An bɛ kɛlɛ kunbɛn kogow ci
1 San kɛmɛ caman kɔnɔ, Sitanɛ ye baara kɛ ni kalansira fuw ni mɔgɔ lafili ye. O cogo la, a ye fɛnw don mɔgɔ dusukunw ni u hakili la minnu ye u bali ka tiɲɛ dɔn Ala ko la. A ye dannakow jɛnsɛn i n’a fɔ ko ni tɛ sa, ko jahanama tasuma bɛ yen ani ko Ala ye sabaya ye. A ye mɔgɔ caman bila ka siga ko Ala tɛ yen ani ko Bibulu ma bɔ Ala yɔrɔ. A bɛ fɛn wɛrɛw fana kɛ ka mɔgɔw bali u ka tiɲɛ dɔn, o ye siyawoloma ani faso kanubaanciya ye. (2 Kɔr. 4:4) O dannako minnu bɛ i ko kɛlɛ kunbɛn kogow, an bɛ se ka olu ci cogo jumɛn na?—2 Kɔr. 10:4, 5.
2 U ka dannakow bɛ u ni kan: Mɔgɔw kalanna dannako minnu na kabini tuma jan k’olu ye tiɲɛ ye, o dannakow bɛ u ni kan. Dɔw dalen bɛ o dannakow la minnu tɛ tiɲɛ ye kabini u fitinin. Walisa ka o mɔgɔ suguw dɛmɛ, an ka kan ka kuma u fɛ cogo la min b’a jira u la ko u bɛ min fɔ, an bɛ o jate.—1 Pi. 3:15.
3 Mɔgɔw dalen bɛ min na, ani munna u dalen bɛ o la, n’an b’a to u k’a fɔ an ye, an bɛ se k’a jira u la ko an bɛ u bonya. (Yak. 1:19) I b’a sɔrɔ u dalen b’a la tigitigi ko ni mɔgɔ sara, a ni tɛ sa, bawo u diyanyemɔgɔ dɔw bana, wa, u b’a fɛ tiɲɛ na k’olu ye kokura. Walima u bɛ se ka seliw kɛ, bawo o kow bɛ cogow di u ma olu ni u ka denbaya ka se ka waati dumanw tɛmɛ ɲɔgɔn fɛ. U bɛ kuma minnu fɔ, n’an ye olu lamɛn, o bɛna an dɛmɛ k’u dusukunnataw faamu, ka se ka u dɛmɛ u ka sɔn kibaru duman ma.—Nt. 16:23.
4 An ka Yesu ladege: Yesu ye misali ɲumanba jira an na tuma min na a ye sariya karamɔgɔ dɔ ka ɲininkaliw jaabi. Yesu ma a sin ka jaabi tilennen di, cɛ tun bɛ se ka ban min na bawo a ka dannakow tun bɛ a ni kan. Nka, Yesu ye Sɛbɛnniw kofɔ, k’a ɲini cɛ fɛ a k’a hakilinata fɔ, ka misali di fana min ye cɛ dɛmɛ ka a hakili jakabɔ.—Luka 10:25-37.
5 Ala ka Kuma bɛ se ka kɛ mɔgɔw b’u ka dannakow bila minnu tɛ tiɲɛ ye. (Heb. 4:12) N’an bɛ muɲu mɔgɔw kɔrɔ ka tiɲɛ ɲɛfɔ u ye, o bɛ se ka don an lamɛnbagaw la. An bɛna se ka mɔgɔw dɛmɛ u k’u ban nkalon ma, ka sɔn tiɲɛ ma min bɛ se ka u hɔrɔnya.—Yuh. 8:32.