Dannaya min bɛ i la ka ɲɛsin Jehova ka layidu talenw ma, o barika ka bon ka se fo min?

Josue ani Solomani fila bɛɛ y’a sɛmɛntiya ko Jehova ye layidu minnu ta, ko olu si ma to dafabaliw ye. (Josue 23:14; 1 Masakɛw 8:56) O seere dannaba fila ye seereya minnu kɛ ka ɲɛsin o ko ma, olu bɛ jusigilan ɲuman di an ma an bɛ se ka an ka dannaya basigi min kan—2 Kɔrɛntekaw 13:1; Tite 1:2.

Jehova ye a ka layiduw dafa cogo jumɛn na Josue ka waati la? Wideyo min ye ko “Hali kuma kelen ma to dafabali ye”, i ni i ka denbaya ka o lajɛ ɲɔgɔn fɛ. O kɔ aw ka nin ɲininkali ninnu sɛgɛsɛgɛ: (1) Aw bɛ se ka Rahab ka dannaya wale ladege cogo di? (Heburuw 11:31; Yakuba 2:24-26) (2) Akan ka misali b’a jira cogo jumɛn na ko ka i tugu ka kanbilali kɛ ko o bɛna ni bɔnɛ ye? (3) Hali k’a sɔrɔ Gabaonkaw tun ye kɛlɛkɛcɛw ye, mun na u ye Josue lafili ani ka bɛn kɛ ni Israɛlkaw ye? (4) Jehova ka Kuma dafara cogo di tuma min na Amɔr masakɛ duuru y’a ɲini ka Israɛl bagabaga? (Josue 10:5-14) (5) Jehova ye wale kɛ ka ɲɛsin aw ma cogo di tuma min na aw ye Ala ka Masaya ni a ka tilennenya ɲini fɔlɔ aw ka ɲɛnamaya kɔnɔ?—Matiyu 6:33.

Jehova ye fɛn minnu kɛ ka tɛmɛ, a bɛ ka fɛn minnu kɛ sisan ani a bɛna fɛn minnu kɛ don nataw la, ni an ye an hakili jagabɔ olu bɛɛ kan, o bɛ an ka dannaya kɔgɔ ka ta’a fɛ ka ɲɛsin a ka layiduw ma.—Romɛkaw 8:31, 32.