AN KA ƝƐNAMAYA KƐ IKO KRECƐNW

Mɔgɔ minnu tɛ diinɛ na, olu dɛmɛ u ka se ka u Dabaga dɔn

Yala i delila ka i yɛrɛ minɛ seereya dili la mɔgɔw ma minnu tɛ diinɛ na bawo i y’a miiri ko u tɛna lamɛnni kɛ wa? Ni o don, a to i hakili la ko mɔgɔ caman minnu tun tɛ diinɛ na, hali mɔgɔ minnu tun dalen tɛ Ala la, olu kɛra Jehova Seerew ye. Tuma caman na, o mɔgɔw mago kɛra dɛmɛ fitinin dɔrɔn de la walasa ka se ka daliluw sɛgɛsɛgɛ minnu b’a jira ko Ala bɛ yen.—Romɛkaw 1:20; 10:14.

NIN WIDEYO LAJƐ: A’YE AW HAKILI JIGIN A LA KO—DANNABALIW BƐ SE KA DANNAYA SƆRƆ!—MƆGƆ MINNU TƐ DIINƐ NA, O KƆ AW KA NIN ƝININKALI JAABI

Ka seereya di mɔgɔw ma minnu tɛ diinɛ na, Tommaso ka ko bɛ i dɛmɛ cogo di i ka hakilina ɲuman to i la ka ɲɛsin o seereya dili ma?

I ka jaabi

I bɛ se ka o kɛ cogo min na:

Ni mɔgɔ dɔ y’a fɔ ko ale dalen tɛ Ala la, kuma a fɛ ni ɲumanya ani fɛɛrɛ ye. Aw bɛ ka kuma barokun min kan, a tigi hakilina ye min ye ka ɲɛsin o ma, a jira fana ko i bɛ i mago don o hakilina la sɛbɛ la. (2 Timote 2:24) Barokun minnu bɛ sɔn ka diya a ye, a’ye baro kɛ olu kan. Dalilu minnu ye mɔgɔ caman bila u ka da a la ko Dabaga bɛ yen, yala a bɛ sɔn ka baro kɛ olu kan wa? Ni a bɛ sɔn o ma, baara kɛ ni an ka gafew ani an ka wideyow ye minnu dilanna o kama. La vie a-t-elle été créée ? ani Cinq questions à se poser sur l’origine de la vie gafeninw farala an ka mɔgɔw kalanni baarakɛminɛnw kan kɔsa in na walisa u sɔrɔli ka nɔgɔya.

A daminɛ na, laala i bɛ sigasiga ka tiɲɛ kofɔ mɔgɔ ye min dalen tɛ Ala la. O la, yala i bɛ se ka weleweledala kodɔnnaba dɔ ɲininka min bɛ se waajuli la koɲuman walasa o ka i dɛmɛ wa? I hakili to a la fana ko Jehova bɛ se ka an dɛmɛ ka mɔgɔ dusukun ɲuman tigiw dusukun sɔrɔ, hali n’a y’a sɔrɔ ko a daminɛ na u tun dalen t’a la ko Ala bɛ yen.—Kɛwalew 13:48.