Yesu ka cɛsiri ɲɔgɔn ladege i ka waajulibaara la

1. Minnu bɛ Jehova sago kɛ danfara jumɛn bɛ olu ni krecɛn tɔw cɛ?

FƐƐN minw b’a to Jehova sagokɛlaw be dan na ni kerecɛn tɔgɔtigiw ye, u dɔ ye ko u be waajuli kɛ ni kisɛyaa ye (Titi 2:14). Nka n’a sɔrɔ tuma dɔw la, a ka gwɛlɛ i ma ka ninsɔndiya sɔrɔ waajuli la. An balimacɛ dɔ ye diinan mɔgɔkɔrɔ ye ani a be baaraba kɛ a ka kafo kɔnɔ. A ko: “Tuma dɔw la, waajulikɛ nege tɛ n’ na.” N’a sɔrɔ ele fana be n’o miiriya ɲɔgɔn ye wagati dɔw la.

2. Mun na tuma dɔw la a ka gɛlɛn an cɛsirilen ka to waajulibaara la?

² N’a sɔrɔ Jehova ka baara faan dɔw ka di an ye kosɔbɛ ka tɛmɛ waajuli baara kan. Mun na do? Sabu n’an be Masaya Boonw lɔ wala k’u ladon, ani kasara cunna balima minw kan n’an be taga u dɛmɛ, wala n’an be balimaw jija wagati wɛrɛw la, an be sin k’o nafa ye ani o b’an ninsɔn diya. N’an be baara kɛra n’an balimaw ye, an kaan bɛnnin lo ani an b’an ka kanuya yira ɲɔgɔn na. An b’a lɔn fana ko an be min kɛ u ye, o ka di u ye. Nka n’a sɔrɔ an be waajuli kɛra kiin dɔ kɔnɔ a saan caaman ye nin ye k’a sɔrɔ mɔgɔ bɛrɛ t’u mako don kibaro diiman na. Wala n’a sɔrɔ mɔgɔ dɔw tɛ sɔn k’an lamɛn yɛrɛ. An b’a lɔn fana ko laban tuma be surunyana ka taga minkɛ, mɔgɔw bena to k’an kɛlɛ (Mat. 10:22). Mun lo be se k’an dɛmɛ an kisɛyanin ka to waajuli baara la ani ka dɔ fara o kisɛya kan yɛrɛ?

3. Luka 13:​6-9 bɛ a jira cogo di ko Yesu cɛsirilen tun don?

³ Yezu ka koo b’a yira an na an be se ka kisɛya waajuli baara la cogo min na. Tuma min na Yezu tun be dugukolo kan, a m’a fari faga abada waajuli baara la. Nka wagati tɛmɛtɔ, a yɛrɛ ye dɔ fara a ka waajuli baara kan (Luka 13:6-9 kalan). Yezu ka talen dɔ la, a kumana cɛɛ dɔ koo la, torosun tun be min fɛ. O cɛɛ tora k’a janto o torosun na saan saba kɔnɔ, nka a ma den. O cogo kelen na, Yezu tora ka Yahutuw waaju saan saba ɲɔgɔn kɔnɔ. Nka u fanba ma sɔn ka kɛ a ka kalandenw ye. I ko torosun tigi m’a fari faga o torosun koo la cogo min na, Yezu fana m’a fari faga mɔgɔw koo la ani dɔ ma bɔ a ka kisɛya la. A yɛrɛ tora k’a jija kosɔbɛ walisa ka mɔgɔw dɛmɛ u ka sɔn kibaro diiman na.

4. An bɛna kalan naani jumɛn de sɔrɔ ka bɔ Yesu ka misali la?

⁴ Barokun nin na, an bena a ye Yezu tun kisɛyanin lo cogo min na waajuli baara la, sanko kalo wɔɔrɔ minw kɔnna a ka cidenya baara laban tuma ɲɛ (kunnafoni wɛrɛ nin lajɛ Luka 10:1 koo la Bible d’étude kɔnɔ: “Après cela”). Yezu ye min fɔ ani a ye min kɛ, n’an b’a ladegi o la, an bena to ka waajuli kɛ ni kisɛya ye. An ka kalan naani lajɛ an be se ka minw sɔrɔ Yezu fɛ: 1) Jehova sagonata tun y’a ɲɛnako fɔlɔ ye, 2) a tun b’a janto Bibulu ka kiraya kumaw na, 3) a tun lanin b’a la ko Jehova bena ale dɛmɛ ani 4) a tun lanin b’a la ko mɔgɔ dɔw bena sɔn k’a lamɛn.

A YE JEHOVA SAGO KƐLI BILA JƆYƆRƆ FƆLƆ LA

5. Yesu y’a jira cogo di ko Jehova sago kɛli bɛ jɔyɔrɔ fɔlɔ la a bolo?

⁵ Yezu tun be “Ala ka masaya kibaru diman fɔ” ni kisɛya ye sabu a tun b’a lɔn ko Ala b’a fɛ a k’o lo kɛ (Luka 4:43). Yezu ye waajuli baara kɛ a ɲɛnako fɔlɔ ye. Hali kalo damanin ka kɔn a ka cidenya baara laban tuma ɲɛ, a tora ka taga “duguba ni dugudenninw” na walisa ka mɔgɔw kalan (Luka 13:22). Ka fara o kan, a ye fɔrɔmasɔn di a ka kalanden caaman ma walisa olu fana ka waajuli baara kɛ.—Luka 10:1.

6. Hali ni an bɛ se ka baara caman kɛ Jehova ye, Jehova b’a fɛ an ka waajulibaara ye cogo di? (Ja fana lajɛ.)

⁶ Hali bi, Jehova ni Yezu b’a fɛ an ka baara fɔlɔ min kɛ, o ye kibaro diiman waajuli baara ye (Mat. 24:14; 28:19, 20). An be baara o baara kɛ Jehova ye, u bɛɛ ɲɛsinna waajuli baara ma. Misali la, an be Masaya Boonw lɔ walisa an be mɔgɔ minw waaju, u ka se ka na Jehova bato yen. Ani an be baara min kɛ Betɛli la, o be dɛmɛ don waajuli baara la. Ni balawo cunna balimaw kan, an b’u dɛmɛ u k’u makoyafɛnw sɔrɔ, o min b’a to u be se ka lajɛnw ni waajuli baara daminɛ kokura. N’an b’a to an hakili la ko Jehova b’a fɛ an ka baara minw kɛ, waajuli baara lo kɔrɔtanin lo ka tɛmɛ u bɛɛ kan, a nege bena kɛ an na kosɔbɛ ka waajuli kɛ tuma o tuma. Balimacɛ János ye diinan mɔgɔkɔrɔ ye ani a be Hɔngiri jamana na. A ko: “N’ be to k’a fɔ n’ yɛrɛ ye ko an be baara o baara kɛ Jehova ye, u si tɛ se ka waajuli baara nɔɔ ta. Waajuli baara y’an ka baara fɔlɔ lo ye.”

7. Mun na Jehova b’a fɛ an ka taa ɲɛ ka waajulibaara kɛ? (1 Timote 2:​3, 4)

⁷ N’an be mɔgɔw jati i ko Jehova b’u jati cogo min na, o be se ka dɔ fara an ka kisɛya kan waajuli baara la. A b’a fɛ mɔgɔ caaman ka kibaro diiman mɛn ani ka sɔn a ma (1 Timote 2:3, 4 kalan). Komi kibaro diiman sababu la mɔgɔw niin be se ka kisi, Jehova be fɔrɔmasɔn di an ma walisa an ka se ka waajuli kɛ bɛrɛbɛrɛ. Misali la, kitabunin nin be ladili nafamanw di an ma: Mɔgɔw kanu: U kɛ Krista ka kalandenw ye. O ladiliw b’an dɛmɛ ka baro daminɛ ni mɔgɔw ye walisa ka bibulukalan kɛ n’u ye ani k’u kɛ Krista ka kalandenw ye. An be mɔgɔ minw waaju, hali n’u m’a daminɛ ka Jehova bato sisan, n’a sɔrɔ u bena sababu sɔrɔ k’o kɛ sanni tɔɔrɔba ka ban. An be min fɔ u ye sisan, n’a sɔrɔ u hakili bena jigi o la sini ma ani u bena a ɲini ka Jehova bato. O be se ka kɛ n’an tora ka waajuli kɛ.

A TUN B’A JANTO BIBULU KA KIRAYA KUMAW NA

8. Kiraya kumaw dɔnniya min tun bɛ Yesu la, o ye a dɛmɛ cogo di ka baara kɛ ni a ka waati ye ka ɲɛ?

⁸ Yezu tun b’a lɔn kiraya kumaw bena dafa cogo min na. Misali la, a tun b’a lɔn ko a ka cidenya baara bena mɛɛn saan saba ni tilan dɔrɔn kɔnɔ (Dan. 9:26, 27). A tun bena sa tuma min na ani cogo min na, a tun b’a lɔn fana kiraya kumaw be min fɔ o koo la (Luka 18:31-34). Komi Yezu tun b’a lɔn kiraya kumaw ye min fɔ, o y’a to a ye baara ɲuman kɛ n’a ka wagati ye. O la, a tora ka waajuli kɛ ni kisɛya ye walisa baara min tun kalifara a ma, a ka se k’o kɛ k’a laban.

9. Bibulu ka kiraya kumaw bɛ se ka an dɛmɛ cogo ka waajulibaara kɛ ni cɛsiri ye?

⁹ N’an be Bibulu ka kiraya kumaw faamu, o bena an jija an ka to ka waajuli kɛ ni kisɛya ye. An b’a lɔn ko duniɲa nin laban surunyana kosɔbɛ. Koo minw be kɛra bi ani mɔgɔw ka kokɛcogow b’a yira ko an be laban wagati lo la i ko Bibulu kɔnna k’a fɔ cogo min na. Bibulu kɔnna k’a fɔ fana ko worodugu yanfan fɛ masacɛ ni saheli yanfan fɛ masacɛ bena ɲɔgɔn kɛlɛ “laban waati” la. Kɛlɛ min be kɛra Angletɛri ni Ameriki ka fangatigiya ani Irisi jamana n’a jɛnɲɔgɔnw cɛ, an b’a faamu k’o kiraya kuma ɲɛsinna o lo ma (Dan. 11:40). Jaa min kofɔra Daniyɛli 2:43-45 kɔnɔ, an b’a faamu ko o sentɛgɛ ye Angletɛri ni Ameriki ka fangatigiya tagamasiɲɛ lo ye. An lanin b’a la ko i k’o kiraya kuma b’a fɔ cogo min na, yanni dɔɔni dɔrɔn, Ala ka Masaya bena adamadenw ka gofɛrɛnɛmanw halaki. O kiraya kumaw bɛɛ b’a yira ko laban wagati surunyana kosɔbɛ. O kama, an ka ɲi ka baara ɲuman kɛ n’an ka wagati ye walisa ka kibaro diiman fɔ.

10. Cogo wɛrɛ jumɛnw na Bibulu ka kiraya bɛ se ka an dɛmɛ ka dɔ fara an ka cɛsiri kan?

¹⁰ Bibulu ka kiraya kumaw be koo dɔw yira an na fana, an b’a fɛ n’an dusu bɛɛ ye ka minw fɔ mɔgɔw ye. An balimamuso dɔ tɔgɔ ko Carrie ani a be Republiki Dominikɛni jamana na. A ko: “Jehova ye layidu ta ko a bena koo ɲuman minw kɛ sini ma, ni n’ miirila u la, o be n’ jija k’u kofɔ mɔgɔ wɛrɛw ye.” A y’a fɔ fana ko: “Ni n’ y’a ye tɔɔrɔ min be mɔgɔw kan, n’ b’a faamu ko o layiduw ma ɲɛsin ne dɔrɔn ma, nka u ɲɛsinna olu fana ma.” Bibulu ka kiraya kumaw b’an jija fana an ka to ka waajuli kɛ, sabu an b’a lɔn ko Jehova b’an dɛmɛna o baara la. Leila be Hɔngiri jamana na ani a y’a fɔ ko: “Ezayi 11:6-9 be n’ jija n’ ka to ka mɔgɔw waaju, hali n’a be n’ ɲɛɛ na ko u tɛna sɔn kibaro diiman ma. N’ b’a lɔn ko mɔgɔ bɛɛ be se k’a sɔɔn yɛlɛma Jehova ka dɛmɛ barika la.” Balimacɛ Christopher be Zanbi. Ale y’a fɔ ko: “I ko a fɔra Mariki 13:10 na cogo min na, kibaro diiman be jɛnsɛnna duniɲa yɔrɔ bɛɛ la. Nɛɛma lo ne fɛ ka dɛmɛ don walisa k’o kiraya kuma dafa.” Bibulu ka kiraya kuma jumanw lo be ele jija i ka to ka waajuli kɛ?

A TUN B’A JIGI DA JEHOVA KAN

11. Walasa ka a ka waajulibaara kɛ ni cɛsiri ye, mun na Yesu tun ka kan k’a jigi da Jehova kan? (Luka 12:49, 53)

¹¹ Yezu y’a jigi la Jehova kan walisa a k’a dɛmɛ a ka waajuli kɛ ni kisɛya ye. A tun be koow kɛ nɛmɛnɛmɛ. O bɛɛ n’a ta, a tun b’a lɔn ko mɔgɔ dɔw tun bena dimi kosɔbɛ kibaro diiman kosɔn ani ko mɔgɔ caaman tun tɛna sɔn o kibaro ma fewu (Luka 12:49, 53 kalan). Diinan ɲɛmɔgɔw y’a ɲini siɲɛ caaman na ka Yezu faga a ka waajuli baara kosɔn (Zan 8:59; 10:31, 39). Nka a tora ka waajuli kɛ sabu a tun b’a lɔn ko Jehova be n’a ye. A ko: “Ne cibaga be ni ne ye. A ma ne to n kelen, bari min ka d’a ye, ne be o le kɛ tuma bɛɛ.”—Zan 8:16, 29.

12. Yesu ye a ka kalandenw labɛn cogo di u ka ta’a fɛ ka waajuli kɛ hali ni mɔgɔw tun bɛna u tɔɔrɔ?

¹² Yezu y’a ka kalandenw hakili jigi k’u be se k’u jigi la Jehova kan walisa a k’u dɛmɛ. A tun b’u hakili sigi tuma o tuma ko Jehova bena u dɛmɛ hali ni mɔgɔw b’u kɛlɛla (Mat. 10:18-20; Luka 12:11, 12). Komi Yezu tun b’a lɔn ko mɔgɔ caaman bena u kɛlɛ kibaro diiman kosɔn, a y’u jija ko u k’u yɛrɛ kɔrɔsi (Mat. 10:16; Luka 10:3). A y’a fɔ u ye ko minw t’a fɛ k’u lamɛn, u kana u waajibiya (Luka 10:10, 11). A y’a fɔ u ye fana ko ni mɔgɔw b’u kɛlɛla yɔrɔ dɔ la, u ka boli ka taga yɔrɔ wɛrɛ la (Mat. 10:23). Hali k’a sɔrɔ Yezu tun kisɛyanin lo ani a tun b’a jigi la Jehova kan, a tun t’a niin bila farati la gwansan.—Zan 11:53, 54.

13. Mun na i bɛ se ka da a la ko Jehova bɛna i dɛmɛ?

¹³ Bi, an mako be Jehova ka dɛmɛ na walisa ka to ka waajuli kɛ ni kisɛya ye ni mɔgɔw b’an kɛlɛla (Yir. 12:17). Mun na i be se ka la a la ko Jehova bena i dɛmɛ? Yezu ka delili min kofɔra Zan 17nan na, an k’o lajɛ. A ye Jehova deli ko a k’a janto ale ka cidenw na ani Jehova y’o delili jaabi. Kɛwaliw ka kitabu b’a yira Jehova ye cidenw dɛmɛ cogo min na u tora ka waajuli kɛ ni kisɛya ye hali k’a sɔrɔ mɔgɔw tun b’u kɛlɛla. Yezu ye Jehova deli fana ko minw tun bena cidenw lamɛn ani ka limaniya, a k’a janto olu fana na. O kuma ɲɛsinna ele fana ma. Jehova bele be Yezu ka delili jaabira ani a bena to k’i dɛmɛ i ko a ye cidenw dɛmɛ cogo min na.—Zan 17:11, 15, 20.

14. An b’a don cogo di ko an bɛ se ka ta’a fɛ waajuli kɛ ni cɛsiri ye? (Ja fana lajɛ.)

¹⁴ Komi duniɲa nin laban be surunyana, n’a sɔrɔ a bena gwɛlɛya an ma kosɔbɛ ka kibaro diiman fɔ ni kisɛya ye. Nka an mako be dɛmɛ min na ka se k’o kɛ, an bena o sɔrɔ (Luka 21:12-15). I ko Yezu n’a ka kalandenw, an tɛ sɔsɔli kɛ ni mɔgɔw ye. An b’a to u k’a latigɛ u yɛrɛ ma n’u bena an lamɛn wala n’u tɛna an lamɛn. Hali jamana minw na bali sigira an ka baara kan, an balimaw be sera ka kibaro diiman fɔ sabu u b’u jigi la Jehova lo kan, u t’u jigi la u yɛrɛ kan. I ko saan kɛmɛkulu fɔlɔ la, Jehova b’a ka hakili senu di an ma walisa an ka se “ka waajuli kɛ k’a dafa” i ko a b’a fɛ cogo min na (2 Tim. 4:17, Bible senuma). I be se ka la a la ko n’i y’i jigi la Jehova kan, i bena to ka waajuli kɛ ni kisɛya ye.

A TUN DALEN BƐ A LA KO MƆGƆW BƐNA A LAMƐN

15. Mun b’a jira ko Yesu tun dalen bɛ a la ko mɔgɔw bɛna sɔn ka lamɛn a ka waajulibaara la?

¹⁵ Yezu tun lanin b’a la ko mɔgɔ dɔw bena sɔn kibaro diiman na. O y’a dɛmɛ a tora ka waajuli baara kɛ ni ninsɔndiya ye. Misali la, saan 30 laban fan fɛ Krista tile la, Yezu y’a ye ko mɔgɔ caaman tun labɛnnin lo ka sɔn kibaro diiman na. A y’u suma ni suman mɔnin ye min tigɛtuma sera (Zan 4:35). Saan kelen ɲɔgɔn o kɔ, a y’a fɔ a ka kalandenw ye ko: “Suman tigɛta ka ca.” (Mat. 9:37, 38). Ani o kɔ, a y’a fɔ u ye tugun ko: “Suman tigɛta ka ca . . . Aw ka forotigi daali a ka baarakɛlaw ci ka taga ka suman tigɛ.” (Luka 10:2). Yezu tun lanin b’a la ko mɔgɔ dɔw bena sɔn ka kibaro diiman lamɛn ani a ninsɔn diyara tuma min na u y’a lamɛn.—Luka 10:21.

16. Yesu ye baara kɛ ni misali jumɛnw ye walasa ka a ka kalandenw dɛmɛ u ka se ka waajulibaara filɛ ni ɲɛ ɲuman ye? (Luka 13:18-​21) (Ja fana lajɛ.)

¹⁶ Yezu y’a ka kalandenw dɛmɛ u k’a faamu ko u ka ɲi ka to k’u ka waajuli baara filɛ ni ɲɛɛ ɲuman ye. O tun bena u dɛmɛ u ka to ka waajuli kɛ ni kisɛya ye. Misali la, an k’a ka talen fila lajɛ (Luka 13:18-21 kalan). Yezu ka talen dɔ la, a kumana mutaridikisɛ koo la walisa k’a yira ko Masaya kibaro bena jɛnsɛn cogo kabakoman na ani ko foyi tɛna se k’o bali. A ka talen wɛrɛ la, a kumana burufununan koo la walisa k’a yira ko Masaya kibaro bena jɛnsɛn duniɲa yɔrɔ bɛɛ la. A y’a yira o talen fɛ fana ko o kibaro bena kɛ sababu ye mɔgɔw be yɛlɛmaniw kɛ u ka ɲɛnamaya kɔnɔ, hali ni dɔw tɛ sin k’o kɔrɔsi. O cogo la, Yezu y’a ka kalandenw dɛmɛ u k’a faamu ko nafa bena sɔrɔ u ka waajuli baara la.

17. Kun jumɛn de bɛ an bolo ka an ka waajulibaara filɛ ni ɲɛ ɲuman ye?

¹⁷ N’an miirila k’a ye min be sera ka kɛ waajuli baara la duniɲa kuru bɛɛ kɔnɔ, o b’an jija an ka to k’o baara kɛ ni kisɛya ye. Saan bɛɛ, mɔgɔ miliyɔn caaman lo be na Hakilijigi lajɛn na ani u be bibulukalan kɛ n’an ye. Mɔgɔ waa caaman be batize ani ka na fara an kan waajuli baara la. An t’a lɔn fɔlɔ mɔgɔ daa min bena sɔn kibaro diiman na. Nka an b’a lɔn ko Jehova be jamaba lo lajɛnna, o min bena kisi tɔɔrɔba nata la (Yir. 7:9, 14). Jehova lo ye Forotigi ye ani a lanin b’a la ko mɔgɔ caaman bele bena sɔn kibaro diiman na. O la, kuun b’a la an ka to ka waajuli kɛ.

18. An b’a fɛ mɔgɔw ka mun de kɔlɔsi an na?

¹⁸ Kabi sanga ni wagati bɛɛ, mɔgɔw be Yezu ka kalandenw lɔn ka bɔ mɔgɔ tɔɔw la sabu u kisɛyanin lo waajuli baara la. Tuma min na mɔgɔw y’a ye ko cidenw be kumana ni hakilisigi ye, u y’a “lɔn ko Yezu kɔmɔgɔ dɔw lo.” (Kɛw. 4:13). An fana ka to ka waajuli kɛ ni kisɛya ye. O la, mɔgɔw bena a ye ko an be tugura Yezu sennɔ lo kɔ.