a ɲɛ a sawura kosɔn. A sɛgɛnnin lo ani a dusu kasinin lo. O delilikɛla b’a lɔn ko a mako be dɛmɛ na walisa ka to niin na ani ka fanga sɔrɔ. O cogo kelen na, mɔgɔ minw b’a lɔn k’u mako be Ala la, u be dɛmɛ ɲini a fɛ ani u be mɛnni kɛ a fɛ fana.

3. An bɛna mun de ye nin kalansen in na?

³ Barokun nin na, an bena kɔn k’a ye an be kalan min sɔrɔ fenisimuso dɔ ka koo la min ye dɛmɛ ɲini Yezu fɛ. Minw b’a lɔn ko u mako be Ala la, o maana b’a yira ka gwɛ ko u ka ɲi ka kɛ ni jogo saba dɔw ye. O kɔ, an bena ciden Piyɛri, Pol ani masacɛ Dawuda ka koo lajɛ. O cɛɛw tun b’a to Ala k’u ɲɛminɛ.

JOGO ƝUMAN SABA: MAJIGILENYA NI TIMINANDIYA ANI DANNAYA

4. Fenisika muso dɔ ye mun de ɲini Yesu fɛ?

⁴ Loon dɔ, fenisimuso dɔ gwɛrɛla Yezu la. A denmuso tun “tɔɔrɔnin lo kosɔbɛ, jina [tun] b’a la.” (Mat. 15:21-28). O muso y’a kunbiri gwan Yezu ɲɛɛ kɔrɔ ani k’a deli ko a ka sabari k’a dɛmɛ. O fenisimuso y’a yira ko a be ni jogo ɲuman dɔw ye. An k’u la dɔw lajɛ.

5. Fenisika muso ye jogo jumɛnw de jira ani Yesu mun de kɛ? (Ja fana lajɛ.)

⁵ O fenisimuso y’a yira ko a majiginin lo sɔbɛ la. Mun na an be se k’o fɔ? Sabu tuma min na Yezu ye ɲɛyirali dɔ ta, o min na a kɛra komi a tun b’a sumana ni wuludennin ye, o muso ma dimi. Minw tun tɛ Yahutuw ye, n’a sɔrɔ olu lo tun b’o bɛgɛn suguw mara u ka soo. Ni ele tun lo, i tun bena Yezu ka kumaw ta cogo di? Yala i tun bena dimi ani i tun tɛna dɛmɛ ɲini a fɛ tugun wa? O fenisimuso ma koow ta o cogo la. A y’a yira ko a majiginin lo ani a m’a fari faga fana. An b’o lɔn cogo di? O ye ko a tora ka dɛmɛ ɲini Yezu fɛ. Mun na a y’o kɛ? A y’o kɛ sabu a tun limaniyanin lo Yezu la. Yezu y’a ye ko o muso limaniyanin lo a la kosɔbɛ minkɛ, a y’a latigɛ k’a dɛmɛ. Yezu tun y’a fɔ ko ale “cira Isirayɛlidenw dama ma, minw be i n’a fɔ saga tununinw.” O bɛɛ n’a ta, a ye jina gwɛn ka bɔ o muso denmuso la.

6. An bɛ kalan jumɛnw de sɔrɔ ka bɔ Fenisika muso ka maana la?

⁶ Walisa k’an ka Alakow nege wasa, an ka ɲi k’a ɲini ka kɛ n’o jogow ɲɔgɔn ye. An ka ɲi ka kɛ ni majigilenya ni limaniya barikaman ye ani k’an timinandiya. Mɔgɔ majiginin dɔrɔn lo bena a timinandiya ka dɛmɛ ɲini Ala fɛ. An ka ɲi fana ka la Yezu Krista la kosɔbɛ ani a be tɛmɛ mɔgɔ minw fɛ k’an ɲɛminɛ, ka la olu fana na (Mat. 24:45-47). Mɔgɔ minw be n’o jogow ye, Jehova n’a Dencɛ ninsɔn ka di k’u ka Alakow nege wasa (Zaki 1:5-7 lajɛ). Sisan, an k’a filɛ Jehova be dumuni, fani ani siyɔrɔ wala dogoyɔrɔ di an ma cogo min na Alako ta fan fɛ. An bena a yce fana an ka ɲi ka min kɛ walisa k’o fɛɛnw sɔrɔ. O la, an bena ciden Piyɛri, Pol ani masacɛ Dawuda ka ɲɛyiraliw lajɛ.

IKO PIƐRƐ, AN KA TA’A FƐ K’AN YƐRƐ BALO KA ƝƐ ALAKO TA FAN FƐ

7. Baara jumɛn de tun kalifara Piɛrɛ ma, wa a tun ka kan ka mun de kɛ fana? A ɲɛfɔ. (Heburuw 5:14–6:1)

⁷ An ka ciden Piyɛri ka koo lajɛ. Yahutu minw kɛra fɔlɔ ye ka sɔn a ma ko Yezu lo ye Masiya ye, Piyɛri ye u dɔ ye. A y’a faamu ko Jehova be tɛmɛna Yezu lo fɛ k’a ka jama kalan “nii banbali” koo la (Zan 6:66-68). Yezu suu kununin kɔ, yanni a ka yɛlɛ sankolo la, a ye cii nin kalifa Piyɛri ma: “Ne ka sagaw dɛndɛ.” (Zan 21:17). Piyɛri y’o cii dafa kantigiya la ani Jehova tɛmɛna a fɛ yɛrɛ ka Bibulu ka bataki fila sɛbɛ. Nga, Piyɛri mako tun b’a la fana k’a yɛrɛ balo Alako ta fan fɛ. Misali la, ciden Pol tun ye bataki minw sɛbɛ hakili senu barika la, a y’u sɛgɛsɛgɛ. Piyɛri tun b’a lɔn ko Pol ka bataki yɔrɔ dɔw “faamu ka gwɛlɛ.” (2 Piyɛri 3:15, 16). U be i ko “dumuni gwiliman.” Nga Piyɛri tora k’u sɛgɛsɛgɛ ani a tun lanin b’a la ko Jehova bena a dɛmɛ k’u faamu ani k’u sira tagama.—Eburuw 5:14–6:1 kalan.

8. Piɛrɛ ye mun de kɛ waati min na Ala ka mɛlɛkɛ ye bilasirali kura di a ma?

⁸ Piyɛri y’a yira ko a limaniyanin lo Jehova la, a kɛtɔ ka tugu a ka cikanw kɔ. Misali la loon dɔ, Piyɛri ye yelifɛn dɔ ye o min na mɛlɛkɛ dɔ y’a fɔ a ye ko a ka bɛgɛn dɔw dumu, k’a sɔrɔ u tun nɔgɔnin lo Musa ka sariya kɔrɔ. O cikan tun be se ka Yahutuw kɔnɔ gwan. Piyɛri kɔnna k’a jaabi ko: “Abada! Matigi, fɛɛn min man kan ka dumu, fɛnnɔgɔnin, ne ma deli k’o don n daa la ka ye.” O kɔ, mɛlɛkɛ ye Piyɛri jaabi ko: “Ala ye fɛɛn min saniya, i kan’a fɔ k’o ma ɲi ka dumu.” (Kɛw. 10:9-15). Piyɛri y’a faamu ani a y’a ka miiricogo yɛlɛma. An b’o lɔn cogo di? Dɔɔni o yenin kɔ, cɛɛ saba nana Piyɛri ka soo. U y’a fɔ a ye ko u matigi Kɔrinɛyi b’a fɛ Piyɛri ka na a fɛ. Fɔlɔ la, Piyɛri tun tɛna sɔn abada ka taga o cɛɛ ka soo sabu a tun tɛ Yahutu ye. Yahutuw tun b’a jati ko siya wɛrɛ mɔgɔw saniyanin tɛ (Kɛw. 10:28, 29). Nga Piyɛri sinna k’a ka miiriya yɛlɛma ani a ye mɛnni kɛ Jehova fɛ (Talenw 4:18). A ye Kɔrinɛyi n’a somɔgɔw waaju ani a ninsɔn diyara k’a ye ko u sɔnna tiɲɛn diinan ma, u ye hakili senu sɔrɔ ani u batizera.—Kɛw. 10:44-48.

9. Ni an ye an ka alako nege bonya ka ta’a fɛ, an bɛ nafa jumɛnw de sɔrɔ o la?

⁹ Bibulu ka kalan jɔnjɔnw be i ko nɔnɔ. I ko Piyɛri, an ka ɲi k’o kalanw sɛgɛsɛgɛ tuma o tuma. Nga Bibulu ka kalan minw faamu man nɔgɔ, olu be i ko dumuni gwiliman. An ka ɲi k’an jija walisa olu fana ka diya an ye. An ka ɲi ka wagati kunmabɔ ani ka sɔn ka jijaliw kɛ walisa ka Ala ka Kuma sɛgɛsɛgɛ ka dunya. Nga, kuun b’o la. Mun na do? Sabu an be nafa caaman sɔrɔ o la. U la fila ye nunu ye: A fɔlɔ, an be koo caaman lɔn Jehova koo la, o min be dɔ fara an ka kanuya kan a koo la ani u b’a to an b’a bonya kosɔbɛ. A filanan, o b’an jija kosɔbɛ k’an sankolola Faa kofɔ tɔɔw ye, an ka kan k’ale min bonya ani ka siran a ɲɛ (Ɔrɔm. 11:33; Yir. 4:11). An be kalan wɛrɛ sɔrɔ Piyɛri fɛ: N’an ye faamuyali kura sɔrɔ Ala ka Kuma koo la, an ka ɲi ka sin k’an ka miiricogo n’an ka kɛwalew yɛlɛma ka kɛɲɛ n’o ye. O cogo dɔrɔn lo la, an bena to k’an yɛrɛ balo koɲuman Alako ta fan fɛ ani an bena to ka Jehova bato kantigiya la.

IKO PAUL, AN KA ALAKO JOGO ƝUMANW FINI DON AN NA

10. Ka alako jogo ɲumanw fini don an na, o kɔrɔ ye mun ye? (Kolosekaw 3:8-10)

¹⁰ Walisa k’an koo diya Jehova ye, an ka ɲi k’a ɲini ka nafa sɔrɔ a ka labɛn wɛrɛ la. O ye fani ye Alako ta fan fɛ. O kɔrɔ ko di? Ciden Pol y’a sɛbɛ ko an ka ɲi k’an ka “jogokɔrɔ bɛɛ dabila” ani “ka jogokura ta.” (Kɔlɔsikaw 3:8-10 kalan). Ka se ka koow kɛ o cogo la, o tɛ ɲɛ jijalibaw kɔ. An ka Pol yɛrɛ ka ɲɛyirali lajɛ. Kabi a kanbele tuma, a ye jijalibaw kɛ walisa k’a koo diya Ala ye (Gal. 1:14; Filip. 3:4, 5). Nga, a tun t’a lɔn a ka ɲi ka Ala bato cogo ɲuman min na. A tun tɛ Krista ka kalanw lɔn ani kuncɛba tun lo fana. O bɛɛ y’a to a “tun ka fari” ani jogo jugu wɛrɛw tun b’a la.—1 Tim. 1:13.

11. Paul ye sɔn jugu jumɛn de kɛlɛ? A ɲɛfɔ.

¹¹ Yanni Pol ka kɛ kerecɛn ye, a dusu tun ka bon. A fɔra Kɛwaliw ka kitabu kɔnɔ ko Pol tun dimininba lo Yezu ka kalandenw kɔrɔ, fɔɔ a tun b’u “bagabaga n’u ka fagako ye.” (Kɛw. 9:1). Pol kɛra kerecɛn ye tuma min na, siga t’a la a ye jijaliba lo kɛ walisa k’o jogo kɔrɔ dabila (Efɛz. 4:22, 31). O bɛɛ n’a ta, tuma min na ale ni Barinabasi ma bɛn kelen ma koo dɔ la, a dimininba tun lo ani u “ye ɲɔgɔn sɔsɔ kosɔbɛ.” (Kɛw. 15:37-39). O wagati la, Pol ma koow kɛ i ko Ala b’a fɛ cogo min na. Nga, a m’a fari faga. A tora ka bondori kɛ n’a ka dafabaliyakow ye walisa k’a koo diya Jehova ye.—1 Kor. 9:27.

12. Sɔn jugu minnu tun bɛ Paul la, mun de y’a dɛmɛ ka olu kɛlɛ?

¹² Pol ye see sɔrɔ a ka jogo juguw kan ani ka jogo kura ta sabu a m’a jigi la a yɛrɛ kan (Filip. 4:13). I ko Piyɛri, Pol y’a jigi la Jehova kan walisa a k’a dɛmɛ ka yɛlɛmani bɛnninw kɛ (1 Piyɛri 4:11). O bɛɛ n’a ta, tuma dɔw la Pol tun be fili dɔw kɛ ani u tun b’a fari faga. N’a fari tun fagara, a sankolola Faa tun ye koo ɲuman minw kɛ a ye, a tun be miiri o la. O tun b’a dɛmɛ ka to ka jijaliw kɛ walisa k’a sɔɔn yɛlɛma.—Ɔrɔm. 7:21-25.

13. An bɛ se ka Paul ladege cogo di?

¹³ An be se ka Pol ladegi, n’an be sɔn a ma ko hali n’an be Jehova sago kɛra kabi wagatijan, an ka ɲi ka jijalibaw lo kɛ walisa k’an ka jogo kɔrɔ dabila ani ka jogo kura ta. O jogo kura lo ye fani ye Alako ta fan fɛ. N’an segira fili dɔ kan i n’a fɔ n’an ma se an dusu kɔrɔ wala n’an ma kuma dɔ fɛ ni ɲumanya ye, an kana an fari faga. An ka ɲi ka to k’an jija k’an miiricogo n’an ka kokɛcogow yɛlɛma (Ɔrɔm. 12:1, 2; Efɛz. 4:24). N’an b’o kɛra, an ka ɲi ka koo kɔrɔtanin nin to an hakili la: Jehova be fani min di an ma Alako ta fan fɛ, o be dan na ni fani yɛrɛ yɛrɛ ye. Fani ka ɲi ka kalan walisa a ka kɛɲɛ an na. Nga Jehova be fani min di an ma Alako ta fan fɛ, anw lo ka ɲi ka yɛlɛmaniw kɛ ka kɛɲɛ n’o ye. O la, a bɛnnin lo an k’an sɔɔn yɛlɛma ka kɛɲɛ ni Jehova ka sariyaw ye.

IKO DAWUDA, AN DOGOLEN KA TO JEHOVA KƆRƆ WALASA A K’AN LAKANA

14-15. Jehova bɛ a sagokɛlaw lakana cogo di? (Zaburu 27:5) (Ja min bɛ ɲɛ fɔlɔ kan, o fana lajɛ.)

¹⁴ Walisa ka ninsɔndiya sɔbɛ sɔrɔ, an mako be dumuni ani fani na Alako ta fan fɛ. Nga o dɔrɔn tɛ. An mako be dogoyɔrɔ la fana Alako tan fan fɛ. O kɔrɔ ko di ani an latanganin be se ka to yen cogo di?

¹⁵ Masacɛ Dawuda tun lanin b’a la ko Jehova bena ale latanga wagati gwɛlɛw na (Zaburuw 27:5 kalan). Jehova b’a sagokɛlaw latanga cogo di bi? Mɔgɔ o mɔgɔ wala fɛɛn o fɛɛn be se ka u ka limaniya nagasi pewu, Jehova b’u latanga o ma. A ye layidu ta ko kɛlɛkɛminan fɛɛn o fɛɛn dilanna u kama, u si tɛna foyi ɲɛ (Zab. 34:8; Ezayi 54:17). Hali ni fanga be Sutana n’a kɔmɔgɔw la, u tɛ se k’an mako sa pewu. Hali n’u y’an faga, Jehova bena an lakunu sukununi wagati la (1 Kor. 15:55-57; Yir. 21:3, 4). Ni hami b’an na, Jehova b’an dɛmɛ fana walisa an kana a sago kɛli dabila (Talenw 12:25; Mat. 6:27-29). Ka fara o kan, an Faa kanutigi ye balimaw di an ma minw b’an dɛmɛ. A ye diinan mɔgɔkɔrɔw fana di an ma minw b’an ɲɛminɛ (Ezayi 32:1, 2). An ka lajɛnw na, u b’an hakili jigi Jehova b’an latanga cogo wɛrɛ minw na tigitigi ani an be se ka min kɛ walisa ka nafa sɔrɔ o la.—Eburuw 10:24, 25.

16. Jehova ye Dawuda lakana cogo jumɛnw na?

¹⁶ Dawuda tun mana mɛnni kɛ Jehova fɛ, a tun b’a yɛrɛ latanga tugubanciw ka jurumuw nɔfɛkow ma (Talenw 5:1, 2 lajɛ). Nga, n’a tun ma Jehova ka sariyaw labato, Jehova tun t’a latanga a ka kɛwalew nɔfɛkow ma (2 Sam. 12:9, 10). Wagati wɛrɛw la, Dawuda tɔɔrɔla tɔɔw ka kɛwale juguw kosɔn. O wagatiw la, a tun b’a dusukunnakow bɛɛ fɔ Jehova ye delili la. O la, Jehova tun b’a dusu saalo, a kɛtɔ k’a hakili sigi ko ale b’a kanu kosɔbɛ ani ko a bena a janto a la.—Zab. 23:1-6.

17. An bɛ se ka Dawuda ladege cogo di?

¹⁷ An be se ka Dawuda ladegi, n’an be ladili ɲini Jehova fɛ n’an b’a fɛ ka desizɔnw ta. An b’a faamu fana ko tuma dɔw la, an be tɔɔrɔ sabu an ye desizɔn juguw ta, nga a ma kɛ komi Jehova t’an latangara (Gal. 6:7, 8). N’an be tɔɔrɔla fana tɔɔw ka kɛwalew kosɔn, an b’an dusukunnakow bɛɛ fɔ Jehova ye delili la ani an lanin b’a la ko a bena an tanga hamikojugu ma.—Filip. 4:6, 7.

AN KA TA’A FƐ K’AN KA ALAKO MAGO WASA

18. Gɛlɛya jumɛnw de bɛ se k’an sɔrɔ ani an bɛ se ka ta’a fɛ k’an ka alako mago wasa cogo di? (Jaw fana lajɛ.)

¹⁸ Saan 2026 ka kalankun b’a fɔ ko: “Mɔgɔ minw b’a lɔn k’u mako be Ala la, olu dagamunin lo.” An b’o kumaw tiɲɛntigiya yera bi ka tɛmɛ sanga ni wagati bɛɛ kan. Mun na do? Sabu mɔgɔ caaman ninsɔn man di bi ani u sɔnnin t’a ma ko u mako be Ala la. Mɔgɔ wɛrɛw fana b’a ɲini k’u ka Alakow nege wasa i ko u b’a fɛ cogo min na. U be tɛmɛ ngalon diinanw wala adamadenw ka miiriyaw lo fɛ k’o kɛ. An man ɲi k’u ladegi. O la, an ka ɲi ka mun lo kɛ? Jehova be dumuni min di an ma Alako tan fan fɛ, an k’an yɛrɛ balo n’o ye. An ka ɲi fana ka jogo kura ta ani k’a ɲini Jehova fɛ a k’an latanga.