Segin-ka-bɔnye minnu bɛ nɔ bɔ, o gundo ye labɛn ye
1. Kretiɛn fɔlɔw ka cidenyabaara tun bɛna bonya fo ka se hakɛ jumɛn ma?
1 Yesu tun ye a ka kalandenw labɛn cogo dafalen na walisa u ka kɛ “masaya Kibaru Duman” waajulikɛlaw ye minnu bɛ nɔ bɔ. (Mat. 4:23; 9:35) U ka waajuli baara degeli kɛra Palɛstine jamana dɔrɔn de la. Nka, sani Yesu tun ka yɛlɛn sankolo la, a y’a fɔ ko Kretiɛnw ka cidenyabaara bɛna bonya fo ka se ‘siyaw bɛɛ la, ka u kɛ a ka kalandenw ye.’—Mat. 28:19, 20.
2. Walisa ka tugu Yesu ka ci fɔlen na ka mɔgɔw ‘kɛ kalandenw ye,’ o tɛ taa mun kɔ?
2 O baara kɛli tun tɛna taa nin kow kɔ: Ka segin ka na bɔ mɔgɔw ye minnu y’a jira ko Ala ka Masaya kibaru duman ka di u ye ani k’u kalan u ka tugu Krista ka ci fɔlenw bɛɛ la. Walisa ka o segin-ka-bɔnyew kɛ minnu bɛ nɔ bɔ, an ka kan k’an labɛn ka ɲɛ.
3. Hali i nako fɔlɔ la, i bɛ se ka mun kɛ walisa i ka se ka segin ka na bɔ a ye?
3 I bɛna min kɛ, i ka kɔn ka o labɛn: Weleweledala dɔw nako fɔlɔ la , sani u ka taa, u bɛ ko bɛɛ kɛ ka ɲininkali dɔ lawuli, ka layidu ta k’u bɛ segin ka na bɔ u ye, ka baro kɛ o ɲininkali jaabi kan. Weleweledala dɔw fana y’a ye ko ka kunnafoniw kofɔ minnu bɛ Qu’enseigne la Bible gafe kɔnɔ segin-ka-bɔnye la, o bɛ u dɛmɛ u ka Bibulu kalan daminɛ yɔrɔnin kelen.
4. Munna an man kan k’a kɔnɔ fo an ka sɔn-ni-sɔn gafenin nimɔrɔ kuraw sɔrɔ, k’a sɔrɔ ka segin-ka-bɔnye kɛ?
4 Ni kalo kelen sɔn-ni-sɔn gafenin b’an bolo, o kɔrɔ tɛ ko an ka kan ka kalo nata nimɔrɔw kɔnɔ ka sɔrɔ ka segin-ka-bɔnye kɛ. An bɛ se k’a nege don an barokɛɲɔgɔn na, a k’a kanu ka dɔ fara a ka dɔnniya kan, n’an bɛ baro kɛ kunnafoni dɔ kan min jiralen bɛ sɔn-ni-sɔn gafenin kɔnɔ min bɛ a bolo kaban.
5. tuma min na an bɛ segin-ka-bɔnye kɛ, ni kuntilenna b’an na, nafa jumɛn b’o la?
5 Kuntilenna ka kɛ i la: Sani i ka segin ka na bɔ i barokɛɲɔgɔn ye, miniti damadɔ ta k’i ka fɛn sɛbɛnnenw lajɛ, k’a latigɛ i b’a fɛ ka kuntilenna min sɔrɔ. Misali la, i ye gafe min to a bolo, o yɔrɔ dɔ ta ka baro kɛ o kan. Walima sɛbɛn wɛrɛ to a bolo min bɛ aw ka baro tɛmɛnen kan. N’i tun ye ɲininkali dɔ lawuli, siga t’a la ko i kuntilenna bɛna kɛ k’o ɲininkali jaabi. Bibulu tɛmɛsira min bɛ i ka kuma kɔkɔrɔdon, n’i bɛ o nafa jira, i jija k’o kalan Bibulu kɔnɔ.
6. N’an seginna ka na bɔ mɔgɔ dɔ ye, an kuntilenna ye jumɛn ye?
6 An kuntilenna: Siga t’a la ko an kuntilenna ye ka Bibulu kalan daminɛ. An balimakɛ dɔ ye Bibulu kalan kofɔ cɛ dɔ ye, nka cɛ banna. An balimakɛ seginna ka na ni sɔn-ni-sɔn gafenin nimɔrɔ labanw ye, k’a fɔ ko: “Ikomi an bɛ yan, an bɛna ɲininkali dɔ jaabi min bɛ Bibulu kan n’o ɲɛsinnen bɛ mɔgɔw ma bi.” An balimakɛ kɛlen ka cɛ ka ɲɛfɔli lamɛn, a ye Bibulu tɛmɛsira dɔ kalan, ka dakun dɔ fana kalan min bɛ ɲininkali kan sɛbɛn dɔ kɔnɔ, Bibulu kalan bɛ kɛ ni min ye. O kɛra a bolo Bibulu kalan ye, a bɛ min kɛ tuma bɛɛ.
7. N’i ye i labɛn ka ɲɛ, o bɛ se ka i dɛmɛ cogo jumɛn na ka Bibulu kalan daminɛ?
7 Ka waati ta ka segin-ka-bɔnyew labɛn, o bɛ cɛsiri kun bɔ. Dɔ bɛna fara an ka nisɔndiya kan, wa, an bɛ se ka bonya sɔrɔ ka mɔgɔ dɔ dɛmɛ “min dusukun labɛnnen bɛ” ka taama ɲɛnamaya sira kan.-Kɛw. 13:48, NW.