An tɛ an kelen na abada

1-2. (a) Kɔrɔbɔliw waati la, mun na an bɛ se k’a fɔ ko an tɛ an kelen na abada? (b) An bɛna mun de ye nin barokun in kɔnɔ?

NI GWƐLƐYABAW b’an kan, a be se ka kɛ an ɲɛɛ na ko an b’an kelen n’an kelen tuuba dɔ kɔnɔ. Nga an t’an kelen. An sankolola Faa kanutigi b’a lɔn gwɛlɛya minw b’an kan. Nga o dɔrɔn tɛ, a y’a daa di fana ko a bena an dɛmɛ an ka see sɔrɔ u kan. Jehova b’a sagokɛla kantigiw hakili sigi ko: “Ne b’aw dɛmɛ.”—Ezayi 41:10.

² Barokun nin na, an bena a ye cogo min na Jehova b’an dɛmɛ a kɛtɔ 1) k’an ɲɛminɛ, 2) k’an dɛmɛ an k’an makoyafɛnw sɔrɔ, 3) k’an latanga, ani 4) k’an dusu saalo. Jehova b’an hakili sigi ko gwɛlɛya o gwɛlɛya mana an sɔrɔ, a tɛna ɲinɛ an kɔ ani ko a tɛna an to yen abada. O la, an t’an kelen fewu.

JEHOVA BƐ AN ƝƐMINƐ

3-4. Jehova bɛ an ɲɛminɛ cogo di? (Zaburu 48:14)

³ Zaburuw 48:15 kalan. Jehova t’a ɲini an fɛ an k’an yɛrɛ ɲɛminɛ. A be tɛmɛ fɛɛrɛ jumanw lo fɛ k’a sagokɛla kantigiw ɲɛminɛ bi bi nin na? A be tɛmɛ fɛɛrɛ minw fɛ, u dɔ ye Bibulu lo ye (Zab. 119:105). Jehova ka Kuma barika la, a b’an dɛmɛ an ka desizɔn ɲumanw ta ani ka kɛ ni jogo ɲumanw ye. O b’a to an be ninsɔndiyaba sɔrɔ kabi sisan ani o bena kɛ sababu ye an be ɲɛnamaya banbali sɔrɔ sini ma.a Misali la, Jehova b’an dɛmɛ walisa an kana dimi mara an kɔnɔ, an ka kɛ hɔɔrɔnw ye ani ka tɔɔw kanu n’an dusu bɛɛ ye (Zab. 37:8; Eburuw 13:18; 1 Piyɛri 1:22). N’an b’o kɛ, an bena kɛ bangebaga ɲumanw, furuɲɔgɔn ɲumanw ani teri ɲumanw ye.

⁴ Ka fara o kan, Jehova ye mɔgɔ dɔw kofɔ a ka Kuma kɔnɔ, o minw dusukunnakow n’an taw ye kelen ye ani an ka gwɛlɛyaw ɲɔgɔn tun b’u kan (1 Kor. 10:13; Zaki 5:17). N’an b’o mɔgɔw ka maanaw kalan ani kalan minw be sɔrɔ o la, n’an b’o sira tagama, o b’an nafa cogo fila ɲɔgɔn na. A fɔlɔ, an b’a faamu ko gwɛlɛya tɛ anw dɔrɔn le kan. Mɔgɔ dɔw y’an ka gwɛlɛyaw ɲɔgɔn sɔrɔ ani u sera k’u muɲu (1 Piyɛri 5:9). A filanan, an b’a faamu an be se ka an ka gwɛlɛyaw muɲu cogo min na.—Ɔrɔm. 15:4.

5. Jehova bɛ tɛmɛn jɔniw de fɛ ka an ɲɛminɛ ɲɛnamaya sira kan?

⁵ Jehova be tɛmɛ an balimaw fana fɛ k’an ɲɛminɛ.b Misali la, kafokulu kɔrɔsibagaw be taga bɔ balimaw ye kafow kɔnɔ walisa k’u jija. U ka kalanw b’an ka limaniya barika bonya ani k’an jija an ka to kelenya la (Kɛw. 15:40–16:5). Diinan mɔgɔkɔrɔw fana b’u janto sɔbɛ la weleweledala kelen kelen bɛɛ la (1 Piyɛri 5:2, 3). Bangebagaw b’u deenw ɲɛminɛ Alako ta fan fɛ, u kɛtɔ k’u dɛmɛ u ka jatiminɛ kɛ koɲuman ani ka kɛ ni delinanko ɲumanw ye (Talenw 22:6). Balimamuso minw ye kerecɛn kolɔnbagaw ye, olu be balima sunguruw dɛmɛ u kɛtɔ ka kɛ ɲɛyirali ɲumanw ye, ka ladili ɲumanw di u ma ani k’u jija kosɔbɛ.—Titi 2:3-5.

6. An ka kan ka mun de kɛ walasa Jehova ka ɲɛminɛli k’an nafa?

⁶ An mako be ɲɛminɛli min na, Jehova b’a janto walisa an k’o sɔrɔ. A be min kɛ an ye, an be se k’a yira cogo di ko an b’a waleɲuman lɔn o kosɔn? Talenw 3:5, 6 b’a fɔ ko: “E jigi la Masaba kan sɔbɛ la. Kan’i bolo la i yɛrɛ ka lɔnniya kan.” N’an b’an jigi la Jehova kan, ‘a bena an ka sira gwɛya an ye.’ O kɔrɔ ko Jehova ka dɛmɛ barika la, an bena an yɛrɛ tanga gwɛlɛya caaman ma ani an ninsɔn bena diya kosɔbɛ. An be Jehova waleɲuman yɛrɛ le sabu a b’an lɔn koɲuman ani a b’an kanu kosɔbɛ. O la, a ka ladiliw b’an kelen kelen bɛɛ nafa!—Zab. 32:8.

JEHOVA BƐ AN DƐMƐ AN KA AN MAGOƝƐFƐNW SƆRƆ

7. Jehova bɛ an dɛmɛ cogo di an ka an magoɲɛfɛnw sɔrɔ? (Filipekaw 4:​19)

⁷ Filipikaw 4:19 kalan. Tiɲɛn lo ko Jehova b’an ɲɛminɛ Alako ta fan fɛ. Nga, a tɛ dan o ma. An be baara min kɛ walisa ka se ka dumuni, fani donta ani siyɔrɔ sɔrɔ, Jehova be barika don o la (Mat. 6:33; 2 Tes. 3:12). Tiɲɛn lo ko a bɛnnin lo an ka hami an makoyafɛnw koo la. Nga, Jehova b’an jija ko an kana hami kojugu o fɛɛnw koo la (kunnafoni wɛrɛ lajɛ Matiyo 6:25 yɔrɔ la, Bible d’étude kɔnɔ). Mun na do? Sabu an Faa t’a sagokɛla kantigiw to yen fewu gwɛlɛyaw tuma na (Mat. 6:8; Eburuw 13:5). A y’a daa di ko a bena an dɛmɛ an k’an makoyafɛnw sɔrɔ. O la, an b’an jigi bɛɛ la a kan sabu an lanin b’a la ko a bena o kɛ.

8. Jehova ye mun de kɛ ka Dawuda dɛmɛ?

⁸ An k’a filɛ Jehova ye min kɛ ka Dawuda dɛmɛ. Saan caaman minw na Dawuda tun be bolila masacɛ Sayuli ɲɛ, ale n’a ka kɛlɛdenw mako tun be min na walisa ka kisi, Jehova y’u dɛmɛ k’o sɔrɔ. Jehova ye Dawuda dɛmɛ cogo min na o saanw kɔnɔ, a miirila o la ani a y’a fɔ ko: “Ne tun ye kanbelen ye, n kɔrɔla sisan, nga n ma mɔgɔtilennin filinin ye kɔfɛ, n fana m’a ye n’a kɔmɔgɔ b’a daladumuni daali.” (Zab. 37:25). N’a sɔrɔ ele fana y’a kɔrɔsi k’a ye ko Jehova y’a janto ele wala i balimaw na ni kanuya ye wagati gwɛlɛw na.

9. Kasara waati la, Jehova bɛ a sagokɛlaw dɛmɛ cogo jumɛnw na? (Jaw fana lajɛ.)

⁹ Ni balawo cunna Jehova sagokɛlaw kan, a b’u dɛmɛ walisa u k’u makoyafɛnw sɔrɔ. Saan kɛmɛkulu fɔlɔ la, tuma min na kɔngɔba donna Zeruzalɛmu, dugu caaman balimaw ye dɛmɛ lase u kerecɛnɲɔgɔnw ma (Kɛw. 11:27-30; Ɔrɔm. 15:25, 26). Bi fana, Ala sagokɛlaw b’u tɛgɛ labila o cogo kelen na. Ni balawo cunna Jehova sagokɛla dɔw kan, kanutigi Ala be tɛmɛ a sagokɛla wɛrɛw fɛ ka dɛmɛ lase u ma. Misali la, u be dumuni, jii, fani ani furaw di u ma. Balima minw b’an ka Masaya Boonw n’a ɲɔgɔnnaw lɔli baara jɛnkuluw kɔnɔ, olu be balimaw ka boonw ani Masaya Boonw lalaga. Minw ka boon halakira wala u ka mɔgɔ kanulen dɔ sara, Jehova sagokɛlaw be teliya k’olu jija Alako ta fan fɛ ani k’u dusu saalo.c

10-11. An bɛ kalan jumɛn de sɔrɔ ka bɔ Borys ka misali la?

¹⁰ Hali minw tɛ Jehova batora fɔlɔ, Jehova b’a tɛgɛ labila k’olu fana dɛmɛ. An be Jehova ladegi an kɛtɔ ka sababuw ɲini ka ɲumanya kɛ mɔgɔw ye hali n’u tɛ Jehova batora (Gal. 6:10). Tuma caaman na, o b’a to mɔgɔw b’an tɔgɔɲuman fɔ. An ka Borys ka koo lajɛ. Lakɔliso dɔ ɲɛmɔgɔ lo Ikrɛni jamana na. Borys tɛ Jehova Seere ye. O bɛɛ n’a ta, lakɔliden minw ye Jehova Seerew ye, a tun b’u minɛ ni ɲumanya ye ani a tun be bonya la u kan u ka lannakow kosɔn. A tun be yɔrɔ min na, kɛlɛ wulila yen. O la, a y’a latigɛ ka taga jamana yɔrɔ wɛrɛ la kɛlɛ gwannin tɛ yɔrɔ min na ani balimaw y’a dɛmɛ. Kɔfɛ, Borys tagara Krista saya Hakilijigi lajɛn na. A miirila Jehova Seerew ye min bɛɛ kɛ a ye ani a ko: “Jehova Seerew y’u mako don n’ na ani ka n’ dɛmɛ. N’ b’u waleɲuman lɔn kosɔbɛ.”

¹¹ An be se k’an sankolola Faa ka makari ɲɔgɔn ladegi. Cogo di? Minw mako be dɛmɛ na, an k’an ka kanuya yira u la, hali n’u tɛ Jehova batora (Luka 6:31, 36). An jigi b’a la k’o kanuya bena a to u be kɛ Krista ka kalandenw ye loon dɔ (1 Piyɛri 2:12). Nga hali n’u ma kɛ a ye, an ninsɔn bena diya kosɔbɛ sabu ninsɔndiya be mɔgɔ sɔnni na ka tɛmɛ sɔrɔli kan.—Kɛw. 20:35.

JEHOVA BƐ AN LAKANA

12. Jehova ye layidu ta ko a bɛna a ka jamakulu lakana cogo jumɛn na? (Zaburu 91:​1, 2, 14)

¹² Zaburuw 91:1, 2, 14 kalan. Jehova y’a daa di ko bi, a bena an latanga Alako ta fan fɛ. A tɛna sɔn abada Sutana ka tiɲɛn batoli nagasi (Zan 17:15). An lanin b’a la kosɔbɛ ko “tɔɔrɔba” tuma na, Jehova bena a ka jama latanga Alako ta fan fɛ ani k’u kisi, i ko a tun y’a fɔ cogo min na.—Yir. 7:9, 14.

13. Cogo jumɛnw na Jehova bɛ an bɛɛ kelen kelen lakana?

¹³ Jehova b’an kelen kelen bɛɛ latanga cogo di? A ka Kuma barika la, a b’an dɛmɛ ka ɲuman ni juguman lɔn ka bɔ ɲɔgɔn na (Eburuw 5:14). An be kalan minw sɔrɔ Bibulu kɔnɔ, n’an be tugu o kɔ, o b’an latanga Alako ta fan fɛ ani fana o b’an tanga tɔɔrɔ dɔw ma (Zab. 91:4). Ka fara o kan, Jehova b’an latanga kafo sababu la (Ezayi 32:1, 2). Minw be Jehova kanu ani u be tugu a ka sariyakolow kɔ, n’an be wagati kɛ n’u ye, an be jijali sɔrɔ u fɛ. U be barika don an na fana walisa an ka se ban kojugukɛ ma.—Talenw 13:20.

14. (a) Mun na Ala tɛ an tanga kɔrɔbɔliw bɛɛ ma? (b) Zaburu 9:11 bɛ hakili sigi jumɛn de di an ma? (Duguma sɛbɛnni fana lajɛ.)

¹⁴ Galen, Jehova y’a sagokɛlaw latanga tɔɔrɔ wala saya ma. Nga, a m’o kɛ tuma bɛɛ. Bibulu b’a fɔ ko “barinako” be se k’an bɛɛ sɔrɔ (Waaj. 9:11). Ka fara o kan, walisa k’a yira ko Sutana ye ngalontigɛla ye, Jehova y’a to a sagokɛla dɔw ye kɔrɔbɔliw sɔrɔ ani u ye dɔw yɛrɛ faga (Zɔbu 2:4-6; Mat. 23:34). O kelen lo bi fana. Hali ni Jehova m’an ka kɔrɔbɔliw bɔ an kan, an be se ka la a la ko an minw b’a kanu, a tɛna an to yen abada.d—Zab. 9:11.

JEHOVAH BƐ AN DUSU SAALO

15. Cogo jumɛn na Jehova bɛ tɛmɛn delili, a ka Kuma ani an krecɛnɲɔgɔnw fɛ ka an dusu saalo? (2 Kɔrɛntekaw 1:​3, 4)

¹⁵ Vɛrise nunu kalan: 2 Korɛntikaw 1:3, 4. Tuma dɔw la, an dusu be kasi, an hakili be ɲagami wala an be hami. N’a sɔrɔ gwɛlɛya dɔ b’i kan sisan yɛrɛ min b’a to i b’a jati ko i b’i kelen na. Yala mɔgɔ be yen min b’i faamu wa? Ɔnhɔn, Jehova b’i faamu. Tɔɔrɔ min b’an kan, a b’o faamu. Nga o dɔrɔn tɛ, “ale lo b’an jigi tugu an ka tɔɔrɔ bɛɛ la.” A b’o kɛ cogo di? N’an be Jehova deli n’an dusu bɛɛ ye, “Ala ka hɛrɛ min tɛmɛna mɔgɔw ka faamuyali ma,” a b’o di an ma (Filip. 4:6, 7). N’an be Bibulu kalan fana, o b’an dusu saalo sabu Bibulu ye Jehova ka Kuma lo ye. Jehova ka Kuma kɔnɔ, a b’a yira an na ko a b’an kanu kosɔbɛ. A b’an kalan fana walisa an ka kɛ hakilitigiw ye ani a be jigiya di an ma. Ka fara o kan, kafo ka lajɛnw b’an dusu saalo sabu an be jijaliw sɔrɔ ka bɔ Bibulu kɔnɔ ani an be wagati kɛ n’an balimaw ye, o minw b’an kanu.

16. An bɛ kalan jumɛn de sɔrɔ ka bɔ Nathan ni Priscilla ka misali la?

¹⁶ Jehova be tɛmɛ a ka Kuma fɛ k’an dusu saalo ani k’an jija. Balimacɛ Nathan n’a muso Priscilla ka koo b’o lo yira. U be Etazini jamana na. A saan damanin ye nin ye, u y’a latigɛ ka taga dɛmɛ don yɔrɔ min na weleweledalaw man ca. Nathan ko: “An tun lanin b’a la ko Jehova bena an duga an ka jijaliw kosɔn.” Nga tuma min na u sera u ka yɔrɔ kura la, kɛnɛyako dɔw cunna u kan ani u ye gwɛlɛya dɔw sɔrɔ wariko ta fan fɛ. O kama, u kɔsegira u ka duga la. Nga wariko gwɛlɛya bele tun b’u kan. Nathan ko: “N’ tun be n’ yɛrɛ ɲininga fɛɛn min kama Jehova m’an duga, i ko an tun y’a miiri cogo min na. N’ yɛrɛ y’a daminɛ k’a miiri ko n’a sɔrɔ n’ ye koo jugu dɔ lo kɛ.” Kɔfɛ, Nathan ni Priscilla y’a faamu ko Jehova m’u to yen. Nathan y’a fɔ ko: “O wagati gwɛlɛw na, Bibulu kɛra an fɛ i ko teri hakilitigi min b’an jija ani k’an ɲɛminɛ. Sanni ka to ka miiri o kɔrɔbɔli la, Jehova tun b’an dɛmɛna cogo min na k’o muɲu, an tun be miiri o lo la. O y’a to an lara a la kosɔbɛ ko Jehova bena an dɛmɛ ka kɔrɔbɔli nataw fana muɲu.”

17. Cogo jumɛn na balimamuso Helga ye dusu saalo sɔrɔ? (Ja fana lajɛ.)

¹⁷ An balimaw fana be se k’an dusu saalo. Cogo di do? An ka balimamuso Helga ka koo lajɛ. A be Hɔngiri jamana na. Saan caaman kɔnɔ, a ye gwɛlɛya caaman sɔrɔ o minw y’a hakili ɲagami ani k’a kɛ a tun b’a jati ko nafa foyi t’ale la. A miirila k’a ye ko Jehova tɛmɛna kafomɔgɔw fɛ k’a dusu saalo o saanw bɛɛ la. A y’a sɛbɛ ko: “N’ tun be n’ janto n’ deen na min man kɛnɛ, n’ ka baloɲini baara tun be yen ani gwɛlɛya wɛrɛw fana tun be n’ kan minw be n’ barika dɔgɔya. Jehova tun mana a ye ko n’ barika be dɔgɔyara, a tun be n’ dɛmɛ tuma bɛɛ. Jehova y’a janto n’ na loon o loon saan 30 tɛmɛninw na. Tuma caaman na, a be tɛmɛ tɔɔw ka jijali kumaw fɛ ka n’ barika bonya. Dɔw ye mesazi wala karti dɔ ci n’ ma, wala u ye kuma dɔ fɔ n’ ye walisa ka n’ tando wagati min na n’ mako gwɛlɛ tun b’o la.”

18. An bɛ se ka mɔgɔ tɔw dusu saalo cogo di?

¹⁸ N’an be tɔɔw jija, an be Ala lo ladegira ani o ye nɛɛma lo ye an fɛ. Nga an be se k’o kɛ cogo di? An be se k’o kɛ n’an be muɲu k’u lamɛn, ka jijali kumaw fɔ u ye ani k’u dɛmɛ cogo tigitigi dɔw la (Talenw 3:27). Mɔgɔ minw be tɔɔrɔla, an b’an jija k’u bɛɛ dusu saalo, hali minw tɛ Ala batora fɔlɔ. O la, n’an sigiɲɔgɔn dɔ dusu kasinin lo, ni bana dɔ b’a la wala ni hami b’a kan, an be taga bɔ a ye, k’a lamɛn ani ka jijali kuma dɔw fɔ a ye ka bɔ Bibulu kɔnɔ. N’an be Jehova ladegi, ale min “be mɔgɔ bɛɛ jigi tugu,” an bena an kerecɛnɲɔgɔnw dɛmɛ u k’u ka kɔrɔbɔliw muɲu. Nga o dɔrɔn tɛ, minw tɛ Ala batora fɔlɔ, o bena a to u b’a ɲini ka dɔ lɔn a koo la.—Mat. 5:16.

JEHOVA BENA AN DƐMƐ TUMA BƐƐ

19. Jehova bɛ mun de kɛ an ye ani an bɛ se ka a ladege cogo di?

¹⁹ Minw bɛɛ be Jehova kanu, a b’a janto olu la kosɔbɛ. Ni gwɛlɛyaw b’an kan, a t’an to yen. Jehova b’a janto a sagokɛla kantigiw la i ko faa kanutigi b’a janto a deen na cogo min na. A b’an ɲɛminɛ, a b’an dɛmɛ an k’an makoyafɛnw sɔrɔ, a b’an latanga ani k’an dusu saalo. An b’an sankolola Faa kanutigi ladegi n’an be tɔɔw dɛmɛ ani k’u jija u ka gwɛlɛyaw tuma na. Gwɛlɛyaw ni dusukasikow bɛɛ n’a ta, an ka la a la ko Jehova be n’an ye. A yɛrɛ y’a daa di ko: “Aw kana siran, bari, ne be ni aw ye.” (Ezayi 41:10). O la, an be se ka la a la kosɔbɛ ko an t’an kelen na abada!