Mɛlɛkɛ kantigiw ladege

1-2. (a) Danfara jumɛnw de bɛ anw ni mɛlɛkɛw cɛ? (b) Cogo jumɛnw de la anw ni mɛlɛkɛw bɔlen bɛ ɲɔgɔn fɛ?

AN YE Jehova batobagaw ye minkɛ, an be denbaya dɔ kɔnɔ o min mɔgɔw be ɲɔgɔn kanu. O denbaya kɔnɔ, an balima caaman be yen minw be duniɲa kuru bɛɛ la ani mɛlɛkɛ kantigi miliyɔn caaman fana be yen (Dan. 7:9, 10). N’an miirila mɛlɛkɛw koo la, n’a sɔrɔ an b’a ye ko u be dan na pewu an adamadenw na. Misali la, Jehova ye u dan wagatijan ka kɔn anw ɲɛ (Zɔbu 38:4, 7). Fanga b’u la ka tɛmɛ anw kan. An ye mɔgɔ dafabaliw ye minkɛ, mɛlɛkɛw ka senu ani u tilennin lo kosɔbɛ ka tɛmɛ anw kan.—Luka 9:26.

² Nga o faranfasiw bɛɛ n’a ta, an ni mɛlɛkɛw ka koo caaman bɔnin be ɲɔgɔn ma. Misali la i ko mɛlɛkɛw, an be se ka Jehova ka jogow ladegi ani see b’an ye ka koow latigɛ an yɛrɛ ma. Anw wo, mɛlɛkɛw wo, tɔgɔ b’an kelen kelen bɛɛ la, an sɔɔnw tɛ kelen ye ani kunkanbaara kelen lo ma kalifa an ma. An bɛɛ mako b’a la fana k’an Danbaga bato.—1 Piyɛri 1:12.

3. An bɛ kalan jumɛnw de sɔrɔ ka bɔ mɛlɛkɛ kantigiw ka ko la?

³ Komi an ka koo caaman bɔnin be mɛlɛkɛw ta ma, u ka ɲɛyirali be se k’an jija ani k’an kalan koo nafaman caaman na. Mɛlɛkɛ kantigiw majiginin lo, u be mɔgɔw kanu, u be muɲu ani u b’u jija walisa kafo saniyanin ka to. Barokun nin na, an bena a ye an be se k’u ladegi cogo minw na.

MƐLƐKƐ KANTIGIW MAJIGINNEN DON

4. (a) Mɛlɛkɛ kantigiw b’a jira cogo di ko u majiginnen don? (b) Mun de y’a to u majiginnen don? (Zaburu 89:7 [89:8, BS 1996])

⁴ Mɛlɛkɛ kantigiw majiginin lo. Hali k’a sɔrɔ u be koo caaman lɔn, u be ni setigiyaba ye ani u ye hakilitigiw ye, u be Jehova ka cikanw labato (Zab. 103:20). N’u b’u ka ciiw dafara, u tɛ waso u ka kɛtaw kosɔn abada wala k’u ka fanga kabakoman kɛ k’u yɛrɛ yira. Ala mana baara o baara kalifa u ma, u ninsɔn ka di k’o kɛ, hali ni mɔgɔw t’u tɔgɔ lɔna (Zɛnɛzi 32:25, 30; 2 Mas. 19:35). Jehova ka kan ni nɔɔrɔ ani tandoli min ye, mɛlɛkɛw be ban o ka la olu kan. Mun na u majiginin lo ten? U majiginin lo sabu u be Jehova kanu ani u be bonyaba la a kan.—Zaburuw 89:8 kalan.

5. Mɛlɛkɛ dɔ y’a jira cogo di ko a majiginnen don tuma min na a ye ciden Yuhana laadi? (Ja fana lajɛ)

⁵ An ka misali dɔ lajɛ min b’a yira ko mɛlɛkɛw majiginin lo. Saan 96 fan fɛ Krista tile la, mɛlɛkɛ dɔ ye koo kabakoman dɔw yira ciden Zan na. O mɛlɛkɛ tɔgɔ ma fɔ (Yir. 1:1). Tuma min na Zan ye o koo kabakomanw ye, a ye mun lo kɛ do? A tun b’a fɛ k’o mɛlɛkɛ bato. Nga o mɛlɛkɛ kantigi sinna ka ban. A y’a fɔ a ye ko: “Ayi! Kana o kɛ, bari ne fana ye Ala ka baarakɛla le ye i n’a fɔ e n’i tɔɲɔgɔnw . . . I ka kan ka Ala le bato”! (Yir. 19:10). O mɛlɛkɛ tun majiginin lo yɛrɛ le! A tun t’a fɛ u k’a tando wala ka nɔɔrɔ la a kan. O kama, a sinna k’a fɔ Zan ye ko a ka Jehova Ala lo bato. O mɛlɛkɛ m’a miiri fana ko ale ka fisa ni Zan ye. A tun be Jehova sago kɛra kabi wagatijan ka tɛmɛ Zan kan ani a ka setigiya tun ka bon ni Zan ta ye, fɔɔ ka taga ka na. O bɛɛ n’a ta, a y’a fɔ ni majigilenya ye ko ale ye Ala ka baarakɛla ye i ko Zan. Hali k’a sɔrɔ o mɛlɛkɛ ye Zan ladi, a m’a sɔngɔ. Nga, a kumana a fɛ ni ɲumanya ye. N’a sɔrɔ a y’a faamu ko Zan ye min ye, o y’a kabakoya kosɔbɛ. O lo kama, a y’a kunbiri gwan ale ɲɛɛ kɔrɔ.

6. An bɛ se ka mɛlɛkɛw ka majiginnenya ladege cogo di?

⁶ An be se ka mɛlɛkɛw ka majigilenya ladegi cogo di? I ko mɛlɛkɛw, an b’a fɛ ka baara gwɛlɛw kɛ Jehova ka ɔriganisasiyɔn kɔnɔ. Nga, an t’a fɛ k’an yɛrɛ yira an ka kɛtaw kosɔn wala k’a kɛ i n’a fɔ an be ni setigiya kabakoman dɔw ye (1 Kor. 4:7). Ka fara o kan, an man ɲi k’a miiri ko an ka fisa ni tɔɔw ye sabu an be Jehova sago kɛra kabi wagatijan ka tɛmɛ u kan wala an be ni nɛɛma baara dɔw ye. Tiɲɛn na, n’an be ni kunkanbaara caaman ye Jehova ka ɔriganisasiyɔn kɔnɔ, o wagati yɛrɛ lo la an ka ɲi k’an yɛrɛ jati mɔgɔ dɔgɔmanninw ye (Luka 9:48). I ko mɛlɛkɛw, an b’a fɛ ka baara kɛ tɔɔw ye, an t’a fɛ ka waso.

7. An bɛ se k’a jira cogo di ko an majiginnen don ni an bɛ mɔgɔ dɔ laadi walima k’a kolo?

⁷ N’an ka ɲi ka an balima wala an deen dɔ kolo wala k’a ladi, an be se k’a yira fana ko an majiginin lo. N’an be mɔgɔ dɔ ladira, n’a sɔrɔ tuma dɔw la, an bena sin ka tiɲɛn fɔ a ye. Nga i ko mɛlɛkɛ ye Zan ladi ni ɲumanya ye cogo min na, an be se ka koow fɔ ka gwɛ, nga an t’a tigi dusu tiɲɛ. N’an t’a miiri ko an ka fisa ni tɔɔw ye, o bena an dɛmɛ ka basigi Bibulu kan ka ladiliw di ni bonya ani kanuya ye.—Kɔlɔs. 4:6.

MƐLƐKƐW BƐ AN KANU

8. (a) Ka kɛɲɛ ni Luka 15:10 ye, mɛlɛkɛw y’a jira cogo di ko u bɛ mɔgɔw kanu? (b) Mɛlɛkɛw bɛ an dɛmɛ cogo di waajulibaara la? (Ja fana lajɛ ɲɛ fɔlɔ kan)

⁸ Mɛlɛkɛw t’u mako bɔ an adamadenw na ani u t’a jati ko nafa foyi t’an na. Nga, u b’an kanu. Ni dɔ ye jurumuba kɛ ani a nimisara, o kɔrɔ n’a kɔsegira Jehova ma, mɛlɛkɛw be ninsɔn diya. Ni dɔ y’a ka ɲɛnamaya kɛcogo yɛlɛma ani k’a daminɛ ka tiɲɛn sira tagama, u be ninsɔn diya fana (Luka 15:10 kalan). Ka fara o kan, mɛlɛkɛw b’an dɛmɛ waajuli baara la (Yir. 14:6). Hali ni olu lo tɛ mɔgɔw waaju, u be se ka weleweledala dɔ ɲɛsin mɔgɔ dɔ ma min b’a fɛ ka dɔ lɔn Jehova koo la. Nga, an tɛ se k’a fɔ ko siga t’a la, mɛlɛkɛw lo y’an ɲɛsin mɔgɔ dɔ ma. Mun na do? Sabu Jehova be se ka tɛmɛ sababu wɛrɛw fɛ i n’a fɔ a ka hakili senu, ka mɔgɔw dɛmɛ wala k’a sagokɛlaw ɲɛminɛ (Kɛw. 16:6, 7). O bɛɛ n’a ta, a be tɛmɛ a ka mɛlɛkɛw fɛ k’an dɛmɛ waajuli baara la. O la, n’an be kibaro diiman fɔra mɔgɔw ye, an be se ka la a la ko mɛlɛkɛw be n’an ye ani ko u bena an dɛmɛ.—Koorilen nin lajɛ: “U ka deliliw jaabira.”b

9. Kanuya min bɛ mɛlɛkɛw la k’a ɲɛsin mɔgɔw ma, an bɛ se ka o ladege cogo di?

⁹ Mɛlɛkɛw be mɔgɔw kanu. An be se k’u ladegi cogo di? N’an y’a mɛn ko mɔgɔ dɔ segira Jehova ma, o b’an ninsɔn diya i ko mɛlɛkɛw. An b’an seko kɛ k’a yira a tigi la ko an b’a kanu ani ko an ninsɔn ka di k’a ye ko a be Jehova sago kɛra kokura (Luka 15:4-7; 2 Kor. 2:6-8). An be se fana ka mɛlɛkɛw ladegi an kɛtɔ k’an seko bɛɛ kɛ waajuli baara la (Waaj. 11:6). I ko mɛlɛkɛw b’an dɛmɛ cogo min na n’an be kibaro diiman fɔra mɔgɔw ye, an fana be se ka sababuw ɲini k’an balimaw dɛmɛ waajuli baara la. Misali la, an be se ka waajuli kɛ ni weleweledala kura dɔ ye. Balima minw kɔrɔla wala minw man kɛnɛ, an be se ka olu dɛmɛ u ka se ka bɔ waajuli la.

10. An bɛ kalan jumɛn de sɔrɔ ka bɔ Sara ka ko la?

¹⁰ N’an ka koow cogoya b’a to an tɛ se ka bɛrɛ kɛ Jehova ka baara la, an be se ka mun lo kɛ do? An bele be se ka sababuw ɲini ka baara kɛ ni mɛlɛkɛw ye waajuli la. Balimamuso dɔ tɔgɔ ko Sarac ani a be Ɛndi jamana na. An k’a ka koo lajɛ. Saan 20 ɲɔgɔn kɛnin kɔ piyɔniye baara la, a banana ani a tun tɛ se ka wuli ka bɔ a ka dilan kan. O y’a jigi tigɛ. A ka kafo balimaw ka dɛmɛ n’u ka kanuya sababu la ani a be Bibulu kalan loon o loon minkɛ, a ye ninsɔndiya sɔrɔ kokura. Nga, a tun ka ɲi ka fɛɛrɛ kuraw ɲini walisa ka waajuli kɛ. A tun tɛ se ka sigi ka lɛtɛrɛw sɛbɛ. O kama, a tun be waajuli kɛ telefɔni dama lo sababu fɛ. O la, a y’a ka viziti kuraw weele ani olu ye mɔgɔ wɛrɛw kofɔ a ye, a tun bena diya minw ye ka bibulukalan kɛ. Mun lo sɔrɔla o la? Kalo damanin dɔrɔn kɔnɔ, a tun be ni bibulukalan 70 ye! Komi a tun tɛ se k’u bɛɛ kɛ, a y’u dɔw kalifa balima wɛrɛw ma a ka kafo kɔnɔ. O kalandenw cɛma, caaman be na an ka lajɛnw na sisan. Siga t’a la, mɛlɛkɛw ninsɔn ka di kosɔbɛ ka baara kɛ ni balimaw ye minw b’u seko bɛɛ kɛ waajuli baara la i ko Sara!

MƐLƐKƐW BƐ MUƝULI KƐ

11. Mɛlɛkɛ kantigiw y’a jira cogo di ko u bɛ muɲuli kɛ kosɛbɛ?

¹¹ Mɛlɛkɛ kantigiw be muɲuli kɛ cogo kabakoman na ani u ye ɲɛyirali ɲumanw ye an fɛ. U be tilenbaliyakow ni kojuguw muɲuna kabi saan waa caaman. U tun be yen tuma min na Sutana ni mɛlɛkɛ caaman wɛrɛw murutira Jehova ma, k’a sɔrɔ u tun be Jehova sago kɛra ɲɔgɔn fɛ (Zɛnɛzi 3:1; 6:1, 2; Zude 6). Bibulu be kuma mɛlɛkɛ kantigi dɔ koo la, min ye kɛlɛ kɛ ni mɛlɛkɛ jugu dɔ ye tile caaman kɔnɔ (Dan. 10:13). Ka fara o kan, kabi Adama ni Awa ka wagati la, mɛlɛkɛw y’a ye ko mɔgɔ damanin dɔrɔn lo y’a latigɛ ka Jehova bato. O bɛɛ n’a ta, o mɛlɛkɛ kantigiw bele be Jehova sago kɛra ni ninsɔndiya ani kisɛya ye. U b’a lɔn ko Ala bena daan sigi tilenbaliyakow bɛɛ la wagati bɛnnin na.

12. Mun de bɛ se ka an dɛmɛ ka muɲuli kɛ?

¹² An be se ka mɛlɛkɛw ka muɲuli ladegi cogo di? I ko mɛlɛkɛw, n’a sɔrɔ an ɲɛɛ be tilenbaliyakow la wala mɔgɔw b’an kɛlɛla. Nga mɛlɛkɛw lanin b’a la ko Ala bena daan sigi kojuguw bɛɛ la wagati bɛnnin na ani an fana lanin b’o la. O la, i ko o mɛlɛkɛ kantigiw, an tɛ “sigɛn koɲuman kɛli la.” (Gal. 6:9). Ala ye layidu ta ko a bena an dɛmɛ ka muɲuli kɛ (1 Kor. 10:13). An be se ka hakili senu deli Jehova fɛ, o min b’an dɛmɛ ka kɛ ni muɲuli ani ninsɔndiya ye (Gal. 5:22; Kɔlɔs. 1:11). Nga n’u b’i kɛlɛla do? I jigi bɛɛ la Jehova kan ani kana siran. A bena i dɛmɛ tuma bɛɛ ani k’i barika bonya.—Eburuw 13:6.

MƐLEKƐW B’AN DƐMƐ WALISA JƐKULU SENUYALEN KA TO

13. Baara kɛrɛnkɛrɛnnen jumɛn de kalifara mɛlɛkɛw ma nin don laban ninnu na? (Matiyu 13:47-49)

¹³ Laban loon nunu na, Jehova ye kunkanbaara kɛrɛnkɛrɛnnin dɔ kalifa mɛlɛkɛw ma (Matiyo 13:47-49 kalan). Duniɲa kuru bɛɛ kɔnɔ, mɔgɔ miliyɔn caaman b’u mako don kibaro diiman na. Dɔw be sɔn ka yɛlɛmaniw kɛ walisa ka kɛ Jehova batobagaw ye, nga dɔ wɛrɛw t’o kɛ. A ɲinina mɛlɛkɛw fɛ u ka “mɔgɔjuguw woloma k’u bɔ mɔgɔɲumanw na.” O kɔrɔ ko cii dira u ma u k’u janto walisa kafo saniyanin ka to. A ma fɔ ko mɔgɔ minw bɛɛ tɛ jɛn n’an ye tugun, u tɛ se ka kɔsegi Jehova ma wala ko gwɛlɛya si tɛna kɛ kafo kɔnɔ. Nga, an ka la a la ko mɛlɛkɛw be baaraba kɛra walisa an ka kafow saniyanin ka to.

14-15. An bɛ se ka mɛlɛkɛw ladege cogo di ani k’a jira ko an b’a fɛ jɛkulu senuyalen ka to? (Jaw fana lajɛ)

¹⁴ An be se ka mɛlɛkɛw ladegi cogo di ani k’a yira ko an b’a fɛ kafo saniyanin ka to? An k’an seko bɛɛ kɛ walisa an ka kafo saniyanin ka to tagamacogo ani Alako ta fan fɛ. O la, an b’an jija k’an dusukun latanga, an kɛtɔ ka teri ɲumanw sugandi. Koo o koo be se k’an ni Jehova ka jɛnɲɔgɔnya nagasi, an b’an yɔrɔ janya o la fana (Zab. 101:3). An be se k’an balimaw dɛmɛ fana u ka to kantigiya la Jehova ye. Misali la, n’an y’a mɛn ko an kerecɛnɲɔgɔn dɔ ye jurumuba kɛ, an ka ɲi ka mun lo kɛ do? An b’a kanu minkɛ, an bena a jija a ka taga a fɔ diinan mɔgɔkɔrɔw ye. N’a m’o kɛ, an yɛrɛ lo bena taga a fɔ u ye sabu o balima man kɛnɛ Alako ta fan fɛ ani an b’a fɛ a ka dɛmɛ sɔrɔ joona joona!—Zaki 5:14, 15.

¹⁵ Nga, mɔgɔ minw ye jurumubaw kɛ, u ka kan k’olu dɔw bɔ kafo kɔnɔ. N’o kɛra, an tɛ “jɛn” n’u ye tugund (1 Kor. 5:9-13). O labɛn b’a to kafo saniyanin be to. Ka fara o kan, u ye minw bɔ kafo kɔnɔ n’an tɛ jɛn ni olu ye, an be koo ɲuman kɛ u la fana. N’an be mɛnni kɛ Jehova fɛ an kɛtɔ ka ban ka jɛnɲɔgɔnya kɛ n’u ye, n’a sɔrɔ u bena a faamu ko u mako b’a la ka kɔsegi Jehova ma. N’u y’o kɛ, an be fara Jehova ni mɛlɛkɛw kan ka ninsɔn diya.—Luka 15:7.

16. I bɛna i jija ka mɛlɛkɛw ladege ko jumɛnw de la?

¹⁶ Jehova ye nɛɛmaba kɛ an ye, a kɛtɔ k’an dɛmɛ ka dɔ lɔn mɛlɛkɛw koo la ani k’a to an be baara kɛra n’u ye! O la, an k’u ka jogow ladegi: u majiginin lo, u be mɔgɔw kanu, u be muɲuli kɛ ani u b’u janto kafo saniyanin ka to tagamacogo ani Alako ta fan fɛ. N’an be o mɛlɛkɛ kantigiw ladegi, an fana bena to ka Jehova bato a ka denbaya kɔnɔ fɔɔ abada.