Jehova ka yafali: O kɔrɔ ye min ye ka ɲɛsin i ma

1. Mun na a man nɔgɔn ka hadamadenw ka yafali kɔrɔ faamu?

NI MƆGƆ dɔ y’a fɔ ko a yafara i ma, o kumaw b’i lafiya yɛrɛ le, sanko n’i y’a lɔn ko i ye kuma dɔ fɔ wala ka koo dɔ kɛ min digira a tigi la. Nka ni mɔgɔ dɔ ko a yafara i ma, a b’a fɛ ka mun lo fɔ tigitigi? Yala o kɔrɔ ko aw bele ye teri sɔbɛw ye wa? Wala a b’a fɛ k’a fɔ le ko a t’a fɛ aw ka kuma tugun o koo la? A ka gwɛlɛ ka adamaden ka yafali kɔrɔ faamu.

2. Jehova ka yafali kofɔra cogo di Bibulu kɔnɔ? (Duguma sɛbɛnni fana lajɛ.)

² Jehova ka yafali ni an adamaden dafabaliw ka yafali tɛ kelen ye hali dɔɔni. A ka yafali ɲɔgɔn tɛ yen. Zaburu sɛbɛbaga y’a fɔ Jehova koo la ko: “Ele be yafa sɔbɛ la. O la, bonya ka kan ka la i kan kosɔbɛ.”a (Zab. 130:4, NW). Tiɲɛn na, Jehova be “yafa sɔbɛ la.” Ale lo b’a yira an na yafali kɔrɔ tigitigi ye min ye. Tuma dɔw la ni Bibulu sɛbɛbagaw be kumana Jehova ka yafali koo la Eburukan sɛbɛninw kɔnɔ, u be kumaden min fɔ, o tɛ kelen ye n’u be kumana adamadenw ka yafali koo la.

3. Mun na Jehova ka yafali ni hadamadenw ta tɛ kelen ye? (Esayi 55:6, 7)

³ Ni Jehova ye mɔgɔ dɔ ka jurumu yafa, a b’o jurumu jɔsi ka bɔ yen. A tigi be se ka jɛnɲɔgɔnya ɲuman kɛ n’a ye kokura. Jehova ka yafali ɲɔgɔn tɛ yen sabu a be yafa an ma pewu pewu ani a b’o kɛ tuma o tuma.—Ezayi 55:6, 7 kalan.

4. Jehova bɛ an dɛmɛ cogo di an ka yafali lakika kɔrɔ faamu?

⁴ Ni Jehova ka yafali be dan na an adamaden dafabaliw ta la, an be se ka yafali kɔrɔ tigitigi faamu cogo di? Jehova be tɛmɛ ntalen kuma barikaman dɔw fɛ walisa k’an dɛmɛ k’a faamu ale be yafa an ma cogo min na. An bena u dɔw lajɛ barokun nin na. O bena an dɛmɛ k’a faamu ko n’an nimisara, Jehova b’an ka jurumuw jɔsi ka bɔ yen ani an be kɛ a teriw ye kokura. O ntalen kumaw lajɛtɔ, dɔ bena fara an ka waleɲumanlɔn kan an Faa kanutigi koo la, ale min b’a yira cogo caaman na ko a be yafa an ma.

JEHOVA BƐ AN KA JURUMUW MABƆ AN NA

5. Ni Jehova yafara an ma, o bɛ mun de kɛ an na?

⁵ Bibulu kɔnɔ, tuma caaman na jurumu sumana ni doni gwiliman ye. Masacɛ Dawuda y’a ka jurumuw kofɔ ten ko: “Ne ka fili cayara fɔɔ ne kuun te ye tugu. U kunko ka gwili ne ma kojugu.” (Zab. 38:5). Nka jurumukɛla minw nimisanin lo, Jehova be yafa olu ma (Zab. 25:18; 32:5). Eburukan kumaden min bayɛlɛmana ko “yafa,” o kɔrɔ jɔnjɔn ye ko “k’a bɔ a kan” wala “k’a ta ka bɔ yen.” O la ni Jehova yafara an ma, a be komi doni gwiliman dɔ tun b’an kan, ani a y’o ta ka bɔ yen.

6. Jehova bɛ furancɛ jumɛn de don an ni an ka jurumuw cɛ?

⁶ Ntalen kuma wɛrɛ b’a yira Jehova b’an ka jurumuw ta ka taga n’u ye fɔɔ yɔrɔ min na. Zaburuw 103:12 b’a fɔ ko: “Kɔrɔn fɛ ni tileben ka jan ɲɔgɔn na cogo min na, o cogo kelen na, a b’an ka filiw yɔrɔ jaɲa an na.” Kɔrɔn fɛ ni tileben ka jan ɲɔgɔn na kosɔbɛ. O yɔrɔ fila tɛ ɲɔgɔn kunbɛn ka ye abada! O kɔrɔ ko Jehova b’an ka jurumuw yɔrɔ janya an na cogo min na, o tɛ se ka fɔ. O b’an hakili sigi ko ni Jehova yafara an ma, a b’o kɛ pewu pewu le!

7. Ka kɛɲɛ nin Bibulu ka ɲɛfɔli ye, Jehova bɛ mun de kɛ an ka jurumuw la? (Mise 7:​18, 19)

⁷ Tiɲɛn lo ko ni Jehova yafara an ma, a be komi a y’an ka jurumuw yɔrɔ janya an na. Nka yala o kɔrɔ ko a b’u mara yɔrɔ dɔ la wa? Ayi. Masacɛ Ezekiyasi y’a fɔ Jehova koo la ko: “I ye ne ka kojuguw bɛɛ bɔ ne kan k’u fili i kɔfɛ.” (Ezayi 38:9, 17). O ntalen kuma b’a yira ko mɔgɔ min nimisanin lo, Jehova b’o tigi ka jurumuw fili yɔrɔjan ani a t’u filɛ tugun. Masacɛ Ezekiyasi ye min fɔ, o be se ka bayɛlɛma ten ko: “I y’a kɛ i n’a fɔ ne ma jurumu kɛ ka ye.” Bibulu sinsinna o miiriya kan ntalen kuma wɛrɛ la Mise 7:18, 19 kɔnɔ (a kalan). A fɔra yen ko Jehova b’an ka jurumuw fili fɔɔ kɔgɔji jukɔrɔ. Galen, u tun mana fɛɛn dɔ fili fɔɔ kɔgɔji jukɔrɔ, mɔgɔ tun tɛ se ka segi k’o fɛɛn tɔgɔla bɔ.

8. An ye mun de faamu fo ka na se nin yɔrɔ ma?

⁸ Bibulu b’a yira ko ni Jehova yafara an ma, a b’an ka jurumuw bɔ an kan pewu pewu walisa an kana to k’an yɛrɛ jalaki u kosɔn tugun. I ko Dawuda y’a fɔ cogo min na, tiɲɛn na, “mɔgɔ minw ka filiw yafara, n’u ka hakɛw t’u kan tugu, olu dagamunin lo. Matigi te mɔgɔ min ka hakɛ jati tugu, o tigi dagamunin lo.” (Ɔrɔm. 4:7, 8). O ye yafali sɔbɛ yɛrɛ lo ye!

JEHOVA BƐ AN KA JURUMUW JƆSI

9. Bibulu bɛ an dɛmɛ cogo di k’a faamu ko Jehova bɛ yafa an ma pewu-pewu?

⁹ Mɔgɔ minw nimisara, Jehova be tɛmɛ ntalen kuma wɛrɛw fɛ k’an dɛmɛ k’a faamu cogo min na a b’olu ka jurumuw jɔsi ka bɔ yen kunmabɔsara barika la. A be komi Jehova be jurumukɛla ko k’a sanango walisa k’a saniya (Zab. 51:9; Ezayi 4:4; Zer. 33:8). Jehova yɛrɛ b’a ɲɛfɔ nafa min be sɔrɔ o la. A ko: “Hali n’aw ka kojuguw wulenna i ko joli, u bena gwɛ i ko kɔɔri. Hali n’u wulenna fɔɔ ka fin, u bena gwɛ parapara.” (Ezayi 1:18). Ni fɛɛn dɔ nɔgɔra fɔɔ ka fin wala ka wulen i n’a fɔ joli, a man nɔgɔ k’o fɛɛn tɔgɔla ko ka gwɛ parapara. Nka, Jehova be tɛmɛ o ntalen kuma fɛ k’an hakili sigi ko jurumukɛla be se ka ko ka gwɛ parapara, fɔɔ a ka jurumu tɛ ye tugun.

10. Walasa k’an dɛmɛ k’a faamu ko a ka yafali nafa ka bon kosɛbɛ, Jehova ye baara kɛ ni misali wɛrɛ jumɛn de ye?

¹⁰ I ko a fɔra barokun tɛmɛnin na cogo min na, Bibulu b’a fɔ ko ni mɔgɔ ye jurumu kɛ, a be i n’a fɔ a ye “juru” lo ta (Mat. 18:32-35). O la, tuma o tuma n’an ye Jehova hakɛ ta, a be komi dɔ lo be fara an ka juru kan. Jehova ka juruba lo b’an kan. Nka n’a y’an ka jurumu yafa, a kɛra komi a y’o juru lasa. A t’an ɲininga o jurumu koo la tugun. O ntalen kuma b’an hakili sigi ko ni Jehova yafara an ma, o b’an lafiya yɛrɛ le!

11. Ni Bibulu ye a fɔ ko an ‘ka jurumuw jɔsira ka bɔ yen’, an ka kan ka o faamu cogo di? (Kɛwalew 3:19.)

¹¹ Jehova t’an ka juru wala an ka jurumuw lasa dɔrɔn dɛ, a b’u jɔsi ka bɔ yen le (Kɛwaliw 3:19 kalan).b Miiri k’a filɛ ko dɔ ka juru b’i la ani a y’o sɛbɛ papiye kan. O tigi ye trɛ ci a kan walisa k’a yira ko a y’o juru lasa. O bɛɛ n’a ta i tun ka ɲi ka wari daa min sara, o bele be se ka kalan. Nka n’i ye fɛɛn dɔ jɔsi ka bɔ yen, o be dan na. Walisa k’o faamu, an k’a to an hakili la ko galen, mɔgɔw tun be sɛbɛri kɛ ni lankiri sifa min ye, o tun be se ka jɔsi ka bɔ yen ni sifɔn ɲiginin ye cogo nɔgɔman na. O la ni dɔ ka juru ‘jɔsira ka bɔ yen,’ a be tunu pewu! Min tun sɛbɛra, o tɛ se ka ye ka kalan tugun. A be i n’a fɔ o tigi m’o juru ta ka ye. Jehova t’an ka jurumuw wala an ka juru lasa dɔrɔn dɛ, a b’u jɔsi ka bɔ yen pewu pewu le! An mana miiri o la, o b’an dusu diya yɛrɛ le!—Zab. 51:11.

12. Sankaba misali bɛ an kalan mun de la?

¹² Jehova b’an ka jurumuw yafa pewu pewu cogo min na, a y’o lakali cogo wɛrɛ la. A ko: “Ne bena i ka kojuguw datugu ni sankaba ye ani k’i ka jurumuw datugu ni sankabafin ye.” (Ezayi 44:22, NW). Ni Jehova yafara an ma, a be komi a y’an ka jurumuw datugu ni sankabafin ye walisa ale ni anw kana se k’o ye tugun.

13. Ni Jehova yafara an ka jurumuw ma o bɛ nɔ jumɛn de bila an na?

¹³ An kumana ntalen kuma minw koo la, o b’an dɛmɛ ka mun lo faamu? Ni Jehova y’an ka jurumuw yafa an ma, an man ɲi ka to k’an yɛrɛ jalaki u kosɔn an sii tɔɔ bɛɛ la. Yezu Krista ka kunmabɔsara barika la, an ka jurumuw jɔsira ka bɔ yen pewu pewu. Ni Jehova y’an ka jurumu yafa, a be komi an m’o jurumu kɛ ka ye. N’an nimisara an ka jurumu na, Jehova be yafa an ma sɔbɛ la o cogo lo la.

JEHOVA BƐ JƐƝƆGƆYA ƝUMAN DON AN NI A CƐ KOKURA

14. Ni Jehova ko a bɛna yafa an ka jurumuw ma mun na an bɛ se ka da o la? (Ja fana lajɛ)

¹⁴ Ni Jehova yafara an ma, an ka la a la ko a be kɛ an teri ye kokura. Jehova be yafa an ma pewu pewu minkɛ, kuun t’a la an ka to k’an yɛrɛ jalaki an ka filiw kosɔn. An man ɲi k’a miiri fana ko Jehova bele diminin b’an kɔrɔ ani ko a be sababu lo ɲinina walisa k’an ɲangi. A tɛna o kɛ abada! Ni Jehova ko a yafara an ma, mun na an be se ka la o la? Jehova y’a fɔ kira Zeremi ye ko: “Ne bena u ka juguya yafa. Ne hakili tena jigi u ka hakɛw la tugu.” (Zer. 31:34). Ciden Pol segira o kumaw kan. A ko: “Ne tena u ka kojuguw koo to n dusu la tugu.” (Eburuw 8:12). Nka o kɔrɔ ko di tigitigi?

15. Kɔrɔ jumɛn na Jehova hakili tɛ jigin an ka jurumuw na tuguni?

¹⁵ Bibulu kɔnɔ, n’a fɔra ko k’i “hakili jigi,” tuma bɛɛ tɛ o kɔrɔ ko ka miiri koo tɛmɛnin dɔ la. O kɔrɔ be se ka kɛ fana ko i ka dɔ kɛ dɔ ye. U tun ye kojugukɛla min gwengwe Yezu gɛrɛfɛ, ale y’a fɔ Yezu ye ko: “Matigi, n’i nana sigi i ka masaya la tuma min na, i k’i hakili to ne la.” (Luka 23:42, 43). A tun t’a ɲinina Yezu fɛ ko a ka miiri ale koo la dɔrɔn. O lo kama Yezu y’a fɔ o cɛɛ ye ko a bena a suu kunu. O la, ni Jehova ko a tɛna a hakili to an ka jurumuw na, o kɔrɔ ko a tɛna koo si kɛ an na o jurumuw kosɔn. N’a y’an ka jurumu dɔ yafa, a tɛna an ɲangi o kosɔn sini ma.

16. Hɔrɔnya min bɛ sɔrɔ ka bɔ jurumu yafa la, Bibulu bɛ mun de fɔ o ko la?

¹⁶ Ni Jehova yafara an ma o b’an hɔɔrɔnya cogo min na, Bibulu be tɛmɛ ntalen kuma wɛrɛ fɛ k’an dɛmɛ k’o faamu. An ka dafabaliya kosɔn, Bibulu b’a fɔ ko an ye “hakɛ ka jɔɔnw ye.” Nka Jehova ka yafali barika la, an y’an “yɛrɛ sɔrɔ ka bɔ hakɛ bolo.” (Ɔrɔm. 6:17, 18; Yir. 1:5). Tiɲɛn na, k’a lɔn ko Jehova yafara an ma, o b’an ninsɔn diya kosɔbɛ i ko jɔɔn min hɔɔrɔnyara.

17. Jurumu yafa bɛ kɛnɛya lase an ma cogo di? (Esayi 53:5)

¹⁷ Ezayi 53:5 kalan. An bena kuma ntalen kuma laban min koo la, o b’an suma ni mɔgɔ dɔw ye, bana jugu dɔ be minw na. Nka Jehova ye kunmabɔsara di a Dencɛ sababu la minkɛ, a be i n’a fɔ a y’an furakɛ le (1 Piyɛri 2:24). Jurumu be an ni Jehova ka jɛnɲɔgɔnya nagasi. Nka kunmabɔsara barika la, Jehova be yafa an ma ani an be jɛnɲɔgɔnya ɲuman kɛ n’a ye kokura. Ni mɔgɔ kɛnɛyara ka bɔ banajugu dɔ la, a ninsɔn be diya kosɔbɛ. O cogo kelen na, n’an kɛnɛyara Alako ta fan fɛ ani an koo diyara Jehova ye kokura sabu a yafara an ma, an fana ninsɔn be diya kosɔbɛ.

JEHOVA KA YAFA BƐ AN NAFA COGO MIN NA

18. Bibulu ye misali minnu fɔ Jehova ka yafali ko la, an ye mun de faamu o la? (koorilen nin fana lajɛ: “Jehova be yafa an ma cogo min na.”)

¹⁸ Jehova ka yafali lakalila ni ntalen kuma minw ye, an be kalan jumanw lo sɔrɔ o la? Ni Jehova yafara an ma, a b’o kɛ pewu pewu le ani a tɛna an ɲangi abada! O b’a to an be jɛnɲɔgɔnya ɲuman kɛ n’an sankolola Faa ye. O wagati kelen na, an b’a faamu ko yafali sɔbɛ ye Ala ka nilifɛn lo ye. A ma kɛ komi an ka kan n’o ye le, nka a b’o di an ma sabu a b’an kanu ani a tɛgɛ labilanin lo.—Ɔrɔm. 3:24.

19. (a) An ka kan ka Jehova waleɲumandɔn mun de ko la? (Romɛkaw 4:8) (b) An bɛna kuma mun de kan kalansen nata la?

¹⁹ Ɔrɔmukaw 4:8 kalan. An be Jehova Ala waleɲuman lɔn yɛrɛ le sabu a “be yafa sɔbɛ la”! (Zab. 130:4, NW). Nka, n’an b’a fɛ a ka yafa an ma, an ka ɲi ka koo kɔrɔtanin dɔ kɛ. Yezu y’a fɔ ko: “Mɔgɔ minw be fili aw ma . . . n’aw te yafa u ma, aw Faa min be sankolo la, ale fana tena yafa aw ma.” (Mat. 6:14, 15). O la, a kɔrɔtanin lo an ka Jehova ladegi ani ka yafa tɔɔw ma. Nka an be se k’o kɛ cogo di do? Barokun nata bena an dɛmɛ k’o faamu.