AN KA ƝƐNAMAYA KƐ IKO KRECƐNW

An ka nisɔndiya sɔrɔ kibaru duman fɔli la

Yala e delila ka gɛlɛya sɔrɔ kibaru duman fɔli la wa? An cɛla, mɔgɔ caman ka jaabi ye ɔwɔ ye ka ɲɛsin nin ɲininkali ma. Mun na? Laala tuma dɔw la a bɛ se ka kɛ ko mɔgɔ caman tɛ an lamɛn walima ko u bɛ farinyakow kɛ ka ɲɛsin ma an ka waajuli kɛyɔrɔ la walima yɛrɛ ko an bɛ siran ka kuma mɔgɔ wɛrɛw fɛ. A jɛlen don ko o ko suguw bɛ se ka an ka nisɔndiya tiɲɛ. O bɛɛ la, an bɛ nisɔndiya Ala bato, o min b’a fɛ an ka a bato ni nisɔndiya ye. (Zaburu 100:2; 1 Timote 1:11) Kun jɔnjɔn saba jumɛnw de kosɔn an bɛ kibaru duman fɔ ni nisɔndiya ye?

Fɔlɔ, an bɛ ka cikan de fɔ min sinsinnen bɛ jigiya kan. Hali n’a y’a sɔrɔ ko jigiya dɔgɔyara bi donw na, an bɛ se ka mɔgɔw dusukun fa ni “fɛn ɲuman kibaru duman” ye. (Esayi 52:7) Nka Ala ka Masaya kibaru duman bɛ se ka an fana nisɔndiya kosɛbɛ. Sani an ka taa waajuli kɛ, an ka an hakili jagabɔ dubaw kan Ala ka Masaya bɛna na ni minnu ye dugukolo kan.

Filanan, an bɛ ka kibaru duman min fɔ, o bɛ mɔgɔw nafa farikolo ani alako ta fan fɛ. O kama, u bɛ a ɲini ka ko juguw dabila wa u bɛ ɲɛnamaya banbali jigiya sɔrɔ. (Esayi 48:17, 18; Romɛkaw 1:16) An bɛ se ka an yɛrɛ ye i n’a fɔ mɔgɔ minnu bɛ mɔgɔ ɲini na ani minnu bɛ ka kisili baara kɛ. Hali ni mɔgɔ dɔw bɛ yen minnu tɛ kisili fɛ, o bɛɛ n’a ta an ka taa a fɛ ka mɔgɔw ɲini minnu b’a fɛ ka kisi.—Matiyu 10:11-14.

Sabanan, o min nafa ka bon ni a bɛɛ ye, o ye ko an ka waajulibaara bɛ nɔɔrɔ da Jehova kan. A bɛ nafaba don an ka waajulibaara la. (Esayi 43:10; Heburuw 6:10) Ka fara o kan, a bɛ a ka hakili senu di an ma ni ɲumanya ye walasa an ka se ka o baara kɛ. O de kama, an ka Jehova deli kosɛbɛ walasa ka nisɔndiya sɔrɔ, o min ye hakili senu den fan dɔ ye. (Galasikaw 5:22) Ka kɛɲɛ ni a ka dɛmɛ ye, an bɛ se ka se sɔrɔ an ka jɔrɔnankow kan ani ka waajuli kɛ ni jagɛlɛya ye. (Kɛwalew 4:31) O la, mɔgɔw mana kɛcogoya fɛn o fɛn kɛ ka ɲɛsin an ma waajuli kɛyɔrɔ la, an bɛna nisɔndiya sɔrɔ an ka waajulibaara la.—Ezekiɛl 3:3.

Waajulibaara kɛcogoya minnu tɛ kelen ye hali dɔɔnin—nisɔngoya ani nisɔndiya — E bɛ a fɛ ka kɛcogoya jumɛn de mara ka i to waajuli la? Cogo jumɛn na e bɛ se ka nisɔndiya mara?

WIDEYO MIN TƆGƆ YE KO RETROUVE DE LA JOIE GRÂCE À L’ÉTUDE ET À LA MÉDITATION O JIRA, O KƆ AW YE NIN ƝININKALI NINNU SƐGƐSƐGƐ:

Mun na an ka kan ka an ka alako dumuni kɛli bila jɔyɔrɔ fɔlɔ la, hali n’o y’a sɔrɔ an bɛ lɛrɛ caman de kɛ waajuli la kalo o kalo?
An bɛ se ka Mariyama ladege sira jumɛn fɛ?
Tuma jumɛn de la e bɛ waati ta ka i hakili jagabɔ Ala ka Kuma kan?
Mun de bɛ e nisɔndiya ni i bɛ ka kibaru duman waajuli kɛ?